Bethsaida bual omlai ~ Pu Thangboi

Bethsaida bual omlai ~ Pu Thangboi

Bethsaida bual ah tui akilawh (kilok) laitak aki papsuk masasa bang natna bang natna anei zong in dam lianlian cihthu pen LST in agen hi a zong ih zamun sim mahmah hi. Man takpi ding hi.

Ih mai ah Pasian in Bethsaida bual dan khat hong omsak zel ahih lam ih phawkkha hetkei hi. A phawkkha te’n zong bang hun in tui kilok cih phawkkha khollo hi.

Tui khempeuh kha mang in dawn theih ding a om loh teh Moses in thungen hi. Pasian in singkung khat lak a tua singkung tui sung ah apap leh atui khum lian ci hi. (Paikhiatna 15).

Tua singkung pen a omlo hilo a Moses in atheilo hizaw hi. Pasian in hilhlo hileh tua singkung i manphatna Moses in theikha hetlo ding hi. Pasian in amit a honsak ciang in Moses leh anungzui khempeuh dangtak in puksihna ding pan in suakta uh hi.

Eizong ih gentheihna, ih haksakna, ih liangvaihna te khempeuh pan in ih suahtakna ding lampi khat a om gige den hi a ih muh lohman bek hilel hi. “Mukei mawk ing ei” zong cinuam lo in mi peuh ih ngawhngawh nuam zawsop lai hi. Suahtakna ding lampi Pasian’ tung ah dot ding hizaw hi. Amah abeng ngonglo in zong lusu ngeilo hi (Late 121).

Na khempeuh in hun nei a tua ama’ hun lian a ih matkhak ih sepkhak ding thupi hi. Bethsaida bualtui zong akilok den hilo a kilok hun khat anei ahi hi. Bual gei a omlel tawh kidam lo a, akilok laitak kipap ngiat kul hi.

Ih kiim ih kiang ah zong thuhoih thupha tampi a om gige hi a tuate ih muhtheih ih mattheih leklekna ding in Pasian’ lamlahna kisampha mahmah hi.

More: Holy Land ah Prigrimage ka zin na thu (April 14-24, 2016)

Bethsaida bual omlai hi. Pasian in ih muhtheih ih zaktheihna ding in ih mit leh ih bilte hong honsak ta hen. Amen.

Khialhna a om leh ngaidam, (Mung Laan Thang) Tawmvei, Texas, USA