Amsterdam Airport sungah temtawi migilo khat palik te’n kaptuk

Amsterdam Airport sungah temtawi migilo khat palik te’n kaptuk

Netherlands gam ii Capital khuapi ahi Amsterdam vanlengtual sungah temtawi migilo khat palik te’n thautawh kaptuk uh cih AFP pan kiza hi. Friday ni in Dutch Military Police te’n Amsterdam Air Hub sungah akaptuk uh hi a, vanleng tualsungteng mipi patau in buaingeingai mahmah hi.

Police Spokesman khat ahi Dennis Muller in agenkhiatna ah tuni sunlampawl in pasal khat Schiphol aom Marechaussee Office (military police) sungah honglut hi. Tuapan in ka naseppih lawmte temtawh lauthawngsak hi ci’n genkhia hi.

Tuabang in mi lauthawngsak, nawngkaisak in aom ciangin ka naseppih lawmte’n thau lakhia in, tua temtawipa ii akhe kapsak uhhi. Tuapa pen akhe liam ahih manin, zato ah zatui kibawlding in kipuak hi ci’n genkhia hi.

Video: Man with knife shot at Amsterdam airport; suspect is known offender

Tua temtawi pasalpa pen kum 29 aphakhin, The Hague pan kicci a, Schiphol vengsung aom Marechaussee ah buaina apiangsak ngei tetawh kizopna nei kici hi.

Amsterdam Airport sungah nisim in alengkhia leh atung mi tultampi aomden hi a, hih thau kikapna hangin ki lauthawngman mahmah hi.

More: US uliankhat atunzawh asawtlo in Kabul International Airport thaupi tawh kikap

Fast Food Shop ah nasem khat ii genkhiatna ah tua temtawipa in temta pen akhuttawh lamto in, tuaciang in thautawh akikap kamu hi ci’n genkhia hi. Tem tawizaza in hihbang muhkhak pen lauhuai mahmah hi ci’n genkhia hi. Sawltak #zomidaily