Amanpha Bible leh Science ~ Hau Za Cin

Amanpha Bible leh Science ~ Hau Za Cin

Mihing ngeina kicite adingin zong ni khat sung a science leh technology a khantohna pen kum nga sung sim khom pha ding hi. Pilna tua zah in khang hat, manlang mahmahta a, mihingte in tua khantohna pen kipuahphatna in zangin nuntakna a nopzawkna’ng, nek leh dawn ah a ki ningcin zawkna’ng leh sep leh bawl ah tawldamna a ngahna dingun zang ta uh hi. Hih bang pilna pen pawlpi (Church) leh taangmi (Society) adingin phattuamna tampi om hi. A taktak in ci le’ng science khantohna hangin Gospel puakkhiatna zong nakpi takin thahat tuam hi.

Pasian pilna namkim hong piapa hi a, mihingte in Pasian thu thuk itheihtheihna tem ah zong Pasian hong piak mah ahi hi. I pilna te mihing te adingin siatna lauhuai pen hi mahleh Pasian kiang pan hong pai pilna ahi hi. Mi khat in pilna a sin leh tua pilna tungtawnin Pasian aw a za ahi hi. Mi khat in leitung pianzia a sin leh tua mah tungtawn in Pasian aw a za, a ngai, a thei leh a tel mi ahi hi. Banghang hiam cih leh science ahih kei leh pilna pen Pasian aw, Pasian kam, leitung ah a kizaktheihna lampi ahi hi.

Ahi zongin science pilna pen a hoih lam leh a sia lam in piang thei a, kizang khial thei, hong puahpha thei hi. Mi khat in buangnai lam siamna nei hileh a hoih lamin zang thei a, a sia lamin zong bomb bawlna khawngin zang thei hi. A hoih lamin zang hileh mihingte nuntakna a nuam sak leh metna tampi a piangsak thei hinapi bomb banga a hong kizat ciangin mihing tampi nuntakna susia thei hong suak leuleu hi. Tua bang ahih manin science in bangci zat dinga, koi lam ah zang ding cih ciangtanna neilo hi. Ahih leh tua bang ciangtanna tua pilna in neilo hitamawk leh kuan ciangtan kula, kuan hong vaihawmsak kul ding hiam?

Mihing pilna pen mihing thupina in a uk kul ding hi. Hih lai ah Lai Siangtho in na lamdangpi khat hong theisak hi. Mihingte pilna sangpen dong ahong hilh a, mihing sia leh pha theihna leh kha leh pumpi manphatna dong in Pasian vangliatna tawh a hong hilh hi. Tua hi a, Lai Siangtho pen a zang mite adingin, “Khantawn nuntakna lamlak” hong suak hi. Mipil misiamte adingin zong nuntakna leh pilna lamlak ahi hi.

Science (mihingzontawm pilna) pen Pasian in leitung nate tungtawna hong hopihna leh hong kamgenna hita leh Lai Siangtho pen muh theih teekteek sim theih teekteek dinga laimal tawh hong hopihna hi leuleu ding hi. Pasian pen na khempeuh a gelpa kici hi. Scientist cingzo takatk lote in thukanmi te gensia ding uh a, tua mah bangin Lai Siangtho thu (theology) kan cian zo taktak lo mite in science pilna pen gensia thei ding uh hi. Ahi zongin science leh Theology pen kikhen thei hilo a, a kituaklo zong hilo in, a ki bucingsak tuah hizaw uh hi. Pasian thu kanna (theology) omlo in science a picin zawhloh mah bangin science lo in theology zong a picing zo kei hi. Thau bang hileh a vui leh a tang bang hi uh hi. Paih zawk ding omlo.

Tua hi a, pilna a sang deudeuh ciangin, mi a pil deuhdeuh ciangin Pasian om hi cih tel deuhdeuh uh hi. Hau Za Cin Ni 21.2.1992 Laithaini PS: Ka khut tawh ka gelh tangtang article te computer tawh kong khenkhia kik hi.