Australia sumtuh honkhat Melbourne khuasung ah kizel

Australia sumtuh honkhat Melbourne khuasung ah kizel

Australia, Melbourne khuasung ah sumtuh AU$100 honkhat ki thehthang, kizel kawikawi cih The Age te’n tuni Sunday (Mar 05) ni in genkhia uhhi. Tua sumtuh “Fake AU$100 Notes” tepen Restaurants, Pubs leh Shops tuamtuam ah kizang kawikawi cihi.

Hihbangdan in sumtuh abawlkhia, azangkhiazel pen adiakin migilo kipawlna Crime Syndicate te leh siahkhemte Tax Cheats te hiphadiak ci a, Federal Government inzong mipi lakah aki thehthangloh nading in matkhiattheih nadingin hanciam uh kici hi.

Hih sumtuh Fake Bills tepen nidangtawh kibanglo in Quality hoihsak mahmah uhhi. Ahi zongin muhpak theihding in akhialhna khat uh om a, tuapen sumtuh khempeuh avekin Serial Number ki bangsak uh cihi. Tua Serial Number akibang pen AI 13933231 ahihi.

Reserve Bank of Australia (RBA) te genkhiatna ah sumtuh pen $100 sangin $50 Notes te tamzaw cihi.

Khuasung mipi lakah $100 Note sangin $50 Note te ki limzatzaw ahih manin, sumtuh abawl leh azangte’nzong $50 Note te vive limzatzaw uh cihi.

Hih thuthang tungtawn in Australia Dollar tungah Serial Number AI 13933231 ih muhkhakleh kidop huai cih phawkni. ZD Sawltak #zomidaily