Myanmar State/ Region Hluttaw a Majority zat vai ~ J. Thang Lian Pau

Myanmar State/ Region Hluttaw a Majority zat vai ~ J. Thang Lian Pau

Majority pen hluttaw amatt a lang sang tamzaw party (50%+) ten kumpi or cabinet (ministers) sep theihna genna hi.

Myanmar union kumpiah majority kizang cih pen i thei ciat hi. 2010 general election ah USDP majority cing, 2015 general election ah NLD majority cing. Union assembly in President teel. Teelcin President in Majority cing party sung pan cabinet seh or kumpi seemsak.

I telcian loh pen state or region ah majority kizang maw zang lo cih hi.

Myanmar Constitution 2008 ah state cabinet (Chief Minister, Ministers) pen President in kilawm a sak teng seh ding cih hi.

Kei ngaihsutna ah democracy gam, mipi teel amatt-te vaihawmna ah majority zat loh phamawh in thei ing. President in state cabinet ah mi kilawm a sak teng guang ding cihah majorty ngah or amatt hau pen party sung pan a teel ding hi le kilawm ka sa hi.

Zomi pawlkhat muhnaah majority le amatt hauh tawh kisai lo, President in a ut pepeuh guang thei hi, ci uh hi.

Hih thu a kitelcian theih lohna bulpi khat pen 2010 general ekection ah USDP party in koi peuhah majority ngah khin a, 2015 general election ah NLD cih loh majority ngah party a om loh man hi. Rakhine le Shan state ah NLD sang amatt hauzaw party dang om a, Chin state ah NLD in seat tam a ngah pen hang majority cing lo hi; ahi zongin kiho lemna tawh NLD makaih kumpi ding ciat veve hi. Hih thum lo tengah NLD in majority ngah khin hi.

Hih buaina pen 2020 general election teh kitelcian pan bek ding cih um ing. Bang hang cih leh NLD tu zaha a hat ding ka lamet loh man hi.

Union kumpi seem party hilo party dang peuh koi state or region ah majority cing ong om teh a paidan tak kician pan ding cihna.

Hih muhna nam nih pen Zomite ading diak poimawh mahmah hi. Politics sai i cih pen kumpi panmun letnopna hi diak a, amatt bang zah takin i hau zong union kumpi seem party i hih kei leh kumpi panmun kingah ngei lo ding ahih leh i politics saidan i khel kul ding a, minam or regional party tawh kalsuan nawn loin, union kumpi seem dinga i lamet national party bekah i om kul tuak hi.

Zomi ten politics a saina ah hih majority kaana poimawhzaw omlo cih theih ahih teh a paizia ding tak i kancian kul ding hi. Tua ahih manin constitution tawh kisai i buaina or i telcian lohte pen Myanmar Constitutional Tribunal ah i dot ding pelmawh a, Naypyidaw or Yangon a om Zomite in ong vaan thei le hoih peuhmah ding hi.

Zomi ten a hun tun ma-a i telcian kholh tam lo, zekai khit ta teh khua i phawk, i khasiat pelh hun ta.

Thukhunpi 2008 zuiin President in state cabinet guang ding cih lai tak i buaina.

a/ President in cabinet seh pah hi loin mi kilawm nominate masa, tua pen state hluttaw thukimna kul, tua khit president in appointment bawl.

b/President in thu kan masa loin a gal pan seh ziau lo ding. Majority cing party a omle tua sung pan mi kaikhawm masa ding. Majority sung pan hilo party dang khat mi CM in seh le tua pen mi kilawm hilo, phunna buaina tung ding.

c/President nominee teng state hluttaw thukimna kul (nial loh ding?), a zenzenin majorty cing party te deih het loh khat ong nominee le kinialna piang ding.

d/Amatt lakah minister post len ding mi kilawm a cin kei le amatt hilo misiam dang zong seh theih.

e/Majority kizatnapi dang khat pen hluttaw tutkhop vaihawmna ah, a tamzaw deihna kimang

f/Democracy gam president ciang pen mi lungsim picing hizaw hamtang a. A ut a nuamin mawk seh het lo ding.

India a state cabinet teng zong President taangin Governor ten appoint hi, ahi zong majorty cing party or amatt hau pen party or majority cin nang seemkhawm party sung pan select a ngeina hi. J. Thang Lian Pau