News In Brief: Thuthak tomkim ~ The Tedim Post (11 Sep)
Chin State, Paletwa Township sungah Municipal Vuanzi U Soe Htet zuih gunkuang September 9, 2020 ni-in AA mualmi thautawi kipawlna ten kap uh a, aliam/a bai kua mah om lo hi, cih thu kiza hi.
COVID-19 natna ngah atam kik luatna hangin Mandalay Division ah mipua line car khempeuh September 10, 2020 zan 12:00AM sat khit akipan in kikhawl sak phot ding hi, ci-in thunei U Aung Kyaw Lin in gen hi.
A 53 veina Asean (Gam 10) Meeting September 9 ni-in Video Conference kibawl hi, cih thu kiza hi. Asean gam 10 ah Brunei, Cambodia, Indonesia, Malaysia, Lao, Myanmar, Philippine, Singapore, Thai leh Vietnam cihte ahi uh hi.
Rakhine State ah internet 4G angah kik theihna dingin Mandalay sangnaupang kipawlna pan mimal 15 in September 10, 2020 ni-in Mandalay khuapi ah lungphona nei uh hi, cih thu kiza hi.
COVID-19 natna ngah hong tam kikna hangin Gamsung a aleng vanleng line tuamtuamte September 11-30, 2020 dong tawlnga phot ding hi, cih thu kiza hi.
September 10, 2020 ni nitak nai 8:00PM hun Myanmar gambup natna kisit 2047 lakah natna nei 142 ki muhbeh a, tulaitak natna ngah 2150, zato tuak 625, a si 14 phata hi.
USA President Donald Trump in Nobel Peace Prize ngah ding kiteelna min list ah kihel hi, cih thu kiza hi. Donald Trump pen 2018 in zong khatvei Nobel Peace Prize ngah ding teelna min list sungah amin kihel ngei khin hi.
More: Makai Nehemiah leh Zogam ~ Pau Do Lian
September 10, 2020 ni Leitung bupah Covid-19 natna ngah Tein 270 val(27,925,613), asi Tein 9 val (905,089) leh adam kik Tein 180 val (18,818,085) phata hi. Source : 7day news, , Eleven Media, The Myanmar Times. Thukai khawm : Lia Lu Lun, Lia Shang Shang.
Comment piaknop aomleh...