Breaking: Stimulus Direct payment vai update (December 29, 2020)
Tuni Senate ah President Trump ii apuak kik bill nih kikup ding leh vote ding vaihawm uh aa, khat pen “Trump’s veto of the National Defense Authorization Act (NDAA) bill” leh khat pen “stimulus check $2000 bill” vai ahi hi. Democrat makai Pu Schumer in stimulus check vai vote pah ding acih leh Republican makai Pu McConnell in block aa, NDAA bill vote pah ding acih leh Senator Sen. Bernie Sanders in objection bawl leu leu tek uh ahih manin athupi mahmah bill 2 pen tu ni ki vote thei lo in ki khak tan tuak uh ahi hi.
Hih bill 2 pen zanitak House ah 2/3 votes tawh a pass sa uh hi aa, Senate ah zong bill khat a pass zawh nang in 2/3 votes (60 votes) kisam ahih manin D leh R te atam zaw athukim uh kul ahi hi. Defense bill – NDAA sungah Big-Tech (Facebook, Twitter) te ii phattuam nading leh Sen leh Russia te ii phattuam nading tam kihel lua ahih manin Pu Trump in Veto tawh anial hi aa, Senate in 2/3 tawh akip sak uh leh belh LAW suak ding ahi hi. Zingciang nitak nai 3:00PM ciang kimu kik dinguh aa, debate kibawl kik ding ahi hi.
President Trump in belh hih mipi te piak ding stimulus payment $2000 pen mipi te kisam mahmah ahih manin i pass tei tei, i piak tei tei uh kul ding hi ci in Republican senators te kiang vote tek dingin Twitter pan genkhia hi. Senate ah bipartisan vote 60 pen cing thei dingin ki gen aa, ahi zongin tulai tak Pu McConnell in Pu Trump ii hong puak kik bill nih pen anih in enkhawm, “focus” khawm ding hi hang ci hi.
Democrat leh Republican senators tampi te in hih $ 2000 vai ka vote ding uh hi ci in genkhia uh aa, pawl khat ten belh bill sungah $385 billion bang kibehlap ding ahih manin gam ii leibat khang ding cih patau uh in $600 tawh kicing hi aci pawlkhat om uh ahi hi. Tulai tak Georgia state ah Senators akidem ding Republican senators Pi Loeffler leh Pu Perdue ten zong hih Pu Trump hong sun khiat mipite piak ding $2000 vai nakpi takin ka thukim, ka panpih uh hi ci hi.
Senate ah vote akilak theih nang zingciang kikum kik dingin kilamen aa, Pu McConnell in ama personal tawh a block hi phot in amau party bup ii lunggulhna hi lo hi. Tu sung teng belh Pu McConnell leh Pu Trump, R makai te kikal kizopna hoih tak khol lo in kigen hi. Hih $2000 khan ding vai pen Pu Trump ii hong thu sun khiat masak leh Republican makai tampi te ii alunggulh uh ahi hi. Democrat makai atam zaw in zong thu kim ung ci uh hi.
Zanitak hih stimulus bill $2000 khan ding vai pen House ah bipartisan vote 275-134 tawh ki kipsak (passed) aa, D leh R ten vote khawm tek uh ahih manin a pass zo ahih hi. Hi dan vai thupi te ah 2/3 votes kisam ahih manin Party khat bek votes tawh zo thei ngeilo uh aa, party nih in athukim uh, a vote huan uh kul ahi hi. Tutung House ah a pass zawh na zong D leh R ten bipartisan vote in 2/3 votes tawh a pass uh hi aa, Party khat bek ii pass hi lo hi. House ah Democrat te 2/3 om zo lo ahih manin amau guak bek tawh bill khat pass thei lo uh aa, Senate ah zong Republicans te 2/3 om lo ahih manin party khat bek tawh bill khat ki pass thei lo uh in, Party nih te ii “bipartisan vote” bek tawh ki pass zo cih i tel ciat ding thupi mahmah hi.
Fox news te report (genkhiat) na ah belh atung aa bill 2 pen zingciang kikum in debate kibawl kik dingaa, vote lak ding ni uh khensat dinguh ci hi. Vote ki lak ding pen January ni 3 ni ma tei tei ahih uh kul ding hi ci uh hi. Zani tak ka gen mah bangin Stimulus payment $600 pen Pu Trump in sign thu khin ahih manin asawt loin kingah tek dingaa, hih $2000 vai pen hong pai to to lai ding dan ahi hi. Sentate ah ki vote in hong pass leh uh mi khat ciang $ 1400 ta hong khak kik dinguh ahi hi.
Mipi ten belh tu ta dih in mipi khat $600 tawh lungkim phot ding hi aa, $2000 vai pen zong lamet bei cih om nailo aa, hong kikum to to lai ding uh ahih manin lungduai tak aa i ngak tek ding ahi hi. Hih Stimulus bill vai Update bawl to to zel ni. Hun i ngah leh LIVE pan zong update bawl ding i hih manin kimu tek ni… Ref: US Senate LIVE & website, CBS, Fox News, Breitbart News Thomas On Sian Mung (Thomas Mung Guite) Washington D.C December 29, 2020. MOMNO Media & Museum
Comment piaknop aomleh...