Na Nu le Na Pa um kei in (1) ~ Lian Tuang

Nu le pa thugen khempeuh up pahpah ding hi lo hi.

Adiakdiak in tu le ta khangcing nei khin sa nu le pa ( pi le pu ) te thugente um huai lo semsem hi.

Na nutek tawh khuasung na vak ciangin a pai kawmin nik khat puan khat khedap khat na khat peuhpeuh a et giaugiau leh

1/
“ Nu aw, hoih na sak leh lei leng ai ve” na cih ciangin “ Phamawh kei e. Deih kei ing. Zong kilawm nawn kei ning” ong cih hangin Um kei in. Hoihsa le deih ahih manin a enen hi a, na leisak zawhnak leh leisak lel lecin nuam cihtakin nuam mahmah ding hi.

2/
Amah tawh khuasung na vak khak sunsun ciangin “ Nu aw na gil a kial hiam, banglo khat I ne diam” na cih ciangin “ Phamawh kei ka gil kial kei” ong cih hangin um kei in. Ama nek theih khat peuhpeuh nek pih veve in. Agil a kial loh hangin nang tawh a kikholh nop manin na nek pih bangbang ne zo veve ding hi.

3/
Khua sung vakna ding a om ciangin “ Cycle or mawtaw tawh kong kha pak dia” na cih ciangin “ Phamawk kei ka paipai na hi e” ong cih kik ciangin um pah kei in. Alem bangbangin kha zaw in. Amah na nuam mahmah dinga a lawm le gual lak nangawn ah “ ka ta ten ong khual mahmah hi” ci in kipak angtangin a paipai na ah maingal tuam kisa uh hi.

4/
Telephone tawh na kiho uh ciangin “ Na manlah leh tuazah cih phot leng ai ve” ong cih khiankhian ciangin “ aw leh” ci in na phone khia buatbuat kei in. Gen nop le vaikhat khat nop a nei tawntung na nu le pa ahih lam mangngilh kha kei in.

5/
Telephone ong call ciangin “ Thu lamdang om kei e. Ong hopih mahmah hi ing.” Ong cih ngeingei leh um kei hamtang in. Alungsim tawnga om thu pawlkhat ong pulak khia nuam a hi hi.

6/
Na zin na vakna panin “ Bang ong puak ding ka hia. Na deih a om hia” na cih ciangin “ Bang mah kisam kei ing” ong cih hangin um kei in. Soklek tang khat bek ahi zongin banglo khat puak veve in. Aman na lamen gige veve ahihna mangngilh kha kei in.

7/
Thu le la khat peuhpeuh a om ciangin “ Ken bangmah thei nawn keng. No cih bangbang hi hen” ong cih ciangin “ Aw leh” ci lanlan pah kei in. Amau theilo hi loin tute tate ong bulphuh nop man bek hi a, a lungsim tawng taktak ah lunggulhna khat nei khinkhian uh hi.

8/
Nat le sat a thuak uh ciangin “ Hoih ing e. Lem mahmah lel e” ong cih uh ciangin um pah kei in. Cina luna bek hi loin a lungleng peuh na hi zaw thei ahih manin na hih theih zah in ompih zaw in.

9/
Lupmun tung ngak in a om laitakin a gamla a om tu le tate kiangah “ Kua man ong delh kei un. Nuam tuam sam ning” ong cih ciangin um pah kei in. Na lungkham ding leh na buailuat ding a deihloh man bek hi a, hi theileh a gei a na om ding a ut mahmah ahih lam phawk gige in.( zom toto ni e guai aw )

Lian Tuang