Bang hang hiam?

Bang hang hiam?

Leitung i nuntak suangin lungkimna leh khamuan nading kici zongin hun le sum, ngal le tha bei liangin kithapai aa, mi tampi takte in lungnop suahtakna leh zalenna lunggulh in gaal le sa mai ah a khangno hun hoih khempeuh leh a nuntak na ngawn uh bei lawh liangin kipia khia uhhi. Ei deih leh ei gel bangin nakhempeuh hong tangtung pahpah lo aa, ki mawhsak na leh ki hawmthawh na, ki elna, ki hazatna, ki simmawh na, ki langneih na, ki gaalbawl na leh kikhen na te hong piang hi.

Bang hang hiam?

Hauh nopna in tawp tawlgak hun nei loa, theih nopna in mong neilo hi. Gilvahna in sauvei kikhom loa, gualnopna in tawmvei sung bek hi. A kicing zaw, a picing zaw, a taangzai zaw, a hoih zaw, a siam zaw, a nuam zaw, a pha zaw, a maan zaw, a thupi zaw, a sang zaw, huam zaw, a hat zaw cih bei ngei lo hi.

Bang hang hiam?

Ki phuahphat na, khangtoh na, nuntak khuasak kikhang khan na le sum zon pai zon olno tak a muh theih na, khamung tak a biakpiak theihna le maitai tak in sungtum pusuah theih na, tawldam tak a nek le tak zon theih na kilung gulh in nu le pa, pi le pu, u le nau, beh le phung, khua le tuai, lawm le gual nusia in mual zatam halna, tuipi gal khat dong ah kikhenthang in mite ki suknawn kito nawn in tawlngak hun cih omlo, sim le mar pan zolam ah, sak pan khang ah ping pei bangin ki peipei hi.

Bang hang hiam?

Kilem na, kipum khat na, ki thutuah na, ki panpih na, ki thapiak na, sepkhop na, thuakkhop na, ki it na, ki ngaih na, ki angvan na, ki laptoh na, ki ngekngaih na, ki lainat na, ki khual na te gen bel in kinei ciat aa, a hi zongin gen phat semsem kisam zaw kan lai hi.

Bang hang hiam?

A kisam mahmah thu khat om gige kha ding hi.
– Tuate a gamlapi ah na om khollo hi, gal etet se kei in.
– Tuate zon a muh theih hilo hi, kipan vet dah in.
– Tuate mite hong piak thei hilo hi, lam en vet kei in.

Leitungah a kikhel loding thu meilet nam thum om hil
1. A tawntung in taima tak in nasem inla citak le cin na khansung tawntung nuamsa in na beidong ngei kei ding hi.
2. Nang tung hong kibawl ding na deih bangin midang tetung bawl in, tua hi leh lungnop suahtakna na ngah ding hi.
3. A piang khempeuh, Topa tungah lungdam ko den in, a mah in nang ading a sia hong gelsak lo cih tel in.

Ciaptehding:

Na gelna khempeuh leh na vai khempeuh Topa ap in, tua hi leh a mah in na ma hong vang sak in hong daupai sak ding hi.
Tua hi leh Zogam hong paallun ding aa, Zomi gualtung vabang tuang ding hi.

Philipkhaipu