Bang masa sak ding?

Bang masa sak ding?

Amun, ahun leh athu zui in i masak ding kibang lo hi. A kilawm lo a masak diklo a om ciang nuamlo bek thamlo in supna tampi piangsak thei hi.

Mimal vai nasepna ah mimal hamphatna, mimal lawhcinna, mimal tungtuanna, mimal gualzawhna… etc etc cihte masak ding ahi hi.

Pasian’ thu tawh kisai ahih ciang, Pasian’ minthanna ding, Pasian’ gam zaina ding, Pasian’ nasepna ading, Pasian’ min a kiphatna ding… Pasian…. Pasian.. masak ding ahi hi.

Tuabang mah in kipawlna nasepna ah kipawlna’ hamphatna ding, kipawlna’ masuan gualzawhna leh lawhcinna ding, kipawlna nasepna matutna ding, kipawlna… kipawlna.. masak ding ahi hi.

Minam vai ah zong tuabang mah ahi hi. I masak ding pen Minam bup, Gambup ading hamphatna, lawhcinna, khantohna, gualzawhna, pilna leh nopsakna ah ki-khangkhanna … etc. etc.. i masak ding ahi hi.

I masak ding masak lo in, ama’ mun ding a hilo, a diklo masakna om bek hilo, ong uanglua thei a, tua in nuamlo bek hilo supna tampi piangsak pahpah hi.

Pasian’ thu ah mi pawlkhat in Pasian sang a, ama’ mimal vai, mimal hamphatna ding leh mimal min le za cihpeuh ong masak luat uh ciang Pasian’ muhna genloh mihing’ muhna ah zong etlawm nawnlo thei peuhmah hi. Pasian’ thu ah bel thukhen ding Pasian ci ni.

Leitung thu ah, kipawlna tawh mipi vai mapanna leh nasepnate ahi zong in, khua le tui, Minam leh Gamvai sai a mapanna leh nasepna mabante ah ahi zong in, mimal hamphatna ding, mimal min le za ding, angsung ding masakna in kilawm lo leh muh thadah huai bek hilo…. kipawlna, khua le tui leh gam le nam nakpitak supna ong tun hi.

Mimal nasepna lo buang mundang khempeuh ah huaihamna leh mimal angsung ading masak a mapanna khempeuh huathuai mahmah a muh thadah huai vaivai mahmah in, supna lianpi nangawn piangsak pahpah hi.

I mapanna mun encian a, i masak ding bang hiam cih theihhuai hi. I huaihamna leh i kiphatsakna in ong amsak thei zel hi.

Hihna khempeuh ah mimal vai thupi asa luadente in mamal vai kan in bangmah buaipih kei zaw leh midangte, khua le tui leh gam le nam in noptuam lawh zawding, naaknuam zaw ding hi. I omna, i mapanna mun zui a i masak ding limtak ngaihsun pha mahmah ni. Pau Khat Suan