Anuam mahmah sivuina ~ Sia Do Khup

Anuam mahmah sivuina ~ Sia Do Khup

I pupate khang bel gen kei ni-in kei theih ciang hong gen nuam ing. Leitung bel a nuamlo semsem ahi diam ci ci ing. Nidangin “Sivuina hun nuam” cih bang kammal a om thei dingin ka ngaihsun ngei kei hi. Ahi zongin nidang a i sivuite a nuam mahmah nahi mawk hi.

KA PA KIVUINA

Ka Pa zong hunnuam takin kivui hi. Ka Pa Kham (Tun Kham) bang minsialin lei tuan ziahziah “Saipi, Zangsial, Sahang, Kamkei, Vompi, Ngaltang ka thah ka mat na masuan in” ci-in a thauka lawn dam keei hi.

Hun lem lua kisa a, ka tanute bang uh kisel un hehngawh pian sa a, hankuang zawn nading guapum tawh ka baang (kawmpek) a khawh uh leh vang zawzen, inn phel dong phop nuam nawn lo. Kei dah lua hai gawp mai ka hih ciang a hong kigiahpih zihziah hun lem lua himai. Lau leh kihtak om selo hi.

KA PUTE A SIH UH CIANG

Ka Pu Am Za Cin si kivui ding pen piangthak pawl teci pang kikhelkhel mawk khuamial ta, pianglui papi khat heh lua innsung lutna sangkil pan thau hong lawn “Na za uh hia? Khualmial ta ei” hong ci phei. Hun lem lua meilah de sa a kivui hit-hiat.

Ka Pi Ciin Khaw Ning si-in pialkhang a kisial pen ka Pu in ngai lua ahih cianga a gei ah lumin kawi, natna kilawh cihbang om sese lo.

TUHUN SIVUI DAN LAWMLAWM

Ka it mahmah ka Upi Langh Za Kap leh ka U Rev. Cin Za Mung si, na U in hong nusia a kicih khit phet a, kivui ta ei ci pah zawzen. Innteek thuzasakna om lai hun hileh ka Ute thu ka gen nop tam lua hiven.

Nidang sih ciangin a zian (sumbei bulpi) kingah kik hi. A nat sunga i khoina sum bei leh sihna tungtang a lengla dona teng sigalte hong tawi tengin din zo a, pawlkhat bangin a met tawh ngah zo lai uh hi.

More: Cikha zato pan nikhat sungin mi 3 in hong nusia

Tulai a sih bel a zian cii (sumbul leh zolo) lo mawk hi. Khakna la, phawkna lai, hehnepna, cihbang nangawn omlo, ka it mahmah U Sum (Rev. Cin Lian Sum) zato pan han lam zuan suak lawmlawm, mawtaw hawlpa kiangah “Han ciang va zui limlim in” ci pong.

LAMETNA TAWH I NUNGTA HI

Mai lamah Pasian in hunnuam hong pia kik ding a, tulaitak a i tuah khak thute, i Pa ten Japan gal thu hong genpih bangin i tu i tate kiangah i gen kik ngeingei ding hi. Sia Do Khup