Ankam bulnek cinzia tomkim (Carrot)

Ankam bulnek cinzia tomkim (Carrot)

October pan November kha sung ciin dingin gel ding hi. Ankam bulbawk te nisa hoihtak a ngahna mun ah hoih hi. Ahizongin ni liapzongh a hoih khom khat thuakzo hi. Akung kihalna letmat 6, a gualkihalna letmat 12 in ciing ding hi. Acre 1 a’ding khaici 2 kg bei ding hi. Ankam bulbawk cin nading lei vui sak mahmah leng hoih hi. A zungkhak nading munah suang omleh hoihlo hi. Suang te lakkhiatsak leng hoih hi.

A pobaih nading in akawt den, a nelden leitang deih hi. Nisa in a katgawploh nadingin ham khuh ding kisam hi. Leinip kei leh ankambulbawk menggawpthei hi. An kampinek te pen pi 1 val sangthei aa letmat 6 pan in temteh (kaihcih) tawh a pi a nalo dingin tan ding hi. Khut tawh tanlo ding hi.

Tui pen nipi kal khat letmat 1 bang pia ding hi. Ni 3 ah khat vei tui pia ding hi. Kiak pen bot khia ciatciat ding hi. Khaici tuh khit ciangin bawltawm ek leh, bawng ek, ak ek te pia ding hi.

Ankam bulbawk pen tuh zawh ni 90 pan ni 100 ah kila thei hi. A min ciangin la ding hi. A limci ankam bulbawk khol nadingin a kungleh a pi kikal pan kuaitan ding aa a pi tungaa ninte siangsak in keusak ding hi. Ankam bulbawk te bungkitan sungah sehnel koih ding hi. Tua sehnel te sungah koih in ki khol thei hi.

Adeih:

• 1. Leitangh nam – sehnel tawh kihel hawllei
• 2. Leitangh thukna alna –ph 6 – 7ph kikal
• 3. A lumna- 16
• 4. Ciin hun- October to November (khualum gamlam ah)
• 5. Ciin dan- Atang tuh in tuah nawnlo
• 6. Ciindan – a kung kihalna 6” leh a gual kihalna 12”.
• 7. Ek piakna- ngan ek acre 1 ah ton 5, mipee hawng arce 1 ah pound 80.
• 8. A kung puahdan- ni 3 ah 1 vei tui pia ding hi. Lakhawh zel ding aa lungno dal ding hi. Bawltawm lungno zaa te zangh ding hi.
• 9. A lakhun- cin zawh ni 90 pan ni 100 ah kila thei ta hi.

Ankambulnek leh cidamna

Ankambulnek pen cidam nadingin hoih mahmah hi.

1. Kaalthum sung manman in neden leng lungtangnatna dal zo hi Lungtang natna a piangsak cholesterol te kiamsak hi.

2. Sikhang kiamsak thei hi. Potassium dat tampi om hi.

3. Pumpi sungaa sikangte nasepna thahatsak hi. Vitamin C tampi kihel hi.

4. Gilpi angawina thahatsak mahmah hi. Gilpi sungah natna a pianloh nadingin huh hi.

5. Cancer natna dal hi. Kal (Lungs) cancer dal hi. Numei te a’dingin nawi cancer a pianloh nadingin tampi huh hi.

6. Mitkhua muhna thahatsak mahmah hi. Vitamin A dat tampi om hi.

7. Sikhum, zumkhum kiamsak hi. Vun hoihsak hi. Vun hong nosuaksak hi. Sam khangsak thei lai hi.

8. Naupaii nupi te in ne leh nawitui tampi neithei uh hi. Tua ahihmanin carrot pen anneksim in nekzawh ding thupi mahmah hi.

Hih ankampinek pen tuma kum 5000 laipek in kine khin hi ci in kiciamteh hi. Mihingbek hilo in ui in zongh duhthei mahmah hi. Afghanistan gam pan in hong kipan masa hi ci in kiciamteh hi. Siamsin Library