Kawlgam ading a nasem Mr. Brayton Case

Kawlgam ading a nasem Mr. Brayton Case

Kawlgam pen a gam a lei hoih ahihmanin lhaicinna leh gankhawina munpi khat hi.Kum 2009 sunga Kawlgam ii’ Gross Domestic Product(GDP) pen US dollar 91.1 Billion ahi hi.Kawlgam in gamdanga a zuakkhiat van laka 40% pen Agricultural Products ahi hi.Tua export lakah Bean(be) nam khat“Bo Keih Pe” kici pen a tam pawl hi.Hih pen Mr. Brayton Case min tap-a kiphuak ahi hi.Kawl ten Mangkang mi zahtak huai deuhte “Bo” cise uh hi. Mr. Brayton Case zong “Bo Case”(pronounce as Bo Keih) ci uh hi.

Mr. Case pen Rev. John Elijah Case ii’ tapa ahi hi. A nu pen Miss Lily B. Clarke ahi hi. Anu leh a pa pen Central Burma ah Missionary nasema om ahi uh hi.Amau pen American Baptist Foreign Mission Society(ABM) nuaia sem ahi uh hi.A pa pen USA gam Maine state pan hi a, anu bel New York state pan ahi hi. Kawlgam sunga Missionary nasepna pan ki thei kha in kiteeng uh hi.

Mr.Case pen Kawlgam sung Myinggyan khua ah August 18, 1887 in piang hi.Nau pasal Russel Case kici khat nei hi. Kawlgama piang leh khangkhia ahihmanin a neulai akipan kawlpau zang hi. Kawlpau pen kawlte zah mah in siam hi.Amau’ pau English bel a neulai in thei lo hi.Mr.Case in a naupan lai in a kikhawlhpih Kawlte nuntak haksatzia mu in hehpih huai s amah mah hi. Tua ahihmanin a khan toh ciangin “kial huh” hih ding hanciam hi.

Brayton case kum 13 a phak ciang a sanggampa tawh a nu leh pa in USA ah laisin dingin omsak uh hi. USA ah a om sungin Agriculture lam va sin hi. Brown University leh Columbia University pan in Agriculture ah Master degree va la gemgam hi. University of California – Union Theological Seminary pan in Bible degree zong lak beh lai hi. Kum 1913 ciang kawlgam ah hong kileh kik hi. KUm 1916 dong kum thum sung Hinzada khua ah pasian nasep kawmin Agriculture lam hilh hi. Missionary ana om khin sa Dr. and Mrs. Cummings te nupa makaihna nuaiah Pasian’ nasem hi.Sunday school ah sia sem in Kawlpau tawh a sermon masakna pen zong hih khua ahi hi.Tua a Laisiangtho tangteel zong Paunak 4:23 mun ahi hi.

Kum 1915 in leave la in India gamah zin hi.Allahabad khua-a Pioneer Missionary te vaihawm Agriculture Trainingah va kihel thei hi. Tua laiah Miss Lena Tillman tawh kiphawk uh hi.Ms.Lena Tillman pen France gama piang, Amaerica ah sangsia kum sawm sung a sem khin ahi hi. Moulmein khua English Girl’s School ah a sep laitak ahi hi.January 17, 1917 in Moulmein ah kiteeng uh hi.Kawlgam laizang Pyinmana pen Mr.case in a gam lei hoihsa hi. Kawlgam laili ahih banah Shan State tawh kinai ahihmanin kikawmna zong nuam hi. Khaicinna dingin lemtangsa ahihmanin kum 1917 in tualai mun zuan hi.Pyinmana ah ki busa in a kiim leh kianga mite khaicindan hoih leh gankhawizia hilh hi. Khaici hoih leh gan ci hoih USA pan vaikhak in amah mah in huan bawl in sem ngiat hi.Kum 1923 in kawlgam Agricultural Science School , Pyinmana ah phuan hi. Kawlgam mun tuam tuam pan in hih school ah lai kisin hi.A sin hun sung pen kum li sung sawt hi. Kum 1927 in sangnaupang 18 in laisinna zo in Agriculture Diploma ki pia hi. Hih School pen kawlgam sunga Agriculture School masa pen ahi hi.

Kum 1941 khitciangin Japan galte kawlgamah hong lut uh hi.Pyinmana –a Mr.Case ii’ sang zong bomb siatsak uh hi.Mr.Case zong India ah gaaltai hi. British-America leh a kipawlpih ten Imphal-ah Japan Galte pang uh hi.Mr.Case zong General Joseph W. Stillwell nuaiah American galkap lut hi. “Liaison Officer” ngah pah zaw lai hi.British leh America ten Kachin State Japan galte kiang pan a hotkhiat khitciangun Agriculture lam mipi te kiangah sinsak hi.Tua banga mipi deihsakna tak tawh na a sep laitak July 14, 1944 in Kachin state Indawgyi tuili ah a tuanna gunkuang kibungin si hi. Mr.case sihna thu a zak ciangin India leh kawlgam a uk England gam kumpi taangmi Viceroy in, “Mr.Case sihna pen Kawlgam leh Alliance te adingin tanna thupi taka hi” ci-in thusuah bawl hi.

Kawlgama mr.Brayton Case nasep pen thupi mah mah hi. Pasin thu lungdamna a tangko banah Khaicin dan leh gan khawidan hoihzaw mite theisak hi.Ama hangin khaici leh ganci hoih kawlgam in nei thei hi.Bek tham lo in laisinna sang hoihte ki nei thei hi. Ama tupna pen mi genthei leh haksa nek ding nei lo te ahihtheih banga huh ding leh Pasian nasep ahi hi.Tua ahihmanin kawlgam sunga kialna a do” Hunger Fighter” khat in kiciamteh hi.

Thulakna: HUNGER FIGHTER IN BURMA

Pau Tun Thang