Amau’ munciat ah thupi

Amau’ munciat ah thupi

Inn lamna ah architect leh engineerte in inn lamdan ding, ahoih leh ato ding, van zat ding leh sepdan ding thei mahmah napi supervisor leh foremante zah in nasep makaih siamlo deuhse hi.

Supervisor leh formante in nasep makaih vaihawm kiva mahmah, siam mahmah napi architect leh engineerte zah in technical knowledge neilo zel hi.

Inn hoih pipi a hoihpen leh mazang pen a a kisep theihna ding in a nih tuak un amau panmun ciat ah thupi mahmah uh hi.

Tuabang mah in nasep a siam, khutsiam trade specialist leh tuate a huh ding a thanuam a kizen nasem tampi kisam mahmah hi. Set leh vanzat tuamtuam a zangsiam mite’ panmun zong thupi mahmah hi. Hihte omlo in supervisor, foreman, architect, engineer vanholh liang a siam vive alom-atang a i koih hang na kisem thei tuanlo zel hi.

Tuaban ah hih nasep siamte Amun manlo ah a kikoih khak ciang nasep haksa mahmah veve lai hi. Amau’ munciat zo a, khut kilen a nasep khop siam ding kisam mahmah a, tuabang ahih theihna ding in athu a zeek a vaihawm ding mipil mitei manager hoih kisam hi.

Inn lamna mah bang in pilna siamna tuamtuam gawmkhawm a sep a-kisam nasepna, mapanna khempeuh ah tuabang mah ahi hi. Nakhempeuh khatbek in sem cihbang om theilo a, mi khatbek munkhempeuh ah siampen den cih bang zong om ngeilo hi.

Khat le khat ki thusim lohna leh kizahtak lohna in nasep haksa sak hi. Zogam Minam innpi lamna ah zong tuabang mah ahi hi.

Mi tampi tawh nasepna maban khempeuh ah a kihel mikhempeuh amau’ mun ciat ah thupi mahmah hi. Tua a thupi mite amau mun maan ciat ah koih a, a vaihawm thei ding Manager tuhun tukhang Zomite’ i kisap penpen ahi hi. Pau Khat Suan