Bhutan innkuan khat tungpan Lesson

Bhutan innkuan khat tungpan Lesson

Thumasa: Pasian angvanna hangin, ka tenna Chicagoland ah Zomi beklo, leitung gam tuamtuam pan; Kawlgam- Kachin, Kaya, Kareni, Rakhine, Bhutan, Iraq, Iran, Afghanistan, Congo,Sudan akipan minam tuamtuam tawh/ading ma ka pangzel hi.

Tuni ka hawhna BHUTAN Innkuante tungpan thupi kasak leh ka sin Thu #3

Thu#1: A kong (door) ah dotna no khat na suanguh a, HAVE YOU READ YOUR BIBLE? kici kingkiang hi. I kongte ah ee bang lai i tuangsak hiam? Kawllai in: “Na Khedap Suah in” ahikeh “Bell Tum in” peuh i ci hiam? A inn uh ka hawhsim tua lai in hong phawng (remind) dena- tua kong tunga kigelh lai no khat lel in na sem hi.Kong ah, Kawm ah i suan lim le laite in thutampi gen ahina hong phawksak hi.

Thu#2: Atanu le tapate tawh TV na en uh hi. Mite kiang hi leh Korea Drama ahikeh Kawl Movie na lak kha ding uh hi. Ai zong hih Innkuante in MOSES MOVIE na enkhawm uh hi. Tu hun ciang Jesu Movie, Samson Movie cihte thu-um kisa mahmah Christian-te inn sung na ngawnah kitam hon nawn lo a, hih innkuante thupi kasa a, ettehhuai ka sa hi.

Thu#3: A Honda Pilot mawtaw uh tawh vakkhia ding, ama mataw tuang in a maibuk ah ka tuang hi. A paupau kim lai tawm vei hong dai vat in a khuk (wear) kheu cowboy lukhu dan khat hong suah (take off) in, thu hong ngen or ki-ap khit ciang, mawtaw engine hong start pan hi. A motor start ma ki-ap zong thupi lua khin ka sa aa, a thupi zaw ah a khuk a lukhu (hat) hong suah pen ettehtak ka sa hi.

LST: Kongzing ah pilna nakpi-in kiko-a, tual-awng ah a aw sangsak hi. Paunak 1:20

Dotna #1: I kong, i kawm tunga i suan lim le nate in Pasian minthanna ahi hiam?

Dotna #2: I TV( Smart/Flat), Computer ah kilakte in Pasian awi a kai diam? Pasian thu tawh kisai a tam zaw hiam?

Dotna #3: Motor hawlma in, thungen in i ki-ap ngei hiam? Ahikeh i mangngilh kha zel hiam? Pil Mung Diary, August 15,2015