Zomi te’n Psalm 23 (Late 23) aphuakding hilehang
Late Nambat 23 pen Zomi atamzaw in za ngei bek hilo in theimahmah, lai mai lem loh, et loh in cisuak thei phial in kong umhi. Hih Late 23 pen David phuah kici aa, David in Topa kepna, cinna, dalna, vaakna, Topa amuanna te aphuah ahihi.
Topa pen Tuu bang aa kei hong cingpa hi aa
bangmah ka kisam kei dinghi.
Lono na ah kei mah hong lumsak a,
tui kiang ah kei hong paipih hi.
Ka nuntaknatha hong dimsak aa,
ama min athan nadingin,
thuman lampi ah kei hongkha hi.
Khua mial thukpi nangawn
kanawk hangin, kalau het keihi.
Bang hang hiam cihleh
kei tawh na hong omkhawm aa,
na molhtum leh na ciangkhut in,
kei hong lungmuang sakhi.
Ka galte omna mai ah,
kei’ ading an nong lui hi.
Ka lu sathau nong nilh aa,
ka hai adim let hi.
Hoihna leh hehpihna in
ka khan tawn tung in
kei hong zui taktak ding aa
Topa inn sung ah
ka om tawn tung dinghi.
Hoih mahmah, zaknuam mahmah leh telbaih mahmah hi. David in Topa ong it dan, ong vaak dan, ong cin, ong kep, ong dal dan, ong angvan dan, ong panpihdan cihte ih mitkha ah akilang baih ding, atelbaih mahmah dingin, tuu cing pa’ ii tuu a cin dantawh genteh suk ziau a simte adingin akitel deuh zong ahihi.
Hih la sungah thu thuk, akiseel khat om in tua in tuu cing naupangpa ii tuu cin dan ahihi. David in Topa itna hoihna, kepna,dalna apulaak ding ciang tuu cing naupang khat in atuu te acin, akep, adal, avaak tawh na genteh hi. Gentehna aa apiak tuu cing pa pen amah na hi gige aa, ama tuu cin lai aa tuute acin dan gentehna aa azang hipahhi.
Topa itna, kepna, dalna, vaakna te genteh nading a ngaihsut ciang adang bangmah mulo in, aneu lai aa ama’ tuu cin zia a mitkha ah kilo lian ahihman in, genteh nading azang ngam ahihi. Gentehna, tehpih ding zangngam ahihman in, David in a Pa’ tuute acin laitak bangzahta in citak kuhkal, deihsak, it hiam, cih, kimu thei hi. A Pa tuu te a cin laitak hici zaw leh cih om hetlo in it, deihsak, hehpih ahihna kimu theihi.
A tuu te a ding bangmah kisamlo zah in cing ahihlam gentehna in gen ngamhi. Tuute bangmah kisam sak hetlo hi hamtanghi..
A tuu te agilvah nading, gil kialpi ankhamlo pi aa tuu buuk aciahloh nading hanciam ahihlam kimu theihi. Lono na mun khempeuh ah cing kawikawi, zonsak kawikawi ahihlam kimu theihi.
Zankim khua mial ahiphial zongin a tuu te launa, linglawnna, humpi, kei vom, ngia te khut sung pan hu, gumkhia, vil, dal ahihlam zong kimu theihi.Ataktak in gamsa te pen, tuu bek hilo, acingte mahmah adingin zong lauhuai himah taleh, a tuu te bit nading ama mawhpuak hi ci-in ngaihsun ahihman in, ama’ pumpi khual zolo zahdong in, molhtum, ciangkhut vik ahihlam kilang sak mahmah hi. Tuu te lau huaina apia thei gamsa khutsung pan amolhtum leh a ciangkhut naak zat mahmah ahihi. Tuu te gilvah nading ahihnaak leh, alauhuai gamsa tampi om na mun nangawn ah, deihsakna tawh paipih veve in gamta sak hithiat ahihlam zong kician mahmah hi. Topa ong it, ongkep zia pen atuu cin lai tawh genteh ngam ahihman in, atuu cin laitak aa acihtak dan ding kimu theihi.
A tuu cin laitak in gina cinlo hileh gentehna in gen ngamlo dinghi.
Dr Tual Lian Tuang in, “Ko neu lai aa ka sakol cin dan bang uh hileh, sun thapaai sakol cing kaciah uhteh sakol tawh ciah hetlo mawk kahihman un, Topa in ka sakol cin bangun ong cing cih ngamding peuhmah ding hilo, tua bang aa Topa in ong cing cihding hileh, ih om lam zong ong theilo ding himawk” ci-in a Pa’ sakol a cin laitawh genteh hi.
Khai! Zomi u leh nau,
Pawlpi Siate Late 23 aphuak ding in kong cial deh!
“Topa in ka Pawlpite kakep bang aa kei ong keem pa hi” i ci ngam diam?
Kipawlna makaite Late 23 aphuak ding hilehang ee leh!
“Topa in hih kipawlna ka makaih bang aa kei hong makaih pa hi” i ci ngam diam? “HIh kipawlna kadeihsak bang aa kei hong deihsak pa hi, hih kipawlna aa ding kasep bang aa kei ading hong sepsak pa hi” i ci ngam diam? A cingam ding bangzah taktak i om hiam?
Khua sung hausa upa te ong kiphuaksak hileh ee!
“Topa pen, ka khua sung, ka tui sung thuman lampi ka totpih bang aa ong totpih, ong kalsuan pih hi” ci-in i phuak ngam diam?
Tuate gengen loh tate in hih Late 23 aphuak ding hilehang:
“Topa in bangmah a sem zo nawnlo, ka Nu teek ka Pa teek ka kep ka cin, ka vaak bang aa ongkem, ong cing, ong vaak pa hi” ci-in i phuak ngam diam? David in ganhing tuu a cin zia genteh nading a gen ngam laitak e’n, i pianna iNu teek, iPa teek kep zia gentehna in ih piak ngam kei leh, aban gen ngam huai nawnlo hi. Kei bang in aduh adeih uh cin zolo, pia zolo, tutpih, khawlpih zo lo, lungduaizolo kahihman in gentehna aa a pia ngamlo ding kahi pahhi.
Kumpi nasemte, company nasemte, pilna siamna sin sangnaupangte, i nasep, i silbawlna, kivaak nading i sum thalawhna, i pilna siamna sin nate ah pauban omhetlo, kisuang het keng ci-in gentehna in i pia ngam diam?
Innkuan sung makai Pa te in ee:
“Topa in ka inn kuan sung, ka zi ka ta tung kacihtak mah bang in kei tung aa ong citak, ong keem pa hi” i ci ngam diam?
Khangno te’n ee leh, “Topa in ka l;awmnu, kalawmpa, ka kingaihpihte tung kacihtak, ka thuman bang aa thuman, ong lunglenglo pahi” ici ngam beek diam?
Inn nupi te’n ee leh, “Topa in ka pasal tung aa kacihtak, kalung lenloh bang, ka teeknu kabawl bang aa ong bawl pa hi” i cingam diam, i cihtak pi hiam?
Zomi ulehnau in isep i bawl, ikampau, i gamtat na khempeuh ah Late 23 aphuakphuak dingin kingaihsut ding lunggulh huai kasa hi. Hih Late aphuak pa’n Topa in a tuu cin bangin cing leh adeih ngam ahihi. Gina cin mahmah kisa ahihman in a tuu te lungmuang sak ahihlam kician mahmahhi. Ka tuu cin bangin ong cinghi ci aa aphuah ngamna pen akiciam ngam hipah hi. Ei Zomi Thu-um akici te’n ei sep bangbang gentehna in i pia ngam diam?
Kuama sawl kullo, sawl zawhthu zong hilo, a nasepna, a maban ah kisuang hetlo, zulhtat hetlo ahihlam Topa tung akiciam ngam sitset himawkhi.
Adangdang gen nai het kei ni. Tuni in Zomi sung aa kipawlna tuamtuam makaite (social, political, thau tawi, thau tawilo) akua mapeuh in i minam ahi i Zo mipihte tung, “Topa in ka Zo mipihte ka it, kazuun, kakep, kacin, kadeihsak, kahehpih, kaneekngaih bang aa ong cing ong keem, ong deihsak, ong hehpih, ong neekngaih hi” ici ngam diam?
A ci ngam hetlo pi aa minam makai, kipawlna makai ding aa kithawi ihih mawk leh, tua tawh Zogam kilam hetlo kha dinghi. A ci ngam ding honkhat ka thei aa, aci ngam hetlo ding honkhat mah zong ka thei gige hi. “Topa in Zomite kipawlna ka makaih bangaa mindeihna, min dawkna, neektum ding peuh aa ong makaih ahihi” cih ding himawk leh, i vai kipelh peuhmah ding aa, i lam saulai peuhmah dinghi.
Makai nangawn in i cihngam kei leh i Zomi, i Zogam bel ahici lai ding mah himawk dinghi. I mipihte i makaih zia gentehna pia aa, Late 23, i phuah ngam kei ding leh, tuabang aphuak ngamlo makaite tawp lehang hilel loding hiam? Tuabang makaiite ong ki-iplah hetlo hi. I phuah ngam kei leh zong aphuak ngam dingin i lungsim kipuahpha dihni.
Hang Khan Lian
Block 640#11-59
Bedok Reservoir Rd
Singapore 410640
Comment piaknop aomleh...