Na pu in kong gennop ~ Dong Mung
Nitak lam nitum kuan khat in tangvalno nih deih phatak thu hong kinial ziahziah uh hi. Amau tawh kigamla hetlo tutna khat ah puteek khat tu-in amau kinialna thute a ngai hithiat hi.
Amaute kinialna thu ahih leh khat in “kei mi hampha pen hi’ng/Kei a pilpen hi’ng,” ci-in khat in “kei zong mi hampha pen hi’ng/ a pilpen hi’ng,” cih ahi hi.
A thu pai danteng puteekpa’n na ngai dide hi. Amau kinialna thu pen… Khatpa in… “Pawlpi sunga Siate, Makai upate le kipawlna tuamtuam(minam sung)a makaite thanemna le ginatlohnateng zongkhia, kankhia in, mawhsakna, hawmthawhna le gina a saklohna teng a gengen hi. Amah in mi thanemna pholak thei kisa mahmah ahih manin mipil ahihna ki-angtang sak mahmah hi. A khatpa leuleu ahih leh, “Siate, makaite thanemna le ginatzawhlohnate pen phunsan le hawmthawh hetlo in a siapen dinmun a tunpih ding ahiphial zongin makaite cih bangbang zui phot ding, amaute panpih theihna munmun ah panpih ding,” cih ahi hi.
Tua thu tawh tangvalno tegel pen nial cihtak hong kinial uh hi. Kinak nial lua uh ahih manin amau lawmta kitawng ding, kihehsan liang ding dinmun hong tun ciangin puteekpa zong om thei nawnlo ahih manin a tutna pan hong dingkhia in, amaute lam hong manawh phei hi.
Hong pai phei kawmin tangvalnote kiangah, “Bangci lualua liang na vua Bawite,” ci-in a dong hi. Tua leh khatpa’n zong, “Pu aw, ke’n makaite thanemna le ginatlohnate mukhia thei in, hici zawdeuh leh cih ka ngaihsutnate ka lawmpa kiangah ka gen a, ama’n hong sang theilo hi,” ci-in a gen hi.
Puteekpa in a khatpa kiangah, “Bangci dan e Bawi,” ci-in a dong hi. A khatpa in zong, “Pu aw, leitungah a bucing kuamah omlo hi, cihpen nang zong thei mahmah dingin hong lamen ing. Ka lawmpa’n bel i manam sunga makaite hitaleh, Pawlpi sunga makai Siate, Upate a hawmthawhna le gina a saklohna bekbek hong gen a, ke’n bel amaute i makai hi-a, i panpih zo kei zongin gensiat ding hikei…Pasian in eite makai dingin amaute a seh, a koih ahih manin thungetsak ni-in, a thanemnate vuah panpih ni… Ei innkuan sung buainate midangte kiangah mawk gengen dah ni…ci-in a hoihlam muhna tawh ka gen leh, mi hamsia pa hiteh hong ci vial a, nang sangin kei mi hampha zaw hi’ng…” ci-a kinial hive ung aw,” ci-in a gen hi.
Tua ciangin puteekpa in hibangin gen hi. “Bawite aw, kei zong pilna hun khop khat ka na nei ngei a, ka tuah ka thuak banah ka theihna tampitak mah na om ngei hi. Mi khempeuh phial ka na hawmthawh niloh a, kenlah bangmah ka sem nuam tuan kei hi. Ka neumuh mahmah mun khat peuhpeuh a Piadaa dana nasemte haksatna le gimna zong ka khualsak kha het kei hi. Kei le kei in hi kisa mahmah in ka awmpho lela in ka om phiauphiau lel hi.
Kei bel ka tuacih nading zong sum le pai ka lunghimawh kei a, lasak laphuah cileng lah ka hih thei lel a, laigelh hita taleh na khempeuh phial ah ka lemtang mahmah lel hi. Sum teeng khat teeng nih piak khiat nading hileh zong a pia masapen ka hi hi. Lawm le gualte neek le dawn zong ka taihzo den a, mite nuai ah ka om ngei kei hi. Tua hang mahin kei le kei zong mihing bangin ka kingaihsun kei a, Boss bangin ka kingaihsun den hi. Tua bangin mite huhna, panpihna tawh mi hamphapen hi-ing ci-in kei le kei ka kingaihsun hi. Tua hang mahin mi khempeuh hawmthawh in, kuamah thupi ka sak omlo hi.
Tua bangteng tawh ka hun tampitak hong bei toto ta a, tu-in keipen puteek hi-in kuamah in hong hopih nuam nawnlo hi. Bawite aw, leitungah mi hampha taktak icihte in mite manphatna theisiam in, mite thanemna zong telpih a, hawmthawhna le langpanna nei hetlo a, mite a panpih leh a huhdente ahi hi. Hibang kong cih ciangin telsiam zo kei kha nuteh…Na telsiam nadingun hong gen beh lai ning maw…Mite thanemna phawksak in, mite a gensiasiate pen amau lungsim sungah lungkimna om ngeilo ahih manin lungnuam takin sunmang gel theilo uh a, zanmang limci zong man ngeilo uh hi.
Ahi zongin mite thupitna le manphatnate theisiam in midangte tungah maitai takin a hopih thei, a thapia theite pen sunmang limci nono gel thei in, zanmang zong ahoihnono man zaw uh hi… Bawite aw…tampi hong genkha mawk ingin hong theisiam un…Na pu uh pen tu-in ka ni tum lam manawh hita hi…No na hih vualeh na ni uh sunkim zong tung nailo hi. Tua ahih manin ahoihlam ngaihsutna nei unla, midangte adingin kipuukna suangtum bang zaw loin, mite kahtoh zawh nading kahlei bangin kiniamkhiatna le ahoihlam muhna tawh nungta zaw un…
Bawite aw, leitungah bangbang a piang zongin ahoihlam ngaihsutna le muhna nei mite pen a nuntakna sunga vuah lungkiman le maitaina tawh kidim den uh ahi maw…. Tua ahih manin na omna pawlpi ading, na minam adingin thusia bekbek a genkhia den mi hihsawm kei unla, khantoh nading thu le late itna deihsakna tawh kamnem takin gen zaw un maw Bawite….Topa’n thupha hong pia tahen..” ci-in puteekpa in a paisan hi. Topa’n thupha hong pia tahen!! Nong it hong deihsak na pu, Dong Mung
Comment piaknop aomleh...