Kisik-kikna Nam Nih ~ Khat Thang

Kisik-kikna Nam Nih ~ Khat Thang

Na nuntakna-ah kisikna/nanglenang khial kisakna na-nei ngei hiam? Kisikna I cih ciangin hun beisa-a, I kampau gamtatna, I sep khak sepkhak loh thute tungtawn pan kiphawk thakna pen kisikna kici hi. Kisikna nam nih gen pak leng;

1. Eile-ei lungsim tawngah kisikin kua mahin hong muhpih theih loh kisikna,

Ei mimal khat bek hong sukha khialhnate hi-a, kibawl, kipuahphakik thei kisikna ahi hi. Gtn; I sum bawm mansuah leng ei-ma tumtakin lungkhamin, lawmlawm aw ee, koi-ah nusia kha? kiatsuah kha ka hia le? ci-in eile-ei kimawh sak hi hang. Tua bangdan khialhnate pen kipuahpha thei-in, midangte ading siatna apiang sak lo mimal kisikna thu khat ahi hi.

Ahizongin, mawtaw hawl khawng kisiamsak zalzalin nawh hawl gawp, accident tuakin khut bai, khe bai zenzen bang hi leh mi dangte a sukkhak sese loh hang nuntak tawntung ading akilakik thei nawn lo kisikna lianpi hong suak ding hi. Hi bang dan kisik theihnate aom lohna ding ei mimal ciat kidop theih kikhual theih ding kisam hi.

2. Aki-im thei lo akipuahkik thei lo khialhna hanga kisikna

Ei ma gamtatna hangin innkuan sung, pawlpi sung, minam sung, gam bup huam le leitung bup nangawn asukha thei khialhna pen ahih leh aki-im thei lo, akipuahkik thei lo, kisikna lianpi apiangsak thu ahi hi. Gtn, Bo Aung San kawlgam suahtakna ngahna ding-a makaipi pen U Saw in hong thah pen U Saw bek sukha lo-in tu ni dong Kawlgam bupin kisup lawh hi. Hi bangdan khialnate pen I kisik tulvei zongin kibawlpha thei lo khialhna ahi hi.

Tu hun, tulaitakin eite in zong computer screen mai-ah tu hithiat in, lai tuamtuam I at zelzul hi. E-mail groups, facebook zangin I hun tampi I bei hi. Lai hoih lai manpha evidence kician takin thu kikupna pen hoih mahmah napi, Tua bang hi lo a, I gup nop mi khat maan takei leh tanggup, thumaan pi khat lah mimal ettheih loh man bek tawh tang gensiat, pengpelep tungnung kituh cih danin, kam tungnung kiselnate tampitak I sim kha zel hi.

Atatakin hibang dan khialhnate pen tutadih I tel loh hang, I ta, I tute khangah na simkik dinguh a, I khang zomte in pil lawh lo-in, lungsim ginat lohna hong ngah lawh dinguh-a, I minam bup ading supna lianpi ahi ding hi.

Khangthakte lungtang sungah kigal neih ding cihte teng nawn lo zaw-a, kikhawl thei ding, nasem khawm ding, kilawmta ding, I kimlepam eite hangin anop zaw mun suaksak ding cihte kibul phuh toto ta hi.

Tua ahih leh eite in Zomi khang thakte bang thu hoih thupha I nusiat ding hiam? Akipuahkik thei lo kisikna apiang sak thei ding gamtat kampaute, nasep silbawlte khangnote lungsim sungah I vawh khak ding lauhuai kasa hi. Lungdam! Khat Thang