Adoniriam Judson Tangthu

Adoniriam Judson Tangthu – by Sia Thang Khan Dal

Thu masa:-Adoniriam Judson tang thu pen a kim in a ki at ciangin laibupi khat bang a suak zo hi-in Article a dingin ih tom kaih mahmah kul a, a ki piak khiatna,a sep khiatna leh a thuakna tawm khat ciat a ki hel thei dingin han ciam in kong pulak nuam hi.

Adoniriam Judson pian khiat na leh pilna zon na:Judson ii pianna pa Adoniriam hi a,Yale graduate hi-in Tuitheh (Congregationist) pawlpi kem sia khat ahihi.Malden khua ah pastor dingin a kisapma ciang dong Massachusetts gam khen ah vakkawn sia sem hi.1786 kumin Rhode Island gam khen Tiverton khua mi Abigall Brown tawh kiteng in tua kum mah in Malden khua ah pastor ding in kisam hi.A mau tapa nih Adoniriam Judson,Elnathan le tanu nih Abigail,Mary te nei uh a Mary pen a pian kum mah in sipah hi.

Judson pen America gam Massachusetts gam khen Malden khua ah August 9,1788 ni-in suak hi.Kum 3 a phak in laisingtho a tang buppi bangin lot ngah zo a hih man in a pate lung dam sak mahmah hi.Kum 12 a phak ciangin Greek lai leh Latin lai a lawm te hilh thei ta hi.Ganan thu haksa kidot na siam mahmah hi.Judson pen a pa in a gol ciangin mi thupi khat suak ding hi ci niloh hi.August 17,1804 kum in Province college(tu-in Brown university ki ci)ah sang kah a, September 2,1807 kum in B.A.degree ngah in,a sang pan pah tawi na leh thu gen na zong ngah hi.

A sang man phet in Plymouth independent Academy private sang khat hongin elements of English Grammar leh The young lady’s Arithmetic laibu hong gelh khia pah hi.Brown University ah sang sia sep nading piak nalai ngah hi.Rev.Dr.Griffin in zong Boston a pawlpi lian penpen ah, a mah tawh sem khawm ding in kam khapna pia hi.A nu in zong inn tawh ki nai thei pen a hih man sem in a cih ciangin sem kei ning Boston ah teng ngei lo ding hing a gam la zaw ah pai ding hing cin dawng hi.

Pasian nasepna ah ki piak khiatna.Province college ah sang a kah pih Pasian um lo (Atheist) Jacob Eames tawh kilim thuah lua kha a hih man in Judson in zong Pasian thu hong um lo mawk hi.Sang a man khit ciangin sak lam gam kan tan in Albany ah Robert Fulton ii tuihu zang in a bawl set en kawm ding leh Sheffield,Conn a pu kiangah hawh ding in August 9,1808 ni-in sakol tuangin hong zin khia hi.Ni khat zin tun na inn khat ah a giah leh na lua veh aw na lua veh kei a si ding hi tang ci-in a tau ngaungau khat za in, zing sang a thawh ciangin a dot leh a college kah lai a, a lawm pa Jacob Eames na hi mawk in lam dang salua in a dip van a khai hong bang hi.

Pasian om hi cih a lungsim sungah phawk na ciang khat hong nei pah hi.Thamlo in Pasian thu lung gulhna hong nei ahih man in Andover Newton theological seminary ah sang hong kah kik hi.Hih sang ah a kah sungin India gam East India company a chaplain a sem Dr.Claudius Buchanan ii Ni Suah na Aksi(The Star in the east)cih Matt 2:2 siksan in thuhilhna zakha ahih manin mission nasep ding lawppi-in hong lawp pah hi.Tua thu hilh na sungah India gam a German sang mang Dr.Schwartz ii mission nasep na tampi tak ki hel kha hi. Tua ahih man in a lawmte SamuelNott, Samuel J.Mills, Samuel Newell leh Williams college pan in James Richard, Ruther Rice te tawh lopa keu, buhtu lomhen tun khop bangin (Hay stack Prayer Meeting) khuk din in thungen khawm zelzel uh hi.

Tua hi a December 2,1808 ni-in kiniam khiat tak in Pasian tungah ka nuntakna ka ki ap hi ci-in teci pang uh hi.1810 kum ciangin mission sep theih ding lung gulh luat na tawh England aa,London Missionary Society te huh ding lam et na in Packet kici tembaw tawh England hong pai hi.Tua hun lai tak in England leh Piantit te gal kido lai tak ahih manin Piantit te in na man kha in,Bayonne cih na munah kal 6 sung bang thong va kia tadih uh hi.England gam a tun ciangin a thusun uh na sang sam uh hi.America hong tun kik ciangin thu om zia a gen leh a tawpna ah American Board of Commissioners for Foreign Mission of Congregrational Church in nisuah na Asia gamah Sang mang sem dingin Judson, Samuel Newell, Samuel Nott leh Gordon Hall te sang uhhi.

Tua zawh a sawt lo-in Judson pen Hasseltine tawh February 5,1812 ni-in kiteng uh a,a zing ciang February 6,1812 ni-in siampi za ki pia pah hi.Ann Hasseltine pen unau numei li lak ah a tum pen hi a, a unute Abby, Mary leh Rebecca a hihi. Tua hun in Suez canal zong ki hong ta a hih man in India gam pai nading Mediteranean tuipi tawn ding maw ahih kei leh San Francisco pan Yokohama tawn ding cih lam nih om hi.A kiten zawh uh kal nih khit ciangin Caravan tembawpi tawh Salem pan in hong ding khia uh hi.

Tembaw tungah laisiangtho hong simsim leh Tuiphum na tawh kisai-in thu muh thak khat hong nei a,tuiphum ciangin tuisungah kiphum tektek ding cih Tuiphum te zat dan dik hongsa mahmah hi.India ah a minthang missionary a sem Mangkang Tuiphum sia Carey,Marshman leh ward tawh kimu ding cih lam en hi. June 17,1812 ni-in Calcutta hong tung uh hi.Matt 28:19-20 bul phuh in Zeisu thupiak a man na in September 6,1812 ni-in a nupa un Rev. William Carey a huhpa Rev.William Ward in tuiphum na pia hi. India gam a tun ma uh a zan ni-in England leh America gal kido uh ahih man in England te gamke India gamah Judson te om theih nading thungah lo uh hi.

Ciah kik ding lah ngaih sun theilo uh ahih man in Piantit te tuikulh(Isle of France)Maurittius ah kha li sung bang gal tai ta dih uh hi.Sang mang nasem dingin a pai khiat pih uh Samuel Newell te nupa Mauritius na tung masa uh hi.Judson te nupa a tun ma diak un Samuel Newell ii zi Harriet Newell in sih san ahih man America gam pan sang mang dingin a kuan khia te lak ah a luang tawh khaici a tuh masa pen nu a hihi. A lawm pa tung a sih vai khak na ah ka it mahmah ka nu na gen sak in, Harriet in bang zah tak in hong phawk a, hong ngai a hi hiam, Pasian na mit suan hen la, na pom tawn tung hen, ka sang gam te kiangah na koh sak in sih ding bek ngak a om a sang gam nu in leitung ah biakna lo buang bang dang mahmah a thupi zaw om peuh mah lo hi, Christ a dingin ka pian na nu le pa, khua le tui, gam le lei nusia in nisuah na lam ah kapai kisik het keng na cih sak in a cih khit phet in a mitsi-in Harriet Newell in leitung nusia ta hi.

Judson te nupa a ma suan uh bing bikbek ahih man in a tawp na ah Malaysia gam Pulo Penang (Prince of Wales Island, lying in the straits of Malacca) ah mission sem dingin hong khen sat uh a, May 7, 1813 ni-in Coutess of Harcourt a kici tembaw tawh hong ding khia uh in,June 4,1813 ni-in Madras hong tung uh hi.A mau te England aki puak kik dinguh patau mahmah uh hi.Tembaw khawl na ah tua hun lai tak Pulo Penang pai ding tembaw lah om hetlo-in Yangon pai ding Georgiana tembaw tawh June kha 22,1813 ni-in hong ding khia uhhi.Yangon July 13, 1813 ni-in hong tung uh hi.Judson te Kawl gam hong tun ni phawk na in Kawlgam Tuiphum Pawl pi in kum sim in July kha nipi kal nih na Judson nipi in zang uh hi.

Pasian thu gen hong kipat khiat na:-Judson Kawlgam hong tun ciangin thu a hilh theih nadingin Kawl pau leh Kawl lai kha 6 sung bang Ava ah Hindu siampi a sem ngei khat kiang ah nasia tak in kawl lai hong sin masa hi.Judson in Hebrew,Greek leh Latin lai te zong a siam mahmah khin hi a,kum 3 bang a sawt khit ciangin Kawl pau leh Kawl lai pen Kawl mipil lai thei te zah mah bangin hong siam hong thei hi.Kawl lai pen hih tan vei hong sin na in European lai tawh lai gualh zia ki bang lo a hih man a hihi. Kawllai a sin kawm mah in lailekkhiat tawh hong thuah pah a 1817 ciangin laimai 7 apha Khristian biakna thu (A view of the Christian Religion) cih lai hawm khia zo pah hi.

Tua bangin lai lam nasep na hong pan toto a,thuciam thak buppi July 12,1823 ni-in zo siang a,December 19,1823 ni-in a khet zo hi.Laisiangthobuppi January 31,1834 ni-in a tei zo in December 29,1835 ni-in laisiangtho buppi sim theih in kingah ta hi.Thamlo in Manglai-Kawllai Tongdot bu July 1834 kumin zo siang hi.Lai tawh nasep pen ei tun zawh loh na ah ei tangin Pasian thu a va gengen ahih lam Judson in a tel man leh khristian biakna a zung kip theih nading ngimna lianpi tawh lai nasep a kipan ahihi.Ava ah Judson a thong kiatna thu te,German lai-in a kigelh Turkey gamah Judah mi pawl khat in na sim kha in a pian thak lawh uh pen a nuntak na sungah Judson a lung dam mahmah na khat a hihi.

Judson in Hot khiat na thu a tangko theih nadingin tu lai tak a shwedagon tattung kilam na gei ah sawlbuk(Zayat)khat kawlte lam zia in lam a,tua lai ah khualzin gamvak te niangphan tawh zindo in a masa pen April 4, 1819 ni-in Pasian thugen ki pan thei hi.Kum 6 sung bang na hong sep khit June 29, 1819 ni- in Maung Naw kici sing nasem mual tung mi khat a tuiphum masak pen ahihi.Tua khit ciangin nga beng mi Tha Hla leh a lawm te pawl khat tuiphum na pia hi.Kawl kumpi Bagyidaw kiangah pai in Kawl lai siangtho leh a lai hawm laibu no te letsong in pia hi. Kumpipa in gual nih gual thum khawng sim in lei lak ah paih sak hi.Kawl gam ah Pasian thu gen theih na ding phal na ngen a,ngah lo hi.Tua thu hang in Pasian thu tang ko nading zia kai tuam mahmah hi.Yangon ah a ki tuiphum sa mi (10) bang tawh pawlpi phut hi.

Judson ii Pasian nasep na tung a phut khak nuntakna..(1824-1826) kum in Mang kang te leh Kawl te gal ki do uh a Kawl gam nuai lam teng Mang kang ten la uh hi.June 8,1824 ni-in Judson leh Dr.Price,Mangkang te thum,Greek mi khat a mau teng kawl kumpi-in man in Ava thong ah khia uh hi.Judson a mat un a zi mai ah sawn sui gawp tal kaih uh hi.Kawl kumpi in a tel khialh theih na dingin Bengal pan in America te in huh nading mission sum a puak ciang un Mr.Gouger kici Mangkang pa tung tawn in puak uh ahih man in Mangkang te tawh kigul luk dingin up mawh na nei uh hi.Ava thong pen cik ziat loh na thong Let-ma-yoon (Hand Shrink not) ci a minthang a hihi.

Tua thong inn pen adung pi40 a vai pi30,asan na pi 5 ahih keh pi 6 bang hi-in a tung ken bilbel a,kawm peek kikal vang neu nengneng longal huih lut nading om lo hi.Thong sungah mi 100 kim bang pasal numei kikhen lo in ki kawih khawm lel hi.Nitak sim in thong cing te in thong kia te ngawng tan na ding tem ta tat ging za den uh hi.Nisim in zampi khat kitum in a sau vei lo-in kong ki hongin mi khat ta kisam khia a kong hong ki khak kik tak ciangin kei tu ni hing lai ing ei ci in khui sa ngiam uh hi.Tua thong sung a om te kei ni kei hun ding bang hun a tam ci a ngak uh ahihi.Judson thong a kiat sung in azi in laisiang tho a tei bangte lukham tawh hual khawm in puak sim zel hi.

A pasal suah tak na ding Kawl Ulian te kiangah hawh koikoi in golh guk pia koikoi hi.A thong kiat sungin a tanu Maria Elizabeth piang in azi nau suah tawh a pasal thong kia a phak nop na tawh gen theih na nam kim thuak uh hi.Ava thongah kha 11 sung om in kha kua sung sik kol kop thum in ki khih a,kha nih sung kop nga tawh ki khih hi. Ava thong pan in tai 10 gam lat na Aungpenle thong ah a ki puak ciangin nisa lak sehnel sa tung ah a khe guak un pai sak uh a, a lawm te Greek pa bang gim lua in lam pi ah si hi. Judson zong a khe pol gawp in siluang gawp a, a lawm te khat in puan sia tawh tun sak hi.

Judson in a lung sim na a sak penpen a zi in Aungpenle mun thei lo in bawng leng cialin a ta ngekpi tawh leivui kai nisa vengvang nuai ah a pai tantan pen khasiat mahmah hi.February 24,1826 ni-in Mangkang leh Kawl kilem na Yan-ta bo thuciam na ah kam phen dingin Judson kisam hi.A man ciangin Judson te nupa leh a tano Maria tawh Mangkang te thau pua tem baw zui in Yangon hong ciah kik uh hi.A ma om loh sungin a phuhsa pawl pi na bei hi. Tua ban ah Yangon ah sahang tamlua in lang a, ganhing bek hi lo mihing na ngawn a tuahtuah ciang Yangkong ah om ngam non lo uh in, Mawlamyiang ah 1826 kum mah in ki khin uh hi.Mangkang kumpi-in Kawl kumpi tawh sum lei sum zuak na neih ding thu kim na a bawl nop uh ciangin mangpi Mr.Crowford in Judson zawn in Ava ah September 30,1826 ni-in tung uh hi.

Ava ah kha nih leh a lang val bang a tam sung in a zi ci na gim mahmah in a na sem nu kiangah Sia pa hong tung haksi e,ka tanu lim tak na khoi sak in cin vai khak in October 24,1826 ni-in,a nuntak kum 37 in Ann Judson si hi.Judson Amherst ah January 24,1827 ni-in a tun kik ciangin a pawlpi ten na dawn in na kah ngeingai uh hi.A zi na om non lo ban kum 75 a pha, a zah tak huai a it mahmah a pa November 26,1826 ni-in si cih za hi. A ta nu Maria zong a sau vei lo in si sawnsawn hi.Nuntak na haksa sa lua mahmah a hih man in Mawlamyiang (Kyaiatkhami) gam ah kha 6 sung bang gam lak ah a mah guak tol om in an ki puak a,a lung sim ci na ngei hi.A lung gim lua a hih man in pi 3 a zai, pi 6 a sau dum to in tua sungah a sisa bangin amah leh amah kisial ngei hi.

Judson ii phut khak inn kuan nuntakna leh a hun nunung.Ann Judson tawh a neih tapa Roger Williams(1815-16) si a,a tanu Maria Elizabeth (1825-27) si hi.Judson Kawlkumpipa kiangah a pai kalin a zi Ann Judson pen Armherst ah October 24,1826 ni-in si hi.A zi si in meigongin a om lai tak in,Karen te lak ah sangmang a sem masa pen George Dana Board si-in azi Sarah Board hong mei gong hi.A mau meigong tuak April 10,1834 ni-in kiteng uh hi.Sarah board tawh tanu Abby Ann leh tapa Adoniriam Brown, Elnathan, Henry, Charles leh Eward te nei uh hi.Henry pen kum 1 leh kha 7 in si hi.Sarah hong dam loh ciang zato siam zuan dingin tembaw tawh America ciah ding in hong ding khia uh hi.Lam kal St.Helena tuikulh(koko tui kulh) a tun uh December 1, 1845 ni-in Sarah Board in sih san leuleu hi.

A mah America pai suak hi.Judson Kawlgam a pai kik ma deuh June 2,1846 ni-in Emily Chubbuck tawh kiteng hi. A tate thum Adoniriam Brown,Elnathan leh a ta nu Abby te in Kawl gam ah zui kik nawn lo uh hi.Judson te nupa America pan in Kawl gam zuan kik ding in hong pai uh a St. Helena tuikulh hong tun ciangun,Judson lung sim sungah a zi Sarah Board in nang kei guak hong nusia mawk maw hong ci tam cin ngaih sun hi.

A hi zong hong hopih thei taktak hi leh ih sep ban na nupa un hanciam in va sem un hong ci zaw in teh ci in amah leh a mah ki heh nem hi. Emily tawh ta Emily Frances leh Charlie nei uh a, Charlie suak tung in si hi.Judson a dam loh ciangin Siavuan te sawl na tawh America ah kibawl dingin Tembaw tawh hong zin khia hi.India tuipi tung ah April 12,1850 ni-in a nuntak nunung pen husangin sita hi.Judson ii han pen Indian tuipi sung N. latitude 13ံ leh E. longitude 93ံ hong hi mawk hi. Azi a tate Kawl gam pan a sau vei lo-in America gam ciah uh hi.Judson zi Emily zong America a tun kik khit uh a sau vei lo June 1,1854 ni-in si hi.Adoniriam Judson phawk na mual suang hi bang in ki gelh hi.

• In Memoriam-Rev.Adoniriam Judson.
• Born Aug 9,1788,Died April 12,1850.
• Malden,his Birth place,The Ocean his sepulchre,
• Converted Burman and The Burman Bible his monument,
• His record is on high.

Thu khupna:-Judson nuntak na tung tawn in a phawk huai pawl khat kimu thei hi.Ih muh na dan ki bang lo thei hi mah ta leh ih nuntak na sungah phawk huai pawl khat pulak nuam ka hihi.Pa te ii thu pha piak muh kholh na tang tung thei pha mahmah cih ki mu thei hi. Ki kholhpih hoih lo in lam hong khial sak thei a hih mah bang in ki kholh pih hoih in lam man hong zuih pih thei hi. Kikholhpih sit teel huai kha ding hi.Pasian nasep na pen abaih a nop hithiat lampi (kawl ten-paak kiphah lampi) tot na hilo ahih na zong ih mu thei hi. Pasian nasep nading lungsim takpi tawh kipia te ki sik ngeilo uh hi.Judson nasep na tung tawn in lai thu pit na zong ki mu thei hi.Lai tawh nasep na in mui bun pen ban ah sauvei kimang pen hi.Topan a sim kha khem peuh hong gup khiat na thupha tawh hong phung vuh ciat hen, Amen. By Thang Khan Dal