Nute hong itna ~ Rev. Dr. Mang Do Thang

Nute hong itna ~ Rev. Dr. Mang Do Thang

Laisiangtho bulphuh: “Na pi Lois le na nu Eunice in a neih upna bangte pawl mah, lungsim takpi tawh na upna thu ka phawk a, tu-in zong nang sungah tua bang upna om hi, ci-in ka ngaihsun hi” (2 Tim.1:5).

Tanglai Judah-te paunak khat ah, “Pasien pen mun khempeuh ah om thei lo ahih manin amah in nute a na piensak ahi hi” (God could not be everywhere and therefore he made mothers) na kici hi. England-te’ Prime Minister Winston Churchill (1940-1945) ii nasep vai ah mipite ngaihsutna (public opinion) ahih kei leh thukimna (approval) tawh kisai a kan London reporter pa khat in amah tungah, “Nidang lai-a lai a hong hilh ngei na siate in a vekpi-un nang hong panpih uh hi,” ci-in thu puak hi.

Amah in tua thupuak (report) a sim khit ciangin thupuak pa kiangah, “Ka siate lakah a thupi pen pen ka nu na gen kha kei mawk veleh” (You have omitted to mention the greatest of my teachers –my mother) ci-in a lai puak kik hi kici hi. Mipilte in a nute a thupi sakna uh le a zatakna uh hi munah kimu thei hi.

1. NU KHAT’ ITNA (A Mother’s Love)

Nute in a tate a hong itna pen leitungah a kitheih ngei itnate lak panin a khauh paih pen itna nam ahi hi. Nute kimkhat bang peuhmah a tate a khualna hangun sup lawh thuak lawh bek loin sih lawh lai zen uh hi. A piang taktak thu khat gen ni. Kum 1860s kim pawlin a khangham lua nai lo nupi khat in a ang sungah naungek khat pua kawmin South Wales mualtaangte (Great Britain gam mun khat) kantanin khual zin a, lamkal ah vukkhalh huipi (snow storm) nung ahih manin a pai nading lam tawpna mun (destination) tung zo nawn loin awkcip hi.

A pai nading mun a tun thei lo ciangin a hunkhie dingte (rescuers) in a vazon vua leh vukkhalh a thukna mun khatah a luanghawm a sisa-in mu khia uh hi. Ama’ gei-ah puan tawh a kitun bikbek na khat mu uh a, a phelh uh leh a nungta lai naungekno khat mulkim huai le cizek huai takin mu leuleu uh hi.

A thu piang dan a kan uh ciangin tua naungek pen a nu in vukkhalh huihpi hangin a sih lo nadingin ama’ puantungsilh suah khia-in tua tawh a tuamcip man-a si lo nungta na hi zen hi. A nu in a tapa a it luat manin a puantungsilh suah khie-in a na silhsak manin hui vot thuak zo nawn loin a na sih lawh dan na hi mawk hi. Tua naungek pen hong khang lian a, nikhat ni ciengin leitung galpi khatna ah England-te gal a zawh pih gam makai Prime Minister minthang mahmah David Llyod George (1916-1922) a kici pa hong suak hi.

A nu adingin sih lawh taak cih ding hi mai hi. Amah a sih zenzen hangin amah hangin England-te in gal zo hong suak hi. A manpha mahmah nu khat ahih lam kinung phawk a, ahih hang ama’n belh a sepna gah ne man lo hi. Kei zomg ka neu lai-a hong khoi homg kem le mi a hong suah ka nu le ka pa in hong sihsan baih uh ahih manin ka khut tung niangtui hai khat nangawn ciamsak man lo mawk ka hih manin tuni dongin na ka sa ngeungau lai hi.

2. ETTEH TAAK NUTE (Exemplary Mothers)

Laisiangtho sung ahi a, leitungah ahi zongin a etteh taak nu hoih tampi om a, hizongle tu-in Laisiengtho sunga om a nuai-a etteh taak nute nih bek ih gen phot ding hi.

(1) Jochebed: Moses’ nu (Pai. 2:2-9)

Laisiangtho sungah zong a tunga a kigen nupi nu bangin a tate a it nute tampi om a, tuate lakah Moses’ nu zong khatin kihel dingin ka um hi. Egypt gamah Joseph a thei lo kumpi thak khat a khan ciangin amah in Hebru-te pung sem semin thahat sa pian ta ahih manin naudom siamahte (midwives) kiangah Hebru numeite tapa a suah vua leh that ding, numei ahih leh nungta sak ding ci-in khauh takin thu pia hi (Pai. 1:15-16). Ahih hangin naudom siamahte in Pasian zahtak uh ahih manin kumpipa thupiak bangin gamta lo uh hi (naudom siamahte pen tulai CDM lutte dan hi dingin ka um hi).

Moses nu in a tapa Moses pen kha thum sung seel a, a seel zawh nawn lo ciengin ama ading pumpeeng lawh khat phansak a, tua lawh pen buan le kultal tui tawh zutin a sungah naungek sial a, gun gei-a phaikungte lakah koih hi. Naungek bang hong ci peumah hiam cih a thei nop manin a tanu in a gamla panin vilsak hi. Pasian in lampi khat peuh panin a tapa hong honkhia pelmawh ding hi ci-in a nu Jochebed in muang ngiat hi.

Ama’ upna bangin Pasian in na sem takpi a, ni khat gun ah a kisil dingin a tuak suk ciangin Pharaoh’ tanu in tua naungek mu kha a, amah in naungek a meel hoih sa ahih manin that loin ama’ tapa ahi dingin khawi hi Naucing ding zong numei khat kisam ahih manin a sanggamnu tung tawnin a kizon ciangin a nu tektek Jochebed mah kicial kha laizang hi.

Hih bang pen Pasian a um lote adingin a kituak kha (coincidental) zong cih thei ding hi mah leh ei thu-umte adingin Pasian’ tangtawng gelna (eternal plan of God) cih ding hizaw hi (Pai. 2:1-10). Kumpi inn sungah Moses khang khia-in Egypt pilna khempeuh a sin khit ciangin Pasian in Israel-te a tankhie pa (deliverer) le Isarel-te ading thukham a pia pa (lawgiver) suaksak hi (Sawl. 7:22).

(2) Hannah

Laisiangtho sungah etteh taak nute lakah Samuel’ nu Hannah zong kihel ding hi. 1 Samuel a lian khatna sungah Hannah in Pasian kiangah tapa khat ngen a, tapa khat nong piak leh nangma’ na sem dingin kong ap ding hi ci-in kamciam pia hi. A thungetna Pasian in dawng a, tapa Samuel a pia hi. Samuel hong khanglian a, a kamciem bangin a nu in siampi Eli omna mun Shiloh ah Topa’ na semsak hi.

A nung ciangin Israel-te’ tangthu sungah Samuel pen kamsang thupi pente lakah khat hong suak hi. 1 Samuel 2:19 sungah, “A nu in kum simin puantualno khuisak a, a pasal tawh kumcin biakpiakna bawl dingin a pai to ciangin a puak hi,” a cih ngaisun lehang a nu in a tapa bang zahin it ahi hiam cih kimu thei hi.

Tate tungah nute’ itna pen gen zawh loin lian a, tua pen lampi tuamtuam panin kilang hi: Nute in lauhuaina mun pan tate a kep bitna, a nat a sat uh ciangin a kep a khoina, nek le tak a limci theitheite tawh a vakna, khalam le taksa lam a kidual suak-a a khan nading uh a hanciamna, cih bang gen ding tampi om hi.

Leitungah Pasian’ mizat minthang Charles Spurgeon in nute’ kepna tung tawnin a khamuanna thu hi bangin na gialh hi: “Ah, a tate genthei haksakna sungah hong lutin hong hehnepna kammal pen sathau bangin zol dikdek liang hi veh aw! Hehnepna khempeuh lakah tate in nute hehnepna mah nuamsa-in lungkim pen uh hi. A khang lian sa tate nangawn in zong nute hehnepna mah lunggul veve lai zen uh hi veh!” na ci hi. Spurgeon thu gen a kuama tek in hi sa kim dingin ka um hi.

A minthang America President-te lakah khat ahi Theodore Roosevelt in, “Gam ading gal hong simsak galkapte sangin a hoihzaw gammi pen nute, nute bek ahi hi. Mai lam ciangin papi le nupi a suak ding khangthakte a pantah le a sin pen a lawhcing nute hi a, amau pen ih khua ih tui le ih gam ih lei phattuam nadingin a kizang pha mahmahte ahi uh hi.

Tua ahih manin nute pen ih khua ih tui le ih gam sungah adangte sangin a zahtak huai dinmun thupi a late ahi uh hi. Nute pen ih minam nuntakna (national life) sungah a manpha pen le a thupi pen khat hi a, a lawhcing gam vaihawmte, ahih kei leh sumbawl mihaute, ahi kei leh limlak mithangte (artists), ahih kei leh siamna neih mipilte (scientists) sangin zong thupizaw pek hi” ci hi.

President Roosevelt thu gen pen nute khempeuh adingin a man thu ahi hi. Ahi hangin ei tapidaw nute ahi uh leh tate taksa lam, pilna lam, le lungsim lawpna lam bek ah mapui ding bek mawhpuak a neite hi loin tate khalam ah a picin thei nadingin mapui ding zong mawh puak a nei laite ahi uh hi.

3. Nute in tate a it dan ding lampi nam thum

Tapidaw nu khat in a nuai-a lampi nam thum tawh a tate tungah itna a lak ding kisam hi.

(i) Amaute ading a etteh taak tapidaw gamtat zia bawlsakna tawh (By setting a Christian examples for them)

A minthang Pasian thugen siam Campbell Morgan in tapa li nei a, a vekpi-un thu gen a kiva Pasian nasemte vive ahi uh hi. Innkuan kikhawl khopna (family reunion) khat ah a lawmpa khat in, “Morgan teng lak panin kua Morgan thu gen siam pen na vua?” a va cih leh a tapa in a pa sal gega kawmin, “Ka nu siam pen” ci-in dawng kik ziau hi. Pulpit tungah a nu in thu a gen ciangin siam mahmah hi a ci hi zezen lo hi.

Anu in khatvei mahmah zong pulpit ah Pasian’ thu gen ngei lo hi. Ahi hangin a nu in etteh taak ding gamtat luhek hoih nono tawh a inn sung vuah zui ding thumanpha hong hilh den hi a ci nuam hizaw hi. Biakinn pulpit tung pan hi loin nisim a gamtatna tung tawnin a nu in tate tungah a khauh mahmah huzap (impact) a nei na hi gige thong hi. Tua ahih manin tapidaw nute pen Pasian in a tate zui ding le a etteh taak ding gamtat hoih a lak dingin dinmun thupi a piak lam phawk tek ni.

Nute aw, na tate in a hong et uh ciangin nang tungah bang teng mu dingin na ngaihsun uh hiam? Na gamtat luhek (character) uh tawh kisai-in amaute in bang hong ci muh tam? Na tate in a neih dinga na deih gamtat luhek, om dan khawldan khempeuh nangma sungah a om ding kisam masa hi. Nu le pate kimkhat in a tate zu nek ding awi lo napi amau in lah zu dawn dawn veve mawk uh hi.

Tua pen tate ading etteh taak gamtatna hi peumah lo hi. Ih tate thuman cihtak ding ih deih taktak leh nute zong thuman cihtak kul ahi hi. Ih tate in Pasian tungah thumanna (faithfulness) ih neihsak nop leh ei nu le pate in zong Pasian tungah ih thuman kul ding hi.

(ii) Amaute tapidaw pilna piakna tawh (By giving them a Christian education)

Tapidaw nute in tate adingin kha thu ah lamlak hoih pente (spiritual guides) ahi uh hi. Amaute in tate kisap ahi Laisiangtho thubulpite, thupisak ding nate (values), le thu ngaihsutnate (attitudes) pen tate tungah muibun takin hilh sawn thei uh hi. Hih tawh kisai-in Laisiangtho in Timothy’ nu le a pi tung panin thu genteh ding a hoih pen hong pia hi.

Tua pen 2 Timothy 1:5 sungah kimu thei a, amau’ min pen Eunice le Lois ahi uh a, a khua vuah Paul pai-in Lungdamna thu (Gospel) a tangkona pana tapidaw suak uh ahi hi. A kikhel ma-un amau pen Pasian’ kammal a lunggulh le Pasian a kihta Judah mite na hi khin zo uh hi. A nu le a pi in Tiumothy pen a neu tung panin Laisiangtho hoih takin na hilh khin ta uh hi.

2 Timothy 3:15 ah sim lehang Paul in Timothy kiangah, “Khris Jesu sunga upna tung tawnin hotkhiatna ngah nadingin hong pilsak thei a siangtho Laisiangtho na neu tunga kipan na theihsa ahih lam zong na thei hi,” a cih pen en dih ni. Hi takah a neu lai pek panin Laisiangtho a thei khinsa ahih lam Timothy a phawksak kik ahi hi. Judah mi ahi ama’ nu le a pi in amah pen Pasian’ kammal Laisiangtho na hilh khin zo uh hi a ci nuam ahi hi.

Hih sunga kizang kammal “na neu tung” (childhood) a cih pen ciamteh huai hi. Tua in a diakdiakin nausente (infants) a kawk hi a, a khan kum a tuamtuam a pha naupangte (children) a ci nuam hi lo hi. Naupangte gen thadah, kum thum a pha pan Judah nausente (infants) in Laisiangtho khen kimkhat lot ngah khin uh hi. Kum nga a phate in Hebru Laisiangtho sim kipan khin ta uh hi. Kum guk a cin uh ciangin biakna pilna (religious education) sim kipan ta uh hi.

Naupangte in Sunday School siemahte hilh sangin inn ah a nute hilh pen ciamteh thei zaw uh hi kici hi. Naupang neite in ih phawk ding ah, bangza takin na manlah zongin nute in hun pia tangtangin tate tungah Pasian’ kammal hilh ding mangngil kei in. Tua bangin hih lecin, na kisik ngei kei ding hi, ahang pen amau a hong khangliat uh ciangin amau sunga na hilh Laisiangtho thuman thutakte bang za takin lungngulhin a nuntakna sung vuah na lianpi a sep lam amaute in teci hong pang ngeingei ding uh ahi lam phawk huai hi.

A tunga sep ding lampi nihte sem napi a upmawh bangun a tate in a zui lo uh ciangin nute pawlkhat lungkia thei uh hi. Amau’ upmawh bangin a tate a hoih tuan lo ciangin ka pantah dan koi mun pan khial kha ka hi tam maw ci thei uh hi. Bangza ta-in hanciamin ih tate ih pantah hangin za lakah za (100%) lawhcing pah ding hi kici thei lo hi. Paunakte 22:6 ah, “Naupang khat a pai nading lampi ah pantah lecin, a tek dongin a pial nawn kei ding hi,” a cih pen phawk huai hi.

Ahi hangin hih Paunak pen kamciam hi zenzen lo a, a huampi-a genna hizaw hi. Tua ahi leh thu mang lo, a phengphi tate a nei nute adingin lametna a om lai tam? Tampi om lai hi. Tua lametna pen naupang khat’ lungtang, lungsim le khensatna a kikhelsak thei vangliatna (power) a nei Pasian sungah om hi cih phawk ni.

(iii) Amau ading nahpi tak thunget sakna tawh (By praying for them earnestly)

A tunga ih gen lampi nihte tawh a kingah lo a phengphi tate adingin nute’ thungetna a muibut lam pen kum zalom li (4th century) huna Pasian thuthuk a thei a minthang Augustine tung panin kimu thei hi. Kum (17) a phakin a pa in sih san a, amah pen zu ne, thaikap le numei hoih lo tawh kithuahin mawhna a kici khempeuh a bawl lo a om lo zah dongin gamtat sia-a a nu lungkham a pia mahmah tapa gina lo khat ahi hi.

Ahi hang in a nu Monica in a tapa ading thunget khawl ngei vet lo hi. An tangin kap kawmin a tapa in gupkhiatna a ngah nadingin Pasian tungah thu ngen ni loh hi. Ni khat ni ciangin Pasian in a thungetna dawngin Augustine pen a piang thak bek hi loin Pasian’ na sem muanhuai mah mah khat hong suak ek hi.

Kum zalom (18) hunin England gamah Susana Wesley in tapa (17) nei hi. Amah pen Pastor khat’ zi ahih manin a manlah mahmah kawmkal panin ni simin nai khat ta, a tate adingin thungen den hi kici hi. A sawt ciangin a tate nih, John Wesley le Charles Wesley, Pasian thugen minthang suak uh a, England gam kha khanlawhna (spiritual revival) a piangsakte lakah a unau-un a kihel ban vuah Methodist pawlpi a phuancilte (founders of the Methodist Church) suak lai uh hi.

Tuni Nute ni-in tapidaw nute in tate itna a lah nading lampi thumte ahi: tate zuih ding etteh huai tapidaw gamtatna koih ding, tate tapidaw pilna sinsak ding, le tate adingin nakpi takin thungetsak ding cihte ahi hi. Ei lam pan ih sep ding teng na sem peuh lehang Pasuian in zong ama sep ding teng hong sem ding hi cih ih muan ding ahi hi.

4. Tate in bangci bangin nute lungdam thuk kik ding?

Nute ni hong tun simin leitung kiu li panin tate in nute phawkna lai ahi a, man (photo) ahi zongin social mediate ah sim let lahin a hong khah ziahziah uh a, ih lawp tha bang hong suak mai hi. Ka ngaihsutsut ciangin a khah lo uh sangin lah lungdam huai zaw veve ka sa hi. Hih bang phawkna lai a hong khahte in a vekpi-un sepkhiatna tawh nute tungah a lak khin vive ahi ding uh hiam cih belh ka thei ban kei hi.

A kilawmsakna tawh a hong khah zong om kha thei ding a, ahi takpi zong om ding hi. Mi pawlkhatte in a nute a nuntak sungin cil lum cilsa zong ciamsak lo, niangtui niangha hai khat nangawn dawnsak het lo napi a sih ciangin phawk cih takin a phawk zong om thei hi. A phawk het lote sangin lah hoih zaw veve sam hi.

Mi kimkhatte in a nute a nuntak sungin limtakin a khoi a kep lo man vua, a kisikkikna uh social media tungah a hong khah san uh ahi hiam cih zong ih thei ban kei uh hi. A nu a pa a thupi sim khol lo tata in hoh a nute a hong sih uh ciangin kuasah hangtang adingin sum tampipi bei lawh ngam ta leuleu uh hi.

Uzaw innluah ngeina a zang ei Zomite bang pen nu le pate lim bawl khol lo napi hangin, a sih ciangin sial, bawng le vok tampi tawh a kikuasah ngam minamte ih hi uh a, a hoih mahmah tawh kibang napi dah huai mahmah ka sa hi. Ih nute a sih khit ciangin sum tampi bei-in ih kuasah sangin a nuntak lai-in lim bawl zaw lehang thupha kingah zaw ding hi.

A sih khit ciangin ih thupi bawl san hangin nute in thupha hong pia thei nawn lo (hong phit thei nawn lo) a hih lam phawk ni. Ih sum teng sihna ah nek tum ding hong hi lel a, ei a tate adingin ih nute thupha ngah nading hi nawn peuhmah lo hi. Ih nute a duh a deih ih pia zo kei phial zongin a nai-a omte in kam khum bek tawh zatakin hopih ding a kisap mah bangin a gamla-a omte in zong ih manlah kawmkal panin a hun hunin ih hopih ding kisam hi.

Nute in tate tungah sum le pai zong hong lamen kha mah ding hi, hizongle tuate sanga a lamet zawk uh pen nisimin tate hopihna awging a zak ding uh ahi hi. Tate hopihna awging a zak uh ciangin nute adingin zatui hoih pen (the best medicine) ahih kei leh tha a piangsak vitamin hoih pen ahih lam tate in phawk gige ni.

A tawp khakna ah a nungta lai hi napi tate in a hong thudon khol lo nute ih om khak leh lungkiat sawm nai kei ni. Nute aw, na kihehnep thei nading uh kammal khat kong hawmsawn nuam hi. Tate in no nute a hong thu don lo, le a hong hopih lo pen ahi leh nute adingin a khasiat huai mahmah thu hi mah hi.

Ahi hangin America gammi base-ball kimawlna a siam a minthang mahmah ngei khat ahi Sam Ewing a kici pa thugenna khat tawh tha ih lak dingin kong zawn nuam hi: “Nute aw, tate in hong pampaihin hong thudon lo ci-in na kingaihsut uh leh, Salmon ngasa anu (female Salmon) in tui awn thum (three million eggs) bang tui keei sam napi, Nute ni-in amah zong kuama’n na phawk kha tuan lo hi” ci hi.

Nute ni-in a hong kiphawk kha lo nute in hih Salmon ngasa tung panin tha la mai lo diam maw! A hong nuntakpih lai nute tungah lungdam ih ko banah a hong nusia sa nute zong hih mun panin a sangpen zatakna ih pia uh hi. Laisim mimal khat ciat tungah Pasian thupha namkim hong tung tahen! Rev. Dr. Mang Do Thang (Church Pastor, Zo Baptist Church Yangon)