Brazil gamsung ah Minister asemngei khatpa innsungpan sumbekbek US$16 Million kimu

Brazil gamsung ah Minister asemngei khatpa innsungpan sumbekbek US$16 Million kimu

Brazil gamsung ah Cabinet Minister asemngei khat ii aomna Apartment inn sungah sum honpikhat kimukhia ahih manin, tua Ex-cabinet minister papen thongsung kidennapah cih AFP pan kiza hi.

Tua Ex-cabinet minister papen Geddel Vieira Lima kici a, kum 58 aphakhin khat ahihi. Hihpa pen kumpi makai asepsung in thumanlohna om cihtawh akiman “Under house arrest” in akikoih laitak ahihi.

Thukhenmang Judge Vallisney de Souza in hihpa innsung leh anu omna innsungte ah mawhsaktheih nadingin pansan Evidence azongding in palik honkhat paisak uhhi.

Zanni Friday ni in tua Ex-cabinet minister pa omngeina ahi Salvador City sung aom Apartment khatah azonkhiat uhciangin sumbekbek akikoih phitphet Suitcase leh Box pawlkhat mukhia uhhi. Tuate tungah khutma Fingerprints tepen Ex-cabinet minister pa ii khutma tawh kibanglian ahih manin, Ex-cabinet minister zong thongsung kidenna cihi.

Suitcase leh Box sungah akikoih sumte pen tamlua mahmah ahih manin, sumsim nadingin Cash Counting Machines bekbek 7 tak kizangin, nai 14 sung palik te’n sum simngekngek uhhi.

Related: Brazil gamsung ah guta khat atalbo ah Tattoo tawh guta ahihlam kigelhsak

Sumpen akigawm in US$16 Million valtak pha cimawk hi. Hih thupiang hangin Brazil gamsung aom kumpi nasem te lakah adiklo in sumngahna Corruption kilangsak mahmah kici hi. Ih gammakai, minam makai, pawlpi makai te’n amau khutsungah thumanlo in sumtampi nalutsak mawkleh ki khangtohak mahmah khading hi. Sawltak #zomidaily