Pu Suum Do Thang (Biography)

Pu Suum Do Thang (Biography)

I. Pu Suum Do Thang pen Pu Suan Khaw Gin leh Pi Ciang Khaw Zen te sung pan May 7, 1945 ni in Zampi khua ah suak hi. Zampi khua ah kum 60 val a ten khit uh teh apa lunggulh na tawh zaanglo khawh nop man in New Darkhai khua ah kisuan uh hi.Unau pasal 4 leh numei 3 pha uh a anuai a mun teng ah teng uh hi.

1. Suum Do Thang + Don Ngaih Zen (USA)

2. Nang Suan Thang + Rin Cung Nung (Kalaymyo)
3. Gin Khan Khup + Don Ngaih Lian (Yangon)
4. Zam Khan Thang + Vial Khan Dim (New Darkhai)
5. Ning Deih Cing + Suan Khan Do (New Darkhai)
6. Niang Ngaih Vung + That Thuam (Old Darkhai)

7. Cing Ngaih Don + Vung Suan Thang (New Darkhai)

II. Pu Suum Do Thang in Private Midle School,Zampi khua ah tan 5 zo in SHS, Tedim ah tan 9 ciang zo a,No.1 BEHS Kale Myo ah tan 10 zo hi.Pyinmana /Tatkone khua ah lo khawh na lam pil na sin in zo hi.

III. 1967 kum in Pu Khual Za Dai leh Pi Nem Vum te tanu Pi Don Ngaih Zen tawh ki teng in tapa 3 leh tanu 9 tawh inn khat sungpan khang khia khawm uh hi.

1. Zen Ngaih Niang + Cin Za Kam (Kalamyo)

2. Vum Sawm Cing + Thang Khaw Hau – Ta 6 (Kalaymyo)

3. Cing Ngaih Lun + Kyaw Yin Nyieng – Ta 3 (Yangon)

4. Vung Khan Dim + Khai Go Piang – Ta 3 (Lamka, India)

5. Rin En Cing + Pau Mung Samte – Austraria

6. Gin Khawl Cing + Rev. Dr. Tun Cin Kap – Ta 3 (USA)

7. Gin Sawm Lian + Man Hau Mang (USA)

8 Khawl San Lun + Thang Za Lian – Ta 1 (Yangon)
9. Dai Cin Kham (Malaysia)

10 Thang Biak Lian Mang (Malaysia)

11. Zen Lawh Cing (Yangon)

12. Cing San Nuam (Yangon)

IV. Pu Suum Do Thang in lokhawh na lam pilna a sinkhit teh Sagaing State,Myaung Township ah 1967-1969 sung nasem in1970-2001 ciang Chin State, Tonzang Township ah kum 32 sung na sem hi.Kale Myo ah a transfer ma in Township Agricultural Manager tavuan (Drawing Officer & Distibution Officer ) Kumpin tavuan pia a,Tonzang ah inn leh lo nei in na sem hi.

Tua kum 32 hun sungin Myanmar Socialist Lansin Party, Township Workers Asiazone ah Township Joint Secretary Full Time) kitelna ah telngah ahih manin 1980-1988 dong kum 8 sung Party Unit zumah nasem hi. Party trainning asang pen dong kah hi.

Labour Card lam zong tavuan kipiak beh a, ama thukim na letmat om loin, kumpi nasep kuamah lut thei lo hi. 1988 kum bei lam ah Lokho zumah ciah kik in na sep zom hi.Ki ukna kikhel a hih manin Union Solidarity Devolopment Association trainning 2 vei kahpah a,Township Excutive Comittee Member Tonzang ah aom sung teng sem hi.

1985-1988 kum sung teng Tonzang Township,The Fourth General Election Commision,gambup Council kitel na vai ah Tonzang Township Election Commision, Secretary tavuan kipia in sem hi. B.E.H.S a ding Multimeadia Class Room a pian zawh na ding in Presdent tavuan ki pia a, a hon pawi ah Bochoh Thar Aye tawh Phekyui phiat in hong a,thugen na nei hi.

Tonzang a om sung Zongeina lam leh la te ah makai sem in Yangon, Union day ah Zogam bup aitang in 2 vei ngeina lam lak ding in ma kaih in pai hi. Pu Suum Do Thang pen tuni ciangdong,Zampi tate sung pan Kumpi sung Politics lamah a sang pen a hih man in, a sang zaw ah a khekhap zui zo ding mi ih kisam hi. 2002 kum in Kalamyo, District Agricaltural Service zumah kisuan a, Plant Protection Division (Pp) ah Assistant Manager sem in, 2005 July 7 ni in Pension la hi.

V. Pending Leave tawh aom sung 2005 February kha ni 15 ni in Pasian hehpihna thupha sangin UNWFP/REAM (United Nation World Food Programme/ Renewable Energy Association Myanmar) NGO kipawl nasep na ah Project Assistant kha 6, Logistics Assistant kha 6 Magwe State, Natmauk Township ah sem hi. 2006 kum March ni 2 ni in, Assistant Programme Manager, tavuan tawh zakhang in Natmauk pan Pauk Township ah piang hi.

Programme Manager om lo a hih manin Programme Manager tavuan tawh semkhawm in, 2007 March ni 2 ni in Programme Manager za ngah in Kawlte mipil tampi makaih hi.

VI. WFP/REAM ah asep sungin,

1) Mizawng nekding neilote, TB, HIV/AIDS natna neite Zolai Sangnaupangte khasim in antang, besan, sathau leh ci a khamkhop ding uh pia hi.

2) Zolai sang athak lamsak, aluite puah, Zolai sangte ah Sangnaupangte ading 5000 gallon ata ding guahtui kholna tuibem bawlsak, dailenbuk hoih mahmah sumtang zang in lamsak, mipi ading guah tui kholna bual lian pipi tawh sak hi.

3) Khua kikawmna mawtaw lam tawh sak, zanglo khawh nading tuilam tawhsak, lei dawh sak in, nasemte ading thaman sum pia lo in antang, besan, sathau leh ci pia hi.

4) Kha khat in antang ip 2000 leh sum Ks 2000000/- bang akhawn khongin hawmkhia ahihi.

Pu Suum Do Thang in kum 3 sung NGO ah a sepkhit 2008 February ni 15 ni in azi atate ngetna tawh nasep khawlin Yangon ah atu atate itna hangin Condominium inn sung ah nek leh dawn lung himawh lo in nuamtak in teng hi. September ni 16, 2011 ni in Kawlgam pan ding khia in Pensacola,FL, USA ah tuni ciangdong teng uh hi.

VII. Pu Suum Do Thang in lokho mite khantohna ding deih sak tak in na sem hi.Khaici hoih nono Kawlgam leh Shan gampan la in hawm khia hi. Ankamluum, lothangsan, mibe, nailung kung, niangteh ci, alu, buhci, vaimim ci te atam piang ahoih zaw tawh khek sak hi. Tonzang gam khua khempeuh ah pai in zangbuh cin theih nading munzang, mun hoih tui ngah theih nading mun zon sak hi. Hih banga na asep a muh teh Old Darkhai hausa Pu That Cung Nung in, “Darkhai khua sah atang a zikhlum kancin sintawh hi a thangailo a ni a, ih hah thlawn maimai ang e, Suuma,”ci-in thu kuppih ngei hi.

New Darkhai khua tui nek ham satna hangin kumpi lamah huhna ngenin bilatmi tuikuang, khuami a lawp teng tawh ama khut ngiat tawh bawlsak in tui siangtho dawn sak hi. Tuinek hamsatna khua Khuadam,Vanglai, Haicin,Tuimang, New Darkhai, Tauleng, Talek leh Zampi khua te ah tui omna pan a khua uh pipe tawh tui la leng tui tungthei dingmaw tung theilo ding cih kumpi zum panin Sea level tehna kawmin teh sak kawikawi a, pipe tawh tui la thei uhhi.

VIII. Old Darkhai BEMS manglai sang honpawi leh Mawtaw lamhon pawi adingin thuvan kholhna ah lokho zum mawtaw Land Cruser zangin U Nang Khan Suan (Tungtuang khua) in hawl a, Pu Tawng Za Mang (Myone Councilvuan) Pu Suum Do Thang leh azi Pi Don Ngaih Zen te Zampi khua ah Mawtaw tawh apai masa pente ahi uh hi.

Zampi atun uh teh Pi Nem Khaw Don in vai a na muakna ah,”Nuam mah siang maw Thangta, mawtaw mulo a ka sih ding ka dahtak hiven,”cih kammal tawh vai adawnna hangin sun thapai mawtaw lam hoihlo teng totawm a, a gimna teng uh mangngilh zo uhhi.

IX. New Darkhai khua a nuno Pi Ciang Dah Dim nau suak zo lo a,a gim mahmah a muh teh,Tuithang khua ah Siavuan sam dingin vapai a,Siavuan pan a pang na bet sakin zuilo a,a ciah teh a nuno na si hi.Hih thu a ngaihsut teh Khuaneu a om cina te leh sih hun lopi a Siavuan om loh man a asi mi te hut nopna lung sim tawh cidam na lam pilna a hih theih tawp in zong hi.suumdothang

German Hoemoephatic Medical Science,Yangon ah correspondent tawh kum 5 sung German Siavuan sin in Diproma letmat ngah hi.Khua neu te ah cina amuh nak leh zatui pia in bawla, Tonzang khua ah Siavuan te tawh ki kop in clinic hong hi.

X. Pasian Nasepna:

1) 1992 September ni 2 ni kum 47 a phak khitteh Gupngah ki telpan a zekai lua ki sa hi.

2) Gupngah a ki tel teh lawplua in Yangon ah GTP tintan kah pah hi.

3) Kale Myo Emaus Bible Collage ah B.Th Degree leh M.A (Theology) correspondent tawh sinin zo hi.

4) Gideon Gospel Team ah Director semin Myanmar le India ah gupna thu genin thuphakong honna nei hi.

5) Nagis huihpi hang a,gentheih na athuak te GTP min tawh huhna piak na ah sem hi.

6) October ni 10 ni 2010 ni in Agape Revival Ministry phuan khia in Zomi te tungah gupkhiatna thu tangko dingin Evan. Kham Khan Langh tawh kuan khia hi.

7) Kawl gam, India gam, Malaysia gam leh USA Zomi te kiangah gupkhiatna thu gen uhhi.