Brazil ah numeikhat asi kisa in kivuikhial, ni 11 khitciang kitheikikpan

Brazil ah numeikhat asi kisa in kivuikhial, ni 11 khitciang kitheikikpan

Numeikhat asi taktak nailo, ahinglai in ki phumkhialkha a, ni 11 khitciangin kitheipan cihi. Tua asi ci’n hankuang sungah kikoih in taihsung ah akiguang numeipen kum 37 aphakhin Rosangela Almeida dos Santos kici minnei khat ahihi.

Hih numeinu akiphumna hankhuk panin awging kiza ahih manin, hankuang aki honkhiatkik ciangin aci lumlai cimawk hi. Akhut ngawng tezong liamgawp in sisan zong kimu kawikawi a, hankuang sungpan in apusuahtheih nadingin aki tomtomna in akhut liamin si aluang hiding kici hi.

Hankuang pen siktukilh tawh hoihtak in kikilh in, taihhan sungah akisial ahihi. Friday ni in hih numeinu kivuina hansungpan in awging akizak ciangin hankuang ki hongkhiakik a, aci lumlai himahleh anuntakna omnawnlo cihi.

Hih thupiang pen Brazil, Riachao das Neves khuasung aom Senhora Santana Cemetery kici hansung ah thupiang ahihi. Hankuang aki khuatkhiat kikna Video te Social Media ah ki thehzak in, Video sungah numeinu ii a innkuanpih teleh meltheih tanau te cikngeingai, kungeingai kici hi.

Tua hankuang aki khuatkhiat khitciangin aci lumlai ahih manin, zato mawtaw Ambulance samsak un acizong pawlkhat om cihi.

Hih numeinu pen abeisa January 28 ni in sihi ci’n Hospital panin Doctors te’n agenkhit ciangin, azingciang han ah akivuipah ahihi.

Han geinai ah ateengte’n hih numeinu kivuina hankhuk sungpan in awging azak uhciangin numeinu meltheihta zasak uh cihi. Hankuang sungpan in numei akugawp leh hankuang akibeng aging kiza cimawk hi.

Hankuang aki honkhiat ciangin aci lumlai bekthamlo, apumpi pen kipeipei hiding hi, akivui in akisialdan tawh kibanglo hi, tuaban ah akhut ngawng tepan inzong aki tomtomna in sisan luangkhia cimawk hi.

Tuaban ah hih numeinu akivui laitak in abil leh anak te ahzong pat akihu hi a, ahi zongin hankuang akihonkik ciangin tuate zong ki lakhia cihi. Numeinu pen hankuang sungpan in apusuahtheih nadingin hanciam in kitomtom hiding kici hi.

Hankuang atungkhuh akikilh siktezong themkhat ki longkhia in, asunglam panin numeinu in honsawm in sawntogawp hiding kici hi.

Video: Woman ‘buried alive’ may have spent 11 DAYS ‘trying to fight her way out’ of coffin in stone tomb

Hih numeinu pen aci anat ciangin zato ah kipuak in kalkhat sungkhawng zato lumman in, tuakhit ciangin asi akici ahihi. Asihna lai “Death Certificate” tungah lungtang natna tawh “septic shock” in asi hi ci’n kigelh hi.

Hih asi numeinu pen kum 7 aphak akipan sibup theizel ahih manin, “anticonvulsant medicines” kici zatui anezel hi ci’n asanggam te’n genkhia uhhi.

Hih asi numeinu ii asanggam khatin agenna ah asi ci’n zato panin Doctors te’n akhial uh hiding hi ci uh a, tuaban ah Police Report zong bawlkhin uh cihi. Doctor te kuamahzong mawhsak nuamkei ung, nawngkaisak nuamkei ung. Ahi zongin ka sanggamnu uhpen aki vuizawh ni 11 phakhin a, aci lumlai cihpen piangtheilo hi, akikhialkhat omding hi ci’n khasiatak in genkhia uhhi.

More: India ah naungek suakcil asikhin kisa in zato te’n Plastic Bag tawh vuiding in piakhia

Hankuang aki honkik laitak in lamdang kisa ahih manin, mi 500 bang kikaikhawm in en ngeingai uh cihi. Hihvai tawh kisai in Police te’n Hopital thunei tetawh kithuah in hoihtak kankhiading cih Mirror News pan kiza hi. Sawltak #zomidaily