Malaysia, Cheras vengsung ah mawtaw Parking vaitawh kitotna piang

Malaysia, Cheras vengsung ah mawtaw Parking vaitawh kitotna piang

Malaysia, Cheras vengsung ah mawtaw khat Parking koihna vai hangtawh kitotna piang cih theStar pan kiza hi. Cheras, Taman Segar vengsung ah Monday ni in thubuai apiang ahihi.

Hih mawtaw neipa leh Municipal Council Personnel te kinial laitak Video kizaihkha in, Social Media ah ki khahkhia a, kikhawng mahmah cihding ahihi. Tua Video Clip pen aki khahkhiatzawh nai 10 sungbek hipan in, tuciangciang 658,067 Views bang phakhinziau hi.

Minute 4 sungbang aziakai tua Video Clip sungah mawtaw khat apei kikalhcipsak, Wheel Clamp kibawlsak ahih manin, aneipa hehmahmah hi.

DBKL Personnel tetawh kinialgawp in kitum dekdekphial uh a, ahi zongin mawtaw neipa ii ameltheih hidingin aki ummawh numei 2 in tua mawtaw neipa pen limlet mahmah uh a, ki lehkaih vanvan uhhi.

Anunung ah mawtaw neipa in a mawtaw sungpanin ciangtawn khat lakhia in, ageinai aom khatpa tawh ki ngikgawp uh a, ahihhang kitum kisatngam taktak samlo uhhi.

Cheras OCPD Asst Comm Chong Kok Sin in agenkhiatna ah hih buaina vaitawh kisai in DBKL Personnel khatin Police Report honggbawlpah cihi.

Athu buaina taktak pen tua mawtaw aneipa in Parking koihnading amunsanlo ah koihkha ahih manin, khuasungcing Municipal Council Personnel te’n tua mawtaw liausakding in nakalhcip, Wheel Clamp nabawl uhhi.

Tuavai tawh DBKL nasemte leh mawtaw neipa kinialgawp in, kisawn kawikawi uh a, buaina lianpi khat apiangsuak dektak cihi.

Police te’n hihvai tawh kisai in hoihtak kancianding uh a, ageinai ah amukha te leh tua mawtaw neipa te tungpanin Statement zong abanban in lading uh cihi.

Video: Video of motorist going berserk over clamping goes viral

Nung September kha kipatlam inzong hihbangdan buaina khat piangngei khin hi. Tualai in mawtaw aneipen numei khat ahihi. Tuapen Puchong vengsung ah thupiang hi a, Municipal Council Officer khatin mawtaw Parking amunsanlo ah akoihkhat nakalhcipsak, Wheel Clamp nabawlsak hi. Aneinu in atheih ciangin hehmahmah a, mawtaw Steering Lock tawh satdekdek in kingim vavaliang uhhi. Sawltak #zomidaily

Related: Mawtaw Parking ngahnading in anu in a taneu nisa lakah Minute 20 sung tusak

Update: Tuni Tuesday nitaklam Update akizakbehna ah tua mawtaw neipa pen Police te’n mankhin uh cihi. Cheras OCPD Asst Comm Chong Kok Sin in agenna ah tuapa pen Grab Driver khat ci a, kum 38 aphakhin khat cihi. Tulaitak Cheras Police Headquarter ah kikemphot cih kiza hi.