Adobe PageMaker Thu

Adobe PageMaker Thu

Zogam bek hilo leitung mun tuamtuama Computer tawh lai khetna dinga a kilimzat pen DTP programe khat in PAGEMAKER ahi hi. PageMaker ah version 5.0, 6.0, 6.5 leh 7.0 cihte om hi. Kum zalom 15na hunlai-a DTP lama Printing Press mukhiapa Aldus Manutius min pua, Aldus Corporation in 1985 July kha teh Apple Macintosh Computer ah zat theih dingin Pagemaker programe hong bawlkhia hi. Adobe’s PostScript page description language a zatna hang leh tua hun lai-a om ngei nailo computer leh printer kizawmsa-a hong zuakkhiat manun leitung lokzo zah dongin hong minthang hi.

Nasiatakin hong hanciam to uha 1986 teh personal computer-a zat theih dingin PageMaker version thak hong bawlkhia uha, ahizongin 1988 teh Apple Mac in DTP lam hong hanciam to-in Pagemaker sanga DTP software sangzaw QuarkXpress hong bawlkhiat uh ciangin Aldus PageMaker pen a zuakkhiatna lamah hong kia hi. 1990 teh Adobe Company in QuarkXpress tawh computer khat sunga zatkop theih dingin Adobe Photoshop hong bawlkhiat-a DTP lamah zong Graphic hoih mahmah olno takin kinei thei ta hi.

Aldus Pagemaker dinmun laamsang kik dingin Aldus Company in nakpitakin hanciama, laimal bawlkhia minthang Altsys kiang panin software license ngenin Pagemaker ah FreeHand Illustrator program hong guanbeh hangin sumbawlna lamah phatuam thei tuanlo-a Aldus Corporation hong kiam suksuk mai hi. Mipi in QuarkXpress hong paksak zawkluatna hang tawh Aldus Corporation phuankhiapa leh aneipa ahi Paul Brainerd in sum haksatna hangin a nasem computer siamte thaman pia zo nawnlo ding cih bek hilo, company dangah taisan limlim dinguh cih patau ta hi. 1993 kum tak teh sumbawlna lama a kithuhualpih Adobe Systems, Inc. te’ kiangah a company zuak mai ding cih a ngaihsut bangin 1994 September kha teh Aldus PageMaker pen Adobe te in buplei ta hi. Tua kuma kipan PageMaker pen Aldus PageMaker kici nawnlo-in Adobe PageMaker kici ta hi. Adobe te in DTP bek hi lo software nam tuamtuam Graphic Software, Multimedia Software cihte khantohsakna dingin a hun uh tamzat pen hi. Adobe te in Indesign Software bawlna dingin a manlah kawmkal ah PageMaker zong kum sagih sung hong buaipih uha PageMaker 6.0, PageMaker 6.5 leh PageMaker 7.0 te hong zuakkhia uh hi. Software saang mahmah leh ahoih nono, sumbawlna-a meetzawte tawh buailua uh ahihmanin Adobe PageMaker 7.0 khit teh PageMaker thak hong bawl nawnlo uh hi.

Hih bang teng tawh PageMaker Software bawlkhiapa leh Journalist minthang Paul Brainerd in DTP nasep nusia in ama uukna leh ama teenna Pacific tuikulh ading na hoiha a up Region’s Human’s Health and Natural Communities lamah a lungsim pia-in 1995 kuma kipan Aldus Corporation hong beita hi.

Tua bang teng tawh PageMaker a zang mite in haksatna tampi tuak ding cih thei ahihmanin Mac OS X a zattheih dingin PageMaker 6.5 pen PageMaker 6.5 plus ah hong upgrade uh hangin Adobe PageMaker pen Apple Computer kibawlthak te ah deih bangin kizang thei lo hi. Mipi lungkimsakna dingin Mac OS X Classic modes a zat theih dingin PageMaker hong bawl hangun azangte in haksatna tuak veve uh hi. Tua haksatna te lakah a kidawk zaw deuhte pen:- 1) Classic Mode ah Mac Computer in deih bangin SCSI, USB leh Firewire input devices te support theilo ahihmanin lim leh atuamtuam kisem thei lo hi. 2) PageMaker Icons nam tuamtuam te leh PageMaker tawh kibawl files te pen Mac Computer in ahi ding bangin computer screen ah kilangsak theilo hi. Full Screen Mode ah graphicste computer in Refresh theilo hi. Tua banah PDF options, ATM in Classic, fonts in Classic, PostScript RIPs ah leh PostScript proofers ah zong tampi om hi. Adobe te in tua haksatnate a om nawnlo dingin PageMaker Version 7.00 hong bawl in hong zuakkhia uh hi. Adobe te in Adobe Photoshop, Adobe Premier, Adobe InDesign leh Graphic software lamah nakpitakin ma la uh hi. Tua bang laitakin Graphics lam a minthang mahmah Corel Corporationte in Corel WordPerfect, Corel* Quattro* Pro and Corel* Presentations*, Coreldaw corel mossaic te hong zuakkhia uh ahihmanin hong minthang uh hi. 1999 kuma PageMaker hong bawlkhiat uh pen a thupi pen hong suakta-a, Microsoft zangte in a neih uh tampitak nei thei ta hi. Tuate’ lakah Toolbar leh Clip Art Libraryte kiphattuam pih diakhi.

QuarkPress ahi-a, MS-Office ahizongin i nasep tawh kituakin Software khat pepeuh zanga i zat software pepeuh naltaka i zat theih ding thupi pen hi. Laikhen leh laibu bawlte’ adingin PageMaker pen thupisim loh theih hilo in Adobe PageMaker pen a kinusia theilo, a kiphattuampih athupi pen software khat ahi hi. Zomi computer zanga laibu bawlte adingin zong PageMaker software pen a zatcing mahmah leh a zatnuam pen software khat hiden hi.

Compiled and Translated by Cinpu (Will SOL)