Bangladesh leh Myanmar kumpi te’n Rohingya hiamtawi migilo te siansuahding geelna nei
Myanmar, Rakhine State sungteng leh Rohingya Militants kici migilo te hangin akibuai mahmah laitak ahihi. Rakhine State tawh gamgi ahi Bangladesh te’nzong hih hiamtawi Rohingya Militants tepen nawngkai samahmah uh ahih manin, Myanmar kumpi tawh kipawlkhawm in “Joint Military Operations” bawlding geelna nei cih AFP pan kiza hi.
Hih Rakhine State sungteng gamsung buaina hangin mi tampitak in sihlawh cih Report tuamtuam kisuahkhia ahih manin, UN te leh leitung gamtuamtuam makaipi tezong lunghimawh mahmah uhhi.
Hih buaina hangin misi bekbek pen 100 valbang phading kici a, tualak ah Rohingya Militants mi 80 bang kihelding kici hi. Tuaban ah Rohingya tezong tultampitak Bangladesh gamlam zuanin galtaiding in ki ummawh hi.
United Nation’s Secretary-General Antonio Guterres in agenkhiatna ah Myanmar’s Rakhine State sungah Security Operations akibawlna hangin khuasungmi tampitak in thahlup thuak uh ahih manin Reports aki pulakte lungkhamhuai mahmah hi ci’n genkhia hi.
Bangladesh gamsung zuanin galtaikhia tepen atamzaw numei leh naupang vive kici ahih manin, Bangladesh gamte’nzong khuasungmi te huhtheih bangin ahuhnading in genkhia hi.
Monday ni in UN Refugee Agency te genkhiatna ah nithumsung bekbek in Myanmar pan Bangladesh gamsung zuanin gaitai bekbek akigawm in mi 3000 val phakhinta ci uhhi.
Tuabek thamlo, Bangladesh gamgi ahzong Rohingya bekbek tultampitak omlai hi ci’n kumpi thunei te’n genkhia uhhi. Bangladesh gamsung alutsawm Rohingya tampitak zong Bangladesh kumpi thunei te’n lutkhuan pialo in, Myanmar gamlamah lehsawnkik uh cihi.
Tua Rohingya galtai te lakah hiamtawi migilo tezong kihelding in ki ummawh ahih manin, Myanmar leh Bangladesh gamnih kumpi thunei te’n Joint Military Operations bawlkhawm in, siansuahding geelna anei uh ahihi.
Related: Yangon ah Rohingya te hangin Buddhist leh Muslim kikal buaina piang
Bangladesh foreign ministry official te genkhiatna ah Myanmar kumpi lampan in thukimna aomleh Rohingya migilo te betkhiatding geelna pen asawtlo in Joint Military Operations kibawlding hi ci’n genkhia uhhi. Sawltak #zomidaily
Comment piaknop aomleh...