Mihing: A Pukna (Man: His Fall) ~ Rev. Zam Khat Kham

Mihing: A Pukna (Man: His Fall) ~ Rev. Zam Khat Kham

Mawhna koi panin kipan hiam cih dotna pen leitunga ngaihsutna kici peuhmah ah kiphukha ciat hi. Ahi zongin, Laisiangtho bek mah in a thu a cingin hong hilh hi. Vantungmite’ thu i sinna a omsa mahbangin, mihingte a kipiansak ma pekin Satan’ makaihna tawh vantungmi pawlkhat in Pasian a lehdona panin mawhna kipan hi. Piancilna sung ah Adam leh Eve mawhna ah a pukna kigen hi. Hih thu a tuamtuamin kikhia a, a piang takpi hi a mihingte mawh nei taktak ahihna kitel hi, a ki pawl a om mahbangin, a piang taktak hi lo a, tangthu lel hi, a ci pawl zong om hi. Lasiangtho sunga kigen bang lianin hih thu a piang takpi ahi, cih upna pen upna maan ahi hi.

Mihingte mawhna sungah a pukna thu thumin kimu thei hi: (1) Mawhna ah a puk ma-a Adam, (2) Mawhna ah a puk khit-a Adam, leh (3) Adam’ pukna hanga mihing khempeuh’ tunga tung siatna, cih bangin ki-en thei ding hi.

A. Mawhna Ah A Puk Ma-a Adam

Adam pen mi masa hi a, amah a huh dingin Pasian in Eve pia hi, ci-in Laisiangtho in hong hilh hi. Mihing masa amau tegel hi a, a puk ma-un mawhna nei lo uh hi. Adam leh Eve-te Pasian’ langah hong mawh uh ciangin, mihingte’ sungah mawhna hong lut a, tua pen mihingte’ pukna ci-in Lasiangtho sungah kigen hi.

Mi masate mawhna ah a puk ma-un bangtavei mawh nei lo-in om uh, cih Laisiangtho in a gen lian loh hangin, ganhingte min peuh vawh-a, Pasian tawh kikholhkhop a nopna a sinkha man dingin sawtveipi gawp mah hi leh kilawm hi. A kipiangsak dangte mahbangin, Adam leh Eve mahmah zong “hoih mahmah” a (Piancil. 1:31), a piangsak Pa lungkimsak uh, cihna ahi hi. A pianzia uh mawhna nei lo (innocent) uh hi a, Pasian’ a bangin a mawh thei ngiat lo dinga sianthona hi lo hi.

Mihingte Pasian’ lim leh mel suna kipiangsak ahih mahbangin personality kicing nei uh a, sia leh pha gamtatna tawh kisai-in khensat theihna nei uh hi. A mawh thei lo Pasian tawh kibang lo-in, mihingte leh vantungmite bel mawh thei uh hi. Vantungmite’ thu i sinna omsa mahbangin Satan mahmah na mawh a (Isa. 14:12-14; Ezek. 28:15), Satan tawh kopkhawma a mawh vantungmite zong “a dinmun masa uh kemcing lo” kici hi (Jude 6). A mawh masa Satan leh a puk vantungmite ahih manin mawhna pen mihingte’ pat hi lo a, Satan’ thuzawhna tungtawnin mawhnei mite hong suak uh ahi hi (Piancil.3:4-7).

Adam leh Eve-te bangci bangin mawh uh hiam cih thu Piancilna 3:1-6 sungah kigen hi. Hih muna a kigenna ah, tua hun lai-a mel hoih mahmah gulpi limin Satan kilang hi. Pasian in Adam leh Eve thukham khat bek pia a, tua pen sia leh pha theihtelna singgah a nek loh ding uh ahi hi. Piancilna 2:17 ah, Pasian in, “Sia leh pha theihtelna singkung panin na ne kei ding uh hi: na nek nini-un na si taktak ding uh hi” ci hi. A zuih hak het lo ding hih thupiakna pen Adam leh Eve-te in Pasian’ thu a man uh leh a man loh uh a ki-ze-etna ahi hi.

Eve tawh a kihona ah, Satan in hih thu mah tawh na pana Eve kiangah, “Huan sunga singkung khempeuh ne kei un, Pasian in ci hi lo ahia?” na ci se hi (Piancil.3:1). A cihnopna bel, Pasian in a hoih na khat amaute pia nuam lo-in a khaamna ah a kisam lo pi-in khauh pongmawk cih nopna ahi hi. Eve in gulpi dawngkikin, “Huan sunga singkungte ka ne thei ding uh hi: Ahih hangin huan laizanga singkung tawh kisai-in Pasian in, Na ne kei dinguh a, a lawnin zong na lawng kei ding uh hi, tua hi kei leh na si ding uh hi, ci hi” ci zenzen hi (Piancil. 3:2-3).

Eve in a dawnkikna ah Satan’ thangsiahna sungah lut a, huan sunga singkungte a nek theih nading vua Pasian’ thupiakna-a, “na duh bangbangun” a cih pen gen nawn lo-in, thupiak a palsat uh leh a sih na ding uh thu a kigenna ah Pasian in “ na si taktak ding uh hi” a cih pen zong gen nawn lo hi. Tua huna kipan tuni dongin mihingte in Pasian’ hoihna neugen dena, Pasian’ thupiakte a khauna a unggen denna kilang hi. Satan in tua thu mah bawhkhat suah-in, “Na si kei mahmah ding uh hi: Na nek nini-un na mitte uh vaka, pasian bangin, a sia leh a pha a khentel theih ding uh Pasian in thei hi” ci-in khemsuk pah hi (Piancil.3:4-5).

Numei tawh a kihona ah Satan pen tua banga zuaugen ahihna kilang hi. Pasian’ thupiak palsatna hanga thukhenna thusim lo-in, Pasian’ Kammal mahmah nial hi. Singgah a nek uh ciangin a mit uh vak ding cih pen a hi takpi mah hi a, ahih hangin Satan in a gen loh khat oma, a pha-a gamta zo het lo dingin sia leh pha khentel thei takpi dinguh ahihna gen lo hi.

Piancilna 3:6 ah, Adam leh Eve mawhna ah a pukna kigen a, “Numei in tua singkung an dinga a hoihna mu-in, a mit la-a, mi khat a pilsak dingin theihhuaisa-in, singah lo-a, ne-in, amah tawh a omkhawm a pasal pia-a, ama’n zong ne hi” ci-in kigelh hi. Hih thute Satan’ gena a theih maw, numei in ama’ thu-a a theih maw, cih Laisiangtho in gen lo hi.

Hih ze-etna nam thum tawh a kibang lianlian mah I John 2:16 ah kimu hi: singgah limtuak a cih pen “ci leh sa lunggulhna” hi a; tua singgah in “ a mit la” a cih ciangin “mittang lunggulhna” ahih mahbangin, tua singgah in amaute pilsak theih nading vangliatna nei a cih pen “kiphatsakna” ahi hi. Khazih mahmah a ze-etna ah zong Satan in hih thumteng mah na zang hi (Matt.4:1-11; Mk. 1:12-13; Lk. 4:1-13). Eve in khemna thuakin singgah na ne a, Adam in bel khemna thuak lopi-in Eve’ nung zui-in singgah na ne hi (I Tim. 2:14).

B. Mawhna Ah A Puk Khit-a Adam

Adam leh Eve a mawh uh ciangin amaute a kipiansakna dinmun khahsuah uh a, a mawhna uh hangin siatna tampi hong tung hi.

1. Kha sihna leh pumpi sihna thuak uh hi. Pasian in, “Tua singgah na nek nini-un na si taktak ding uh hi” (Piancil. 2:17) ci a, a cih bang lianin tangtung hi. Thakhat thu-in Adam leh Eve in kha sihna thuak pah uh a, cih nopna taktak ah, khathu ah Pasian tawh a kikhen uh hi pah hi, cihna ahi hi. Mawhna sunga a pukna uh hangin a pumpi mahmah uh tek thei-in sia thei pah a, a hun a tun ciangin pumpi sihna mawhna dan thuakin, tua sihna hangin a pumpi uh leh a hinna uh kikhen hi.

2. Pasian in Satan mahmah zong thukhen pah a, gulpi zong lei lakah awmtak hi (Piancil. 3:14). Mihing tate tawh kizomin Pasian leh Satan’ kikal ah kigalneihna om pah a, “Nang leh numei kikal, nang’ suan leh numei’ suan kikal ah kigalneihna ka koih dinga; ama’n na lutang hong tuanzan dinga, nang ama’ khetul na tu ding hi” ci-in na gen hi (Piancil.3:15). Tua pen Khazih leh Satan kikal thu kigenna hi a, “Nang a khetul na tu ding hi” ci-a kigenkhol bangmah-in Khazih in singlamteh tungah sihna a thuak hangin sihna in lehcip zo lo hi. Satan’ guallehna ding thu bel, numei’ suan in “na lutang hong tuanzan ding hi” a cihna ah kimu a, a tawntunga liamna leh lelna a kigenna ahi hi. Numei’ suan a cih ciangin a sihna leh a thawhkikna ah Satan; tunga gualzo Zeisu Khazih a kigenna ahi hi.

3. Nausuahna ah gimna thuaka, a pasal’ ukna nuai-a om dinga thukhenna a thuak numei’ tungah zong thu kikhen hi. (Piancil.3:16). Mihingte si thei ta mawk ahih manin tanu tapa tampi a neih uh kul sawnsawn hi.

4. Adam mahmah zong kisamsia a, leitang panin a nek ding a pian naidng nasep hampi kipia a, leitang nangawn zong kisamsia-in ling leh thanglingte po ta hi. A kipiangsaksa nate mahmah nangawn zong mihingte’ mawna hangin kikhel khinmang hi (Rom. 8:22). Hotkhiatna thu hangin hih samsiatnate pawlkhat nuamtuam zawdeuh-in kum tul maanna ah pawlkhat kiphiat ding, cih thu Laisiangtho in hong hilh hi. Adam leh Eve bel a puk khit uh ciangin huan sung pan kihawlkhia pah a, tua huna kipan tuni donga mihingte’ tuahkhak dahna leh gimnate tuak pah uh hi.

C. Adam’ Pukna Hanga Mihing

Khempeuh’ Tunga Tung Siatna
Adam leh Eve’ mawhna hangin amaute khalam ah a si uh hi pah a, pumpi sihna zong thuak lai ding uh hi. A pianken uh mawhna tawh kidima, tua huna kipanin mihing tate khempeuh in mawhna sila suak uh hi. Mihingte’ pianzia a kikhelna leh a kiim a paam vua om nate a kikhelnate tham lo-in, tu-in Pasian in Adam mawhna khusaka, a suan a khakte khempeuh zong Adam’ mawhna hangin mawhnei-in ciamteh-in tavuan neisak hi.

Laisiangtho sungah kisuatna nam thum kigen hi: (1) A suan a khakte’ tungah Adam’ mawhna kisuan hi (Rom. 5:12-14); (2) Mihingte’ mawhna Khazih’ tungah kisuan hi (II Cor. 5:21); (3) A um mite’ tungah Pasian’ dikna kisuan hi (Piancil. 15:6; Late 32:2; Rom. 3:22; 4:3,8,21-25; II Cor.5:21; Philemon 17,18).

Mawhnate a pua Pa ahihna tawh mihingte’ mawhnate Khazih’ tungah a kisuat ciangin thukhen zuma thukhenna lim ahi hi. Jehovah Pasian in eite’ mawhna khempeuh Ama’ tungah suan hi (Isa. 53:5; John 1:29; I Pet. 2:24; 3:18). Tua mahbangin, thukhen zuma thukhen bangin Pasian in a um mite’ tungah a dikna hong suan hi (II Cor. 5:21); bang hang hiam cih leh diktaksak nading ahi a, Pasian in hong san theih nading ahi zongin lampi dang om lo hi. Hih kisuatna bel piansak thak sunga kizopna thak tawh kisai ahi hi. Khasiangtho baptaizna tungtawnin Topa tawh i kizop khit ciang leh (I Cor. 6:17; 12:13; II Cor. 5:17; Gal. 3:27) Ama’ pumpi sunga mite bangin Khazih tawh i kizop khit ciangin (Eph. 5:30), Ama’ pumpi nate ahi khin khempeuh in Khazih’ hihna bangbang a ngah pah ahi hi. Thu-ummi peuhmah “Khazih’ sungah” om a, Khazih’ hihna bangbang a tang pah ahi hi.

Tua mah tawh kibangin, “Adam’ sunga om “leitung pianngei-a piang khepeuh in piansak lui pana kingah khempeuh a tang hi pah hi. Adam’ pianken khempeuh nei uh a, Adam’ sungah a mawhsa uh ahi hi. Diktansakna i ngah theih nadinga Khazih’ sungah Pasian’ dikna hong kisuat bang lian mah-in Pasian’ thukhenna i thuak nadingin Adam’mawhna hanga mawhnei mi i hihna pen a hi taktak thu mah ahi hi. Adam bangin singgah ne-a i mawh i khialh pah se loh hangin Pasian’ thukhenna a kithuak ciat ding ahi hi.

Mihingte in Adam mawhna leh amaute kisai zenzen lo hi, ci-in a nial nop uh hangin, Adam pen mihing khempeuhte’ tanga ding a pianna pupi uh ahih manin, Adam in khatvei bek mawhna a na bawl khak zenzen pen a suan a khak khempeuhte; tungah thakhat thu-in kisuan pahliana, mi khempeuh’ tungah sihna thukhenna tung pha hi (Rom. 5:12-14). Tua mahbangin, Adam’ pukna hangin tua mawhna khat pen mawhna pianken bangin pa panin tapa’ tungah, a khang a khangin kiluah suksuk hi. Adam’ pukna hanga piang siatna tawh a kipelh thei kuamah om lo-a, mi khempeuh’ tungah tung hi; tua mahbangin Pasian in hong piak hehpihna zong mi khempeuh’ ading mah ahi hi.

Mihingte amau’ mawhna ciat hangin puk nawn lo uh hi; a puksa Adam’ tate banga piang uh ahi hi. Mawhna a bawl manun mawhnei mi a suak panpan uh hi lo hi; a pianken mahmah-un mawhnei mite ahih manun mawhna a bawlbawl uh hi zaw hi. Mawhna bawl dingin naupang khat hilh kul lo a, naupang khempeuh a hoih nading hanthot ding hi bek hi.

Adam’ pukna in mihing kici khempeuh tungah siatna a tut zenzen hangin bangmah thei nai lo naungekte leh lungsim kicing lote’ adingin Pasian in gelna khat nei hi, cih zong muh theih ding kisam hi.

Khazih’ sunga om lo mi khempeuh’ tungah Pasian’ thukhenna siangtho tung hi, bang hang hiam cih leh, (1) mawhna kisuan hi, (2) mawhna pianken kiluahsuk hi, (3) amahte mawhna nuai-ah om uh hi, (4) amau’ mawhna hang mahmah zong hi lai hi. Pasian’ thukhenna siangthote a kiphiat theih loh hangin, Khazih tungtawnin mawhnei mite in hotkhiatna ngah thei hi. Hih thu mah Lungdamna thupha ahi hi.

Piansak lui tunga tung mawhna dante bel (1) pumpi leh hinna kikhenna ahi pumpi sihna; (2) (Adam’ a mahbanga) tu laitak mahmah-a hotkhiatna ngah lo mi khempeuh’ dinmun ahi kha sihna hi a, Pasian leh mihingte’ hinna kha a kikhenna ahi hi (Eph. 2:1; 4:18,19); (3) A tawntunga Pasian tawh kikhenna leh a tawntunga Ama’ omna pana hawlkhiatna ahi tawntung sihna (Kilaak. 2:11; 20:6,14; 21:8) te ahi hi.

Dotna

• 1. Mawhna a piankhiatna leh mihingte’ sunga mawhna a kipatna Laisiangtho in bangci bangin gen ahi hiam?
• 2. Mihingte a mawh ma-in bangci omzia-in om uh ahi hiam?
• 3. Satan in bangci bangin Eve khem ahi hiam?
• 4. Bangci bangin Eve in Pasian’ khaamna gen khial ahi hiam?
• 5. Satan in bangci bangin Eve’ tungah zuau gena, Pasian’ kammal nial ahi hiam?
• 6. Satan in bangci bangin sia leh pha khentel theihna a deih huai lamin gen ahi hiam?
• 7. I John 2:16 in ze-etna nam thumte bangci-in hong hilh ahi hiam?
• 8. A mawh khit uh ciangin Adam leh Eve’ tungah bangteng tung ahi hiam?
• 9. Adam leh Eve a mawh khit uh ciangin Satan leh gulpi’ tungah bang thukhennateng tung ahi hiam?
• 10. Adam a mawh manin a suan a khakte’ tungah bangteng tung ahi hiam?
• 11. Laisiangtho sunga kigen “suatna” nam thumte gen in.
• 12. Bang hangin mihingte amau mahmah in mawhna a bawlna uh hangin mawhnei mi suak teekteek lo uh ahi hiam?
• 13. Bang hangin Khazih’ sunga om lo mite’ tungah Pasian’ thukhenna siangtho tung ahi hiam?
• 14. Piansak lui tunga tung mawhna dan bang ahi hiam?
• 15. Bang hangin a puk khinsa mite’ adinglam-etna pen Khazih’ sunga hotkhiatna bek mah hi se ahi hiam? Rev. Zam Khat Kham