Bang lian pen? ~ Hau Za Cin

Bang lian pen? ~ Hau Za Cin

Mihing nuntakna ah bang lianpen hiam cih na ngaihsun ngei hiam? Na pian pan na sih tan in bang lianpen hi in na thei a? Nek ding maw, silh ding maw, giahna ding inn maw, innkuan maw, nu leh pa maw, lawm leh gual maw, sum leh pai maw, cidamna maw, zat zawhloh ding sum maw, etc… Pasian thu um, Lai Siangtho thuzui, upna leh biakna a nungta Pasian tungah kinga te adingin bel i LS in hong ITNA lianpen hi.

Tu laitakin a omlai thu thumte pen upna, lametna, leh itna hi a, tua thumte sung panin itna mah a thu lianpen ahi hi. (1 Korinth 13 : 13)

Nungak tangval kingaihna ah itna mah lianpen a (a tuabang lo a om leh thu tuam), zi leh pasal hi khinte kikal ah zong itna mah lianpen a, lawm leh gual kikholhna ah zong itna mah lianpen in, Pasian nasem a kalsuanna ah zong itna mah lianpen hi. Mihing khat nuntak sung tawntung in itna mah lianpen hi kici thei ding hi.

Gal kidodo te in zong itna mah na zong veve uh a, a kitawngtawng i cihte in zong itna mah na lunggulh veve uh hi. Kuamah tawh a kikhawl theilo amau beka thu tangpek te in zong itna mah na lunggulh uh a, itna neia it taka nasemte in zong amau tungah itna kilak ding na lunggulh veve uh hi. A piak zah mah uh amau zong lamen uh hi. Mihing tung pan a ngah kei uh leh van leh lei a bawlpa kiangpan na ngen uh a, Amah in bel ciil hetlo, zeek hetlo in itna na pia ziahziah hi.

Nungak leh tangval a ki it ciangin a akbawm sia nangawn mu leh nuamtuam a, ama min kigenkha bek leh zong kekkia bangin kiguihsak hi. Vokpi in a note it lua ahih manin sawlpang khuhcip ta leh a nuai pan zongkhia veve a, zawhngeu in a note a it luat manin a koihna mite in a theih ciangin mundangah tuah kawikawi, sel kawikawi hi. Ngasa namkhat in a note it lua ahih manin ngasa dangin a nek ding ciangin a kamsungah muam in a ne thei ngasa a paikhiat khit ciangin siakhia kik a, humbit hi. Vaphual in a no keuh mateng a pi a bu sungah buan tawh zuutnelh in khumcip a, a tate a leng theih ciangin khahkhia hi.

Kolkatta khuapi lam gei a niin paihna bawm sungah a kipai naungek leh phakte a sih ma un la khia a puan tawh tuam in silsiang in, sathau namtui tawh zut a, a muk ah tawp in, a khut ah tawi a, Pasian kiangah lungdam a ko thei Mother Teressa nasep zawhna zong itna hang mah ahi hi.

A gam mite a it mana Mikang kumpi in Ci peuhmah India mi in bawl theilo ding ciin a khaktan sawm hang hilo ding ci a vuak leh sat thuak a thongsung na ngawn a tung ngampa Mahatma Gandhi pen India mipi leh India gam a it man ahi hi. Mikang kumpi in leitungbup ah gam a kek zawhna hang zong a mite in agam uh a itman uh hi a, a galkapte in a gam ading a thuak ngam man uh ahi hi. US galkap Iraq ah galdo dingin a kuan masa ding akituh ziahziah na hang uh pen US gam a it man uh hi a, cimawh huhna sum a piak khiat ziahziah uh zong mihing nuntakna a it man uh ahi hi (humanitarian aid).

Vantung tokhom na ngawn nusia a leitung mimawhte gum dinga hong kumsuk a, a pilna siamna khempeuh ban ah a hun khempeuh mawhnei mite adinga hong zanga, a tawpna ah ama sisan tawh hong tatkhiatna zong hong itna hang ahi hi. Itna simloh kuamah lei na kiba kei un ciin hong nusiat a, itna tawh khat leh khat na kikhawl un ci hi.

Tua itna tawh tomcik leitung om sung nuamsa dingin hong deih hi. Huaihamna, itsikna, hazatna, duhgawhna, etc te tawh kipelh a kiniamkhiatna tawh itna laka nasem dingin hong deih hi. Tua zahta a hong deihsak midang hilo a, i Pasian ahi hi. Mihing bangin hong piang a, Pasian bangin hong it hi. Angsung theihna gitlohna cihte tawh kipelh a itna tawh a kalsuan hi dingin hong deih ahi hi.

Tuipi sagih kantan in mualtung gam keu vot leh thosi thovai tamna hong zongkhia a mihing ngeina nuntak theihna dinga hong pattah a, hong zongkhia missionary te nasep khempeuh itna hang bek hi a, eite hong itna hang hi masalo in van leh lei a bawlpa a itna hang uh ahi hi. Adoniram Judson, Hudson Taylor, William Carey, etc te nasep khempeuh mihing it man hi masalo in Pasian itna pan hong luangkhia mihing tungah a kizeel hizaw a, tua itna a ngahkha, a tangkha te a hampha ahi hi. William Carey nasepna gam Bengal minam te tuni tanin India gamah laisiam minam, kumpi u lian sem minam hi toto uh a, science pilna leh thu theihna lamah a madawk hi den uh hi.

Calvary mualtunga itna sisan luang kizom suak in India gam khuapi lak pan a kihhuai pen Kolkatta nangawn sawpsiang in a mite lungsim ah pilna, ciimna leh thutheihna guan a, van leh lei bawlpa a phawk loh uh hangin Ama nasempa hoihtak in nasemsak uh ahih manin tuni tana Botonical Garden, Zoological Garden, University leh College te a gah a lawh uh a khum mahmah te ahi hi. Tua itna pen tuni dongin kizuun zuun laia, kikepcingsak in mite in zahtak, kemnuam uh hi.

Huatna tawh nasepna Japan te galkap tampi a sihna phual Imphal ngei ah WW II phawkna mun pen paan kaiin, gambu a, a kiim a kiang buah thilthel hi. A kipuah zel teei hangin mite in pakta lua khollo a, thupi simlo in enzuul lel uh hi.

Guaktang phial a omlai eite hong pattah dinga khuaizu leh nawitui tawh a nuamsa sa USA pek pen missionary Cope Topa te hong pai vingveng hangin tuni in hih ZONET tungtawn in Zolai tawh i kiho thei a, thu i kikum thei hi. [A hun tamzaw ah kikumlo in i ki tawng, i kinial, tungnung i kituh guapguap lai kha phial zongin].

Tua itna hangin a nuntakna nangawn bei lawh liangin eite kiangah hong nusiat a, tua itna hangin eite tuni in tuipi gal kaan ding i kidem phial maita hi. Lai atpa khat in ‘Pasian thupha’ cih i lim zat luat manin ei hong huhte nangawn i mangngilh liang hi… a cih dinmun i tungto liang hi. Itna nasep khempeuh itna tawh kithuk kik tuanlo a, a phawk kha om dinga, a phawk kha nawnlo om ding hi. Ahi zongin a gah kibanglo kha ding hi. Mi 10 damsak hilo ka hiam, 9 te koi ah om hiam? 9 te thupha leh adang khat i thupha ngah kibanglo hi, kikimlo hi.

Mihing tung pan lamet pen lungkiat huai a, Pasian tung pan lamen leng lungnuam hi. Itna khempeuh zong Aman hong thuhsak dinga, huatna, bawlsiatna khempeuh phuba zong Aman hong laksak ding hi. Na khempeuh a bawlpa theihloh in a piang khatbeek omlo a, Ama muhloh khatbeek omlo hi. Thudik thuman a thukhenpa hi a, a dik a maan in a sem ding Pa hi.

Itna hangin Shillong Khasi nupi te in ann a huan ding uh ciang buhtang khut dim khat pham in a khol uh, a nek ngaih uh ciang KHUTPHAM nasepna hong kipan a, numei sep theih Pasian na cih sungah a thupi mahmah itna tawh gam kekna nasep hong suak hi. Tuni tanin tua bang nasep kizom to a, buh tang a phamlo te in zong Pasian ading khenkhia in a piakhia uh hi.

Tua itna lah kipat, Khasi gama ITNA GOSPEL a tun pen kum 150 val pan ding hi. Ahi zongin leitung kizel a, itna nasep thupi in kingaihsun hi. Sangkah naupangte in a sangkhak ding uh ciang a silh puan lui teng uh khawm in a kisamzaw diakte kiangah hawmkhia uh a, tua tawh Pasian itna lak uh hi. Tua zong damdam in kizel a, itna nasep thupi khat ahi hi. Anngawl a nektaang piak khiatna zong itna lahna hi a, a zang tampi om hi.

Pasian neihsa sawm-ah-khat ban ah a val in a pia om a, itna hang hi in, na lianpi sem sak hi. Bill Gates in India gam ah HIV/AIDS dona dingin sum tampi pia khia a, mi tampi in nuntak lawh in mi tampi in nek muh lawh hi. Itna nasep ahi hi. India mihau Steel Industry neipa in bel, “ka hauh mahmah khit ciang mite ading pia khia pan ning” ci hi. Leitungah steel industry nei a hau pen thum lak ah kihel napi pia khia nai tuanlo hi. Cik ciang a pia tam?

Hauh cianga piak ding maw, neih ciang a piak ding maw?

Ka hauh ciang pia ning ci in, hau ngei kei leng. Ka neih ciang pia ning ciin nei ngei kei leng. Ka pil ciang sem ning ciin pil ngei kei leng… Topa a lungkim tam? Zawnglua pia zo keng, it zo keng ci in hau ngei tuan kei leng. Topa’n a tawm a tam cilo hi. Na neih zah pia in ci lel hi. Na neih val hanciam in cilo a, na neihsa sung pan pia in cilel hi. Leiba in zong ci tuanlo hi. Sum puk in zong cilo hi.

Na neihsa sung pan pia in ci hi. Itna na neihsa a om hiam? Tua te na zang thei hi. Itna na kholsa om hiam, tua zang phot in. A kiam leh hong dimkik ding hi. Ciktui bang ahih leh a kisuakkhia zahzah hong phul kik dinga, hong dimkik lel ding hi. Tunglam pan kamciam khat om a, a piate in tam ngahkik dinga, a pialo te khangtuanlo ding, kiam semsem ding ci hi. Kamciam a peel ngeilopa kamciam hi bilbel hi.

Leitung bei dong note tawh kong om khawm ding acipa kamciam ahi hi. Tuni in pia khia in. Itna lak in. It zawhloh a om leh it thei dingin kisin in. Nang hong bawlsia te thungetsak in. Nang hong langpangte adingin thungen in. Nang hong simmawhte itna lak in. Nang hong thusimlote itna lak in. Nang hong hazate adingin thungetsak in. A za dingpa ITNA PASIAN ahi hi.

Mihing ngaihsut tawm a hi hetlo van leh lei a piangsaka, a sunga om khempeuh nuntakna a bawlpa hong hilh a lian penpen, a thupipenpen in ITNA ahi hi (1 Korinth 13 : 13). Tua itna a zang thei dinga teel tuam i hih khak pen mi hampha ihi hi. Van leh lei bawlpa nasem i suah theih bek zong a hamphat huai hi khin hi. Tuni in Amah teekteek in a gen lak pan a lianpen ITNA a zang thei dingte ihih manin nak hamphat lua hi hang. Ciil hetlo in i zat ding, zeek hetlo in i zat ding hi. A bei theilo pen ciil huai khollo hi. Hong kipia kikkik ding ahih manin.

Hau Za Cin
Phuitong Liim