Amanpha mahmah, aki mangngilh Nute ~ Jam Daniel

Nute’ Ni 2020 – Amanpha mahmah, aki mangngilh Nute ~ Jam Daniel

Nu khat hihna dinmun pen manpha mahmah a, haksa mahmah hi. Nu khat suah ding haksa lo napi in, nu’ dinmun taktak baih lo hi. Pasal nei numei khempeuh NU ci a sap theih ahih hangin nu khempeuh in NU’ dinmun lazo lo hi. Nute I cih pen alungdam masapen le adah masa pente ahi uhi. Tate en in innkuan sung dinmun tamveipi haksatakin khensatna anei dente ahi uhi.

Khatvei a tapa khat cina gim mahmah in om hi. Amau theihna tawh kikem le uh sum beilo dinga, ahizongin amaban sih na ding lauhuai dinmun ahihlam phawk uhi. Zato puak hileh ki-at (operation) loh phamawh dinga, sum tampi a beiban ah dam ding maw damlo ding aamahkhan omlo hi. Khensat ding hih thu nih dinmun ah omlian uhi. Zato puak ding lah sum neilo. Inn ah kikep ding lah patauhna hi kawikawi.

I theihpih loh hangin hun tampi I nute dinmun pen hih tawh kibang den hi. Haksa mahmah taleh khat zawzaw khensat loh a phamawh dinmun na tuak uh a, ei a tate hih ciang dinmun hong tun uh ahihi. Bangbang hileh sum ompah takeileh haksapipi in, zato puak uh a, ki-at sak uhi. Hun saupi a paikhit ciangin Pasian thupha tawh hong dam hi. Hih tapa a ki-at taktak ma in a nu’ lungtang ki-at khin ahihi. A tapa ki-at in sisan a luan mah bangin a nu’ lungtang ah ki-at zah mah bangin sisan a luan khit ciang zato puak in damna hong ngah ahihi.

Haksapi takin Jochebed’ khensatna

Egypt gam ah Hebru mite sal in a om sungun Pasian in thupha pia ahihmanin hong pung mahmah uhi. Tua hangin Egypt mite patau uh a Faro in thupiakna nei in, Hebru naungek suak numei ahihle hingkhawi unla, pasal ahihle that un ci-in thupiakna nei hi. Hebru mite in hih bang hun haksa cizekhuai dinmun na phukha uhi. Amau muhtangpi mah in a ta pasalte kithat ziahziah a, apaih mante uh Nile gun sungah ahing tangin zong lawn kha mai ding uhi.

Tua bang hunhaksat mahmah laitak in Moses zong naungek pasal khat ahihi. A NU min Jochebed hi a, Egypt galkapte thah na ding pan selcip dingin hong ngaihsun a kha thum sung sel zo hi. I nute hong kepna zong Moses’ nu Jochebed mah tawh kibang hi. Nisa khasa gilkial dangtak theihna pan hong selcip man un hih ciang dinmun hong tun uh ahihi. Jochebed (Moses’nu) in ahaksa mahmah khensatna a neihkhit ciang a tapa a’ ding Topa tawh a kizopna ahihi.

Suahtakna ding lawh phansak

Naungek kha thum hong cin ciangin selcip ding haksa sata ahihmanin Egypt galkapte thah zawzen sang’ ahaksa mahmah khensatna khat neihloh phamawh dingin ngaihsutna hong neita hi. It mahmah taleh inn sungah sel theih hinawnlo ahihmanin, pumpeng tawh kibawl lawh khat phansak a, tua lawh pen buanle kultal zut in tua sung ah naungek sial in Nile gun phaikungte lak ah koih hi. (Pai 2:3).

Anu mahmah in ama khut tawh atano suahtak na ding lawh phansaka tua sungah sial hi cih thu ahihi. Na pianna NU in ama thatang le ama khut mahmah tawh nasem in khut hambipbiap in nungak tangval hong suah a, zinei pasal nei thei ciang dinmun hong tun hi. Bangzah in hanciam in sumlepai na khak zongin na nu khut sung angei bangzo nawnlo ding hi. Ahizongin a khut pawnte kikhel thei nawn keimahleh limtak it-a na ho nakleh na nu lungkim hi.

Topa khephung ah thungetna tawh ngak hi. Anu in lawhbup sungah sial in Nile gunpang tuilak phai kawm ah koih hi. Hih mun pen a lauhuai mahmah dinmun ahihi.

Naungek omna gun sung hi a, tui sung ganhing awle a kipan lauhuai tuiganhing tampi om ding hi. Sun in nisa in kap ding a, sa mahmah taleh gum thuak ding hi. Huih nungin tuihual kihot le kilumlet ding a siziau thei ding dinmun ahihi. Gilkhial in kap ding a, kuaman an pialo ding hi.

Anu’anglum ngai mahmah dinga, ahizongin a nu in Egypt galkapte thah ding a lau manin kemngam nawnlo hi. Anu nawi gau mahmah dinga naungek in tep lo ding ahih manin nasa kawmkawm in nawitui luang ding hi. Tua bang hun in na NU lungsim puakzia ding nangaihsun ngei hiam?

Anu in atano omna mungam peuhmah lo ahihmanin naungek bangaci hiam cih a ensim (a ngak) dingin a sanggamnu (Mirriam) sawl hi.(Pai 2:4). Tua ahihleh Jochebed in bang hih hiam? Tua bang hun laitakin anu Topa khephung ah thungen lobuang a dang hihlo ding hi. Thungen in Pasian sep nalamdang (miracle) thungetna tawh ngak ahihi. Naungek tuah theih ding haksatna tampi zong ngaihsun ding a lungim mahmah ding hi. Anuntakna sungah khuamial pen hun zong hikha ding hi. Tua bang hun sunga Jochebed kahna khitui maltakte manpha mahmah ahihi.

A nu in a tapa gun sung ah akoih pen a ut masak hipeuhmah lo hi. Sihna le thah na ding pan a hotkhiat nop man ahihi. A nih tuak in a mulkimhuai mahmah dinmun ahihi. I nute’n bangzah ciangin hong it a tamveipi sih theihna dinmun pan lungsim na mahmah in khitui naptui luangkawm in hong honkhia uh ahihi.

Topa aw, ka kahna aw hong za in. Faro tanu le a nasemte Nile gun ah kisil dingin hong pai uh a, phaikungte lak ah lawh khat mu uhi. A la dingin a nasemte khat sawl a, lawh a honleh naungek khat kisial mu hi. Naungek kap in hehpihhuai sa mahmah hi. (Pai 2:5-6).

Jochebed lungsim tamkham in Pasian’ mai hong zonteh sih theih lauhuaina tampite pan suahtakna bek ngahlo a, naungek ii maban ding tampi tawh dawng hi. Na kahna aw Topa kiang ahihnakleh Topa’n hong za hi. Naungek kahna aw, Topa tung’ a nu kahna aw mah ahihi. Tuni’n Topa tung’ bang kahpih ding vai thupi na nei hiam? Topa tung’ kahpih ding lungkham haksatna thulian na nei hiam? Lungsim kitamzan a kahna aw Topa’n za hi. (Late 34:18).

Tamveipi na Nu kahna aw hangin hih ciang dinmun a tung na hihi. Faro tanu in nau min phuak a Moses ci hi. Banghang hiam cihleh “Tui sung panin amah ka kaikhia hi” ci hi. Naucing ding nasem numei khat zongsak a, naukem dingin Jochebed (Moses’ pianna nu) tektek mah kila hi. Khasum sang lai hi.

Pasian in na lianpi taktak a sep dingteh nakpitak mah a tapkhapna kal masa hi. Pasian in na nu kahna aw za in sih theihna Nile gun sung pan hong kikaikhia ahihi. Topa’n na nu kahna awte hong zak ciang hong bawlsia nuam, hong susia nuamte neihsa le hauhnate mah hong zeek sak hi. Halleluijah..

“Hebru naungek pasal khempeuh that un”, a cipa kumpi Faro inn sung pan Hebru naungek in mun hong la ta hi. A cing a kem dingin kizonga Hebru mi mah ahi, a pianna nu mah kila hi. Faro inn sung a tun tak ciang nuam mahmah ding ahih sam hang’ alampi totna khim bangin zinga lungkhamna le kahna khitui tampitak kihel hi cih phawk ding hi hang. Sihna tawh a kizakim lampi a nawk ahihi.

Kumpi inn sungah anu’ kepna hang mah tawh Moses hong khangto a, pilna siamna sangpi a neih ban ah minam bup khat ii makai dingin muanna hong ngah hi. Kum 400 val amite sila hihna Egypt gam pan pusuahpih zo a bawngnawi le khuaizu luanna gam dong ah lutsak zo hi.

Thukhupna: Tuni’n ah thukhupna ah a thupi pen I gennop bang hiam cihleh, a kiphawk khalo-a ki mangngilh Jochebed (Moses’Nu) ahihi. Tu hun in thu-um mite sungah Moses min a za ngeilo kuamah omlo phial ding hihang. Moses ii nuntakna sungah a nalamdang bawlte, a nasepnate le amipihte itna tawh amakaihna cihte a theilo tamlo ding hihang.

Tua ahihleh Moses’ nu min bang hiam? cih kidong leng a theilo, a za ngeilo tamzaw tham ding in ka um hi. Moses mikim in I theih hang’ anu kithei lo hi. Moses a minthan mahmah hang anu minthang lo hi. Moses in mihing tul zaguk val amakaih hang’ anu’n makaih kha lo hi.

Nang’ na pil mahmahna le na hauh mahmahna tawh na minthan hang’ na nu pil veva lo in hau venvan lo kha ding hi. Na nu in nangzah in pilna siamna a neih loh hang’ na nu’ hang na hihi.

I phawk ding thu in, hih ciang dinmun na om zawhna kuama hong theihpih loh na nu hang ahihi. Mite’n na NU hong theihpih kei zongin nang’ thei den in. (Mangngilh ngei kei in) Mite’n na NU thu hong dotsak ngei kei zongin nang’ thu dong tang tang in. (Thupi sim in)

Nu’ dinmun limtak in tavuan la a, sih theihna lianpi pan kepcihtakin kha thum sung kem a, ama pilna hanciamna teng a bei khit dongin atapa suahtak theih na ding lampi zonsak in, leitung bup ah Pasian’ mizat minthang zo ding khop in a tapa a pantah akimangngilh Jochebed-NUPI phawk ding hihang.

Na Nu hong donna, hong kepna, hong pantahna mangngilh ngeikei in. Amanpha mahmah na Nu phawk in.

“Amau’ behbehin a kisim Levi minamte: Gershon pan Gershon behte ahi uh hi; Kohath pan Kohath behte ahi uh hi; Merari pan Merari behte ahi uh hi. Amau’ suante: Libni behte, Hebron behte, Mahli behte, Mushi behte, le Korah behte ahi uh hi. Kohath pen Aram’ pa ahi hi.” GAMLAK VAKNA‬ ‭26:57-58‬

“Amram’ zi pen Levi sung pan Egypt gamah a suak ahi Levi’ tanu Jokhebed ahi hi. Tua nu in Amram tawh Aaron, Moses, le a sanggamnu uh Miriam nei hi.” GAMLAK VAKNA‬ ‭26:59‬ ‭

“Amram in ama pa’ sanggamnu Jokhebed zi-in la a, tua nu in amah tawh Aaron le Moses nei hi. Amram kum za le kum sawmthum le sagih nungta hi.” PAIKHIATNA‬ ‭6:20‬ Jam Daniel