Australia, Adelaide ah Zomi naupangno khat mawtaw in taihlum

Australia, Adelaide ah Zomi naupangno khat mawtaw in taihlum

Australia, Adelaide khuapisung ateeng kumkhat valdeuhbek aphapan naupangno khat mawtaw in taihlum cih 9News pan kiza hi. Tua naupangno pen amin Khup Sien Khai (Khaipi) akici khat hi a, amau innzang ah mawtaw in ataihlumkha ahihi.

Naupangno Khaipi pen a it huai mahmah laitak hi in, kumkhat leh khathum (15 month) bek aphapan pasalno khat ahihi.

Athu akigenna ah zanni nitaklam in hih naupangno te innah ameltheihte mawtaw tawh hawh uh a, mawtaw anunkinsak laitak in inntekte naupangno pen ataihlumkha cimawk hi.

Zanni nitaklam 5:30pm hunpawl in Parafield Gardens vengsung aom innkhat ah thupiang hi a, inntekte kiangah ahawh lengna te’n naupangno ataihkhak ciangin amanlang in Emergency Services te kisampah hi. Ahi zongin Khaipi ii anuntakna pen ki honman nawnlo in sihsansuak hi.

Joseph Lianzaw akici inntekte meltheih khatin agenkhiatna ah hihbangdan tuahsiatna pen kakhansung in kamuhcilna hi a, ka lauthawng mahmah hi ci’n genkhia hi.

Khaipi pen inntek te ii ata neupenpen hi a, ama tungah sanggam numei 3 zong nei uhhi. Tapasal khatbekbek aneihsunsun uh hi in, kamsiatna tawh lengna te ii mawtaw in agawikha citciat ahihi.

Khaipi te innkuan pen Australia gamsung atunzawhzong sawtnai hetlo uhhi. Abeisa kum 2 hunlai in nuntak khuasakzia anuamzawding lunggulhna tawh Malaysia panin Australia atung uh ahihi.

Khaipi agawikha mawtaw pen Holden Sedan mawtaw namte hi a, tua mawtaw pen Lancaster Aveneu Driveway tungah kikhawlsak in kumpi thunei Detectives te’n tua mawtaw leh tuahsiatna munteng hoihtak Photo zaih, Evidence kaikhawm in sitcianna nei uhhi.

Naupangno mawtaw tawh ataihkha pen inntek te ii meltheih khatmah hi in, kum 49 aphakhin Salisbury sungah ateeng pasalkhat kici a, ataihkhapa ii aminpen ki pulakkhialo hi.

More: Australia, Adelaide ah Zomi khat mawtaw tuahsia in hongnusia (Mangpi, kum 42)

Zanni buaina apianhun akipan zanthapai in Police honkhat leh Major Crash Investigators te’n bangci bangin tuahsiatna piangtheihiam ci’n hoihtak kancianna neipah ngeingai uh cih kiza hi.

Khaipi hong nutsiatna hangin a innkuanpih te ihlainatpih mahmah hi. Sawltak #zomidaily