Biakna le Ngeina ~ Rev. En Khan Hau

Biakna le Ngeina ~ Rev. En Khan Hau

Thumasa: I Biakna le Ngeina zuihziate tuhun a i phutkhak pahpah nam, i telbaih theihtheih dingin pawlkhat kaikhawmin kong gelhkhia hi.

Min phuahzia
Ei Zomite pen mintap ding a kigualsa diudeu-a a nei minam ihi hi. (A pa’ pa, a nu’ pa, a pa’ pi pan a zomzom in, numei ahihleh a pa’ nu, a nu’ nu, a nipi pan a zomzomin). Puankhui set neihkuma suak ahih manin Khawl Neih Sang i cih bang, Japan gal tai laitaka suak ahih manin Ral Buaia cih bangin i neihsa peuh, i buaina khatpeuh, a tamsak mawkmawk ihih lohna i theih sa ahi hi. Ahih hangin tuhuna i phutkhak i min phuahzia in a pa’ min tawpna i lak pen ahi hi. Gamdang ah a teng i om ciangin mi ngeina enga i kawm mawkmawk khat ahi hi. Mikangte in innkuan min (family name) ci-a a pa min khat a lak tawh a kibang hi a, family name a neisa ihi hi. Ei ngeina zong simtak pah a sa hi mai ing. Mi’ ngeina zang suaksuak hi leeng, i min phuah zia ding a nuai-a bang hong hi mai ding hi. Gtn; kei’ min En Khan Hau hi-in ka ta pa in ka pa Thang Kap Lian tap ahih manin Lian Sian Mung hi.

A zenzenin hih ka tapa in kei a pa min tawpna hong la himawk leh Lian Sian Hau hi ding hi. Ka tapa in ta a neih ciang in kei a pu hong tapin a pa’ min tawpna la lailaileh Hau Za Hau hong hi tamai dinga akhang akhangin Hau Lian Hau, Hau Cin Hau cih bangin hong hi suksuk ta ding hi. I pu’ min tapsak nawnlo ding cileng lah i Zongeina a phiat hizel ding hi hang. Min phuak pen in a pa’ min tawpna a la hi keng ka deihna tuam khat a om hi a cite adingin a dangte pan hong kilaih ding ahih manin, phadawm lai hi. Mi namdangte’n pate min tawpna i lak loh pen lamdang a sak uhleh zong ko ngeina hi cipeuh le’ng mipilte’n hong sang thei veve ding hi. Tua ahih manin midangte ngeina pen nuamtuam mawk loin, ei Zongeina minphuahzia mah kem cing leeng a hoihzaw tam cih khang nih khang thum dong min i phuak suk ma (gamlapi i tunma)in ngaihsuthuai ka sa hi.

Puzu kikholhna
I Zongeina hoih mahmah khat ahi hi. I Zopau thupil khat ah “valit le pute in anpal ciam masa hi” a cih mah bangin, an lakcil (anpal) masa penpen zu-in kisa (kihuan) pah a, tua zu alim mahmah ciangin pusa biakna-in inn dawi le huan dawi kithoih pah hi. Tua zulim masapen tuiphih zu-in (siampipa in a phuisam ding cianga a phih zubel) kinei pah hi. I pusa pasa le i siampi (a Pastor uh suak ve) te’n tua zulim masa (anpal) ciam masa ding a deihna uh ahi hi.

Tua zu a guan bang a om lai teng tawh pute zu kikholh pah a, a phungpite zubel pen bangkua bul ah kigualsak pahin puzu teng a banbanin kigual hi. Zunek hun hong tun ciangin pute sung pan a khangham penpen (pu ahi zong pi ahi zong) in puzu kigual teng themkhat ta tem a, a kiim a pam teng phih in, a tu a tate thupha pia hi.” Ka tute na ci, na lu uh dam ta un; mim za, tang za, kho unla galman samanin om un. Na ma uh pai henla, na khan uh sau tahen. Suan le khak tuleta tampi tawi ta un. Na lungkhamnate uh lummei bangin theng henla, na nuntakna uh sun nitang bang tahen. Na ganpi na gantate uh pung henla mi nuai-ah om loin khangual eng loin gual tung va bang tuang dingin, nipi khapi in hong siam ta hen. Pusa pasa in hong siam tahen,” ci uh hi.

Tulai Khristian Zomi ngeina sung ah hih ngeina hoih lutpihin zu zang loin niangtui lim mahmah kikholhin hi bangin thupha kipia-a thu i kingetsak ding hoih hi. Ahih theih laileh zune lopi mah, piltang pi mahin, i Zongeina late ahi tute’n pute a phuah pulate le pute’n tute a phuah tulate sakawm thei lai leeng hoih semsem ding hi. Dawila hi loin pute le tute ki-it kingaihna late ahi hi.

Kipi kitenzia
Tuhunin i pupa ngeina le i Khristian ngeinate gawmkhawmin i kiteng thei a, hoih ka sa mahmah hi. Ahi zongin Biakinn ah Siangtho kitenna lam hong tawm deuhdeuh mawk ahih manin dahhuai ka sa hi. Bang hangin hong tawm hiam cih nupa kitengte ka dotleh a tamzaw in mipi an vak zo lo a, Biakinn ah Siangtho kiten nading pen zumlak uh na hi hi. Mihaute in a kiten uh ciangin mopawi tawh zomin sialpi sialtal go uh a, a tanaute in vok luang 4/5 bang a gawh beh uh ciangin a zawngte’n tua bangin bawl zo lo ci-in zumlakin Biakinn ah Siangtho kitenna nei nawn loin, a inn vuah Siate sama khukdinin thu kingetsakna tawh kitenna a bawl hi mai hi. Siate lam pan thungetsakna ahi zongin thupha piakna ahi zongin a kibat hangin a kitengte i lungsim sungah Pasian mai-ah lungsim kingakna kikim zo lo hi. Ni danga i pu i pate Biakinn ah siangtho kitenna na nei tangtang uh ahih manun a kikhen kik ziauziau om lo pah hi.

Kei hoihsak ah, mi hau miliante’n zong mopawi nasiatak a bawl hong kidem nawn dah henla, Biakinn sungah Pasian le mipi mai-ah Siangtho kitenna hong kidembawlzaw leh ka ut hi. A neizote in mipi hong pai teng niangtui le moh Biakinn mah ah vak pahlel henla inn ah sago-a a bul a teng zawdeuh teng le sia le upate saptuam zong om nawn kei zawmai leh mikim pen Pasian tawh i kinaizaw mai dingin ka um hi. I maizumna i kisuannate in Pasian tawh hong kigamlasakzaw ka sa hi. Nidang ciangin Nipi ni zing kikhopna sungah hun tomno khat kalhelh ziau-a siangtho kitenna i bawlziau hun hong tun namel zong theih loh hi. Naumin ap hun, pawl lut dingte san hun i cihte hong bang ziau lai leh hoih lai ding hi. Rev. Job Thawngno’ laigelhna sunga bangin, sum tampi bei liang, leiba lianga sahangno a ai kholkhol tampi tak om khin zo hi. Pawi sangin i Pasian mai-ah i ki-ap nading thupi ngaihsutzaw ni. Hih pen mihaute’n hong pan leh mizawngte nuam mahmah ding hi. Mizawng i tamzaw lai hi.

Mopuan
Sum tampipi bei-in mikangte ngeina mopuan khawng kawm kul ka sa kei a, khui kul zong ka sa nawn kei hi. Tua mopuante zong mikangte’ ngeina puan hi a, Khristian ngeina mopuan cih bang hituan lo hi. Mikang Khristian ahilote’n zong zukham ankham kawma a silh uh mopuan hilel hi. Ei zong ei Zongeina puante silha i kiten ding hizaw ta hi. I gam mipih Hakha, Falam, Mizote khawng in ei sang thu na phawk baihzaw uh a, amau ngeina puante uh tawh kitenna na bawl thei khin zo uh hi. Ei Zomi numei kipawlnate’n mikangte ngeina mopuan i neih zawh nang ci-in kikumkum lai mawk hi hang .

Mo kileina
Mo i kilei ciangin zong i ngeina i kepna-in manpi mankang le i khua ngeina i zat ciat (i ngeina zat kibang kim lo) pen kimaisak zaw loin kila tangtang leng hoih ka sa zaw hi. Mihing man kiseh thei hi kei, Khristian ngeina tawh man hong la kei nung, i kici-a thusiam i kineih hi. Deih loh penin hong kima leh lah maisak zo sam loin a sammal phazah sim ding hi ung, i ci tazel hi. Khanglui lai-in zong sialpi sialtal a kinget uh pen kiman kituak zuaktak sa hi tuan loin, Pu Kam Hau’ thukhun zui-a ngeina-in nei a, a kipia a kisang ahi hi. A tanu uh zuak hileh sialpi khat ciangciang tawh phal tuanlo ding uh hi. Tua hunin dangka na nei ngei nailo uh a, lokho-in ganpi ganta khawi uh a, a kileilah kuamah om tuan lo hi.

Ahi zongin, tuhunin sialpi man zah kingen leeng, zi nei zo lo om pah tanghial ding ihih ban ah, mikim kipia zo takpi hitek leeng lah, a maisak nuam pen omin ka um tuan kei hi. Khanglui lai gan man zah kinget ding pen tawm lua lel ahih manin minsiat tak kei a ci zong ka za ngei a, dahhuai ka sa mahmah hi. Tua ahih manin tuhun adingin khanglui lai-a gan man a ciangtan zah tuat a, i kipiak pen kiman hi cih hi loin ngeina zuihna ahi hi. Tangthu pen kipuah thei lo kizem thei lo a, ngeina pen kipuah thei kizem thei ahih manin tengta kineih i bang phial zongin thaman, angkhen, manpi, mankang, puman, minman, zangdawh, kanman, mualkhup cihte pawl pekkhat pek nih pan kipan pek nga, Ks. 50 cihte i kikhin diamdiam pen etlawmin ngeina kepna hi gige hi.

Tua ahih manin, kipia takpi-in zong kinolh se loin kisang takpi leeng a piate adingin lah na lo, a sangte ading lah a tanu uh a mawk piak mah tawh kibang veve ahih manin ngeina kepna ci-in i thupibawl ding hoih ka sa zaw hi. Tuin tua bangin i thupibawl keileh nidang ciang i tate in midang ngeina nei lote’n a tanute uh melhoihna zui a, sumbuk van zuak banga a zuakte mah bangin van zuakin na zuak mai ding uh hi.

Pawlkhatte in a manpi sang lo ka hih manin ci-in a nungzui ahi sialdelh sagawhte sasengte saseng sinte tuleheite zanpuante zong pia nuam loin maisak pongmawk uh hi. Itna tawh a tanu uh a mawk piak hi loin amau’ ang sung ding theilua kisa-a asum amet a tuatsiam luate hi leuleu hi. A manpite a san loh hang a nungzuite a pia vevete phadawm lai-a ngeina a kem khin lo bek hi in, mi hoih hi lai hi. Man lah kipia-in lah kisangin a nungzuite zong kipia kisang diamdiam hileeng i ngeina hoih mahmah hi lo maw.

Ki-uapna
Nopna thu ah ki-uapna pen khatvei hi-in hoih sa ing. Ahi zongin sihna ah i ki-uapna pen nam tam lua ka sa hi. Sihdelhna, tutpihna, sihgalna, handalna, hansak tanni ci-in ngavei bang sum i kipiak pen khiap theih ding a om diam ka cici hi. Nidang lai i pupa ngeina taktak ah zong nisimin zu a nek uh hangin a ni ni-in zulup ding a kiseh sa om diudeu-a inn khat in zu bel lian tawh thumvei livei lup tuan lo uh hi. Sih delhna pen laitah zu kici-a inntekte le a behte in lup hi. Tutpih ni pen langkhet ni kici-a tua ni zunek pen langkhet zu kici pah a, tanu lamte in zu lup hi. (Lang cih pen misi a kilap cianga a tut nadinga kibawl pen hi-a tulai hileh hankuang cih ding hi). Sihvui ni-in sanggam (beh) lamte le pute lamte’n zu lup a, handal ni-in tanu lamte’n zu lup leuleu-in tanukzu nek ni kici hi. Hansak tan ni sanggam lamte le pu lamte in zu lupin tanute a vak ni hi a, sanggam zunek ni kici hi. Tua ahih manin, nihvei thumvei val zubel lian lup tuan lo uh hi.

Tulai-in misite’ inn i paisima sumtawi den pen i Zongeina hi tuan lo hi. Ahi zongin i biakna hangin hih i ngeina ahi ki-uapna sum kitawite i phiat ding hi lo a, i hanciam semsem ding ahi hi. Ahi zongin nam tampi-in za khat za nih in, khen neunau lo a, nam nih nam thum suahin i piak zawh zahzah lom piak hileh hoihzaw ding hi. Ahi zongin khatlenih i khel theih pak hi loin tangpi khel ding ahih manin baih pak lo ding hi. Ngaihsut kholhkholh dingin hoih hi.

Ngeina puan
Ngeina puan tawh kisai-in tuma kum 10 laideuh sangin tu khangthakte in i thupi ngaihsutzaw a, ka nuam mahmah hi. Gamdang paite’n hong vai khakkhak uh a, ngeina puan gante in si zo lo dekdek phial hi. Lungdamhuai mahmah hi. I Zongeina puan a phuankhia cil Zomi College sangnaupang masate hi a, siam kasa mahmah hi. Tua Zopuanak pen numei pasal a gial kibang (akang tung puandum lim gialsak) ahi hi. Numei puan le pasal puan a kilamdan nadingin ZBCM zum ah General Secretary ka sep lai-in ka gelgela pasalte adingin a kang tungah puanza laisan (pasal puanza) limin gial henla, numeite adingin i neihsa puandum (numei puanza) limin gial leh ci-in Tahan ah Siamgat siamte tawh kikumin pasal puan ding silh 100 ka gansak hi.

I minam bupin Zopuan nei tekin a kisapna ah kawmkawm kul loin ei-a’ ciat silh pahpah zo leeng cih ka lunggulh luat manin, ZBCM gam Minister khempeuh in a kibangin ka khui uh a ZBCM MC puan ka ci liang uh hi. Mipi ka lawh nop luat man uh ahi hi. Tua pan kipanin Haleluijah lasak pawipi ading mi tampi in gansaka tuin minam bup lawh zo kisa ta ka hih manun ZBCM in MC puanin a dang ka vaihawm kik ta uh hi.

Ngeina puan zat khialhna
Khamtung khua neu pawlkhatte in Biakna ulian zin le Leitung lam ulian zin a neih uh ciangin Gate bawlin i ngeina puan ahi puanza laisan le puandumte lei ah phahin tua tungtawna uliante a siksak uh pen kei aituam bangin ngaihsunin na ka sa mahmah hi. Ei’ ngeina puante eimau mah in zahtak bawl loin lei ah sikcip mawk leeng, i puante cih thadah a mi mahmah kuan hong thupi muh peuhmah ding ahi hiam.

Thu khupna
Paul Tillich in biakna pen ngeina i a zungpi hi-a ngeina pen biakna a hoihsak (a zem) ahi hi, a cih bangin Khristian Biakna in ngeina kham loin, nawlkhin lo hi. Dawi biakna ngeinate phiat ding hang a, mihing ngeina hoihte zui-in puah ding hi hang. Sangmang Pu ST Hau Go in:

“A luite lah sia kim lo, a thakte lah hoih kim lo; A lui lak pan a hoihte la-in, a thak lak pan a siate pai leeng,”

a cih bangin i Biakna sungah i Zongeinate a hoihin zem totoin puah tohtoh ding ahi hi.

I kidawp ding le i phawk khinkhian ding khat in Zomite mun tuamtuam gam tuamtuam ah i tun mah bangin ei Zomite kiangah zong mi namdang tuamtuamte hong tung ta hi. Ei Zomite’n zong ei ngeinate midangte sungah i lutpih mah bangin midangte’n zong amau ngeinate ei ngeina sung le i lungsim sungah hong lutpih ahih lam i phawk gige ding ahi hi. Tua ahih manin ei ngeina i lelhsak nini-in ei hihna (Identity) a bei ding ahih lam phawk gige in, kidophuaite kidawm mahmah ni. Rev. En Khan Hau (Church Pastor, Kalaymyo Baptist Church, ZYA Magazine)