Azi in nitak annekding pia haklua ahih manin thautawh kaplum

Azi in nitak annekding pia haklua ahih manin thautawh kaplum

India, Uttar Pradesh State sung aom Ghaziabad khuasung ah papi khatin azi thautawh kaplum cihi. Akaplupna ahangpen azi in nitak annekding apiakdingpen ziakailua ahih manin thautawh akaplum cizen hi.

Thautawh kaplup athuak pen kum 55 aphakhin nupikhat hi a, akaplum apasal pen kum 60 aphakhin Ashok Kumar kici minnei khat ahihi. Nung Saturday nitaklam a innsung ah aom laitak un azi in nitak annekding piahatlua ahih manin apasal in thautawh akaplum ahihi.

Akaplup hunpen Saturday nitaklam 11:45pm hunpawl hi a, azingciang Sunday ni in apasal zong palik te’n mankhia pah uh cih Times of India pan kiza hi.

Azi pen thautawh akapkhit ciangin Sarvodaya Hospital ah amanlang in kipuakpah himahleh alu thautawh kapkha ahih manin zato panin siveve hi.

Sarvodaya Hospital panin Dr. Neeraj Garg in agenkhiatna ah azi pen zato hongtun ciangin akhutdawh beita, sikhinta hi ci’n genkhia hi.

Atate genkhiatna ah apa uhpen Saturday nitaklam 9pm hunpawl in zukhamsa in inn hongciah cihi. 11pm hunpawl ciangin anu in an piaksawm paklo ahih manin, kitawng uhhi.

Tuaciang in apa in thau manpah in, hong kaplumding hi’ng ci’n ngim in vou cihi. A innkuanpih dangte’n letsawm uh himahleh apa’n thautawh kaptakpi in anu uh alu ah kapkha in tuksukpah hi.

Nitak annekding apiakloh, aziakai zong hehmahmah in apasal in azi thautawh kaplum ngammawk cileng. Zan an apialo, apiak sawmlo, apiakding aziakai himawkleh bang acihtam???

Thau tawh kikaplum cihpen India gamsungbek ah hilo in, leitung gamtuamtuam ah akiza zelzel ngongtatna namkhat ahihi.

Ahi zongin India gamsungah alamdang kithahna namkhat om a, tuapen “Honour killings” kici hi. Innkuansung mindeisakding tanumei ahih keileh tapasal ginalo khatpeuh aom ciangin “Honour killings” ci’n thatlum mawk uhhi. Tuabangdan “Honour killings” pen India gamsung ah tammahmah kici hi.

More: USA Indianapolis ah Kawlgam Chin nupi khatin ata 36 vei sat

2014 kumin India gamsung ah “Honour killings” akigawm in Case 28 bek om himahleh nungkum in khanggawp cihi. Nungkumsung bekbek in India gamsung ah “Honour killings” akigawm in Case 284 om cimawk hi.

Al Jazeera te ii Report bawlna panin “Honour killings” atamlam ki mukhia a, abeisa hunsang in 800% bang khanggawp cihi. Tuabang in “Honour killings” atam phadiakna pen Uttar Pradesh sungah cisawnsawn hi. Sawltak #zomidaily