Kum 2100 ciang leitung mimal phazah ~ CS Dal

Kum 2100 ciang leitung mimal phazah ~ CS Dal

United Nations, UN, te tuatkholh na ah, tukum 2011 October kha ciang in leitung ah mimal mak 7 (7 billion) pha ta ding hi ci in lamen uhhi. Tua bek thamlo in, UN te in mailam kum tampi ento suak uh a, kum 2100 dong leitung mimal bangzah pha ding cih te, a hi thei ding teng ngaihsun in upmawhna nei khin uhhi.

UN te ngaihsut kholhna ah, kum 2100 ciang in leitung ah mimal mak 10 val (10 billion) pha khin ding hi ci hi. Hih bang mailam kumtampi hongpai ding hun te ah, mimal bang zah phading cih tuatna ah kumsim naungek phazah, kumsim, naungek bangzah si cih te ngaihsun phadiak uh a, naungek suak leh si phazah te bang ci bang in kum khat khit kum khat kilamdang thei ding cih zong ki ngaih sun hi.

Tua ban ah mimal phazah tuatna ah, high-projection-variant, medium-projection-variant leh low-projection-variant cih namthum tawh en uhhi. High-variant tawh a tuat hi leng, kum 2050 ciang in leitung ah mimal mak 10.6 pha ta ding hi. Low-variant tawh a et kak uh ciang in, low-variant in kum 2050 ciang in mimal mak 8.1 bek pha ding a, 2050 pan in mimal kiamsuk semsem ding a, kum 2100 ciang in leitung bup mimal mak 6.2 bek phading hi ci leuleu hi.

UN te etna ah medium-variant tawh a kilek kimding in la uh a, 2085 kum ciang in mimal mak 10 pha ding hi ci uhhi. Mimal mak 8 ciang aphak nading in, tukum pan in kum 13 sawtto laiding hi. Tua khit teh kum 18 behlap to laileng mimal mak 9 kipha to ding hi. Mimal bup mak 10 aphak na ding in, kum 40 kisap behto lai ding hi in tuat uhhi.

Kum 2100 ciang in leitung bup mimal pha zah lakpan 22.3% pen pitek putek kum 65 valte hi ding hi. Kum 2010 kum in mimal buppi 7.6% pen kum 65 te bek hi. Tua hih man in mailam ah putek pitek tam semsem cih na hi. Tua mah bang in khangno khangmui tawm semsem ding hi. 2010 kum in khangno kum 25 nuaisiah pen 47% hi a, kum 2100 ciang in 26% bek hi ding hi ci hi.

A diakdiak in leitung mimal khantohna pen African gamte ah khangto phadiak ding hi ci uhhi. A upmawh na ah Africa gam ah 2010 kum in mimal mak 1 khangto a, kum 2100 ciang in mak 3.6 (3.6billion) pha ding hi ci uhhi. 1950 kum in, leitung bup mimal lakpan 32% pen gamhau gam lian te ah teng uhhi. A hi zong in 2100 kum ciang in, 13% bek gamhau gamlian te ah teng ding hi. Leitung ah mizawng tamzaw ding cih nop hipah hi.

Hibang leitung bup mimal tuatna, tuatdan pen Thomas Malthus (1766-1834) in hong pan masa hi. Leitung mimal khangtoh na leh leitung nek leh dawn hamsak na a genkholhna tawh kisai in 1798 kum in Thomas Malthus in ‘An Essay on the Principle of Population.’ Kici laibu khat at hi. CS Dal (City University London) 14 May 2011 Source: ‘World Population Prospects: The 2010 Revision.’ UN -Press release, 03 May 2011