ZAM Thupuak :: 12 October 2014

ZAM Thupuak
ZAM :: Zomi Association of Malaysia

KHUADO PAWI COMMITTEE PAN SAPNA

Zomi te’n kumsim a ih bawlden a hi Khuado pawi pen Malaysia khuapi Kuala Lumpur ahOctober 15, 2014 (10am- 5pm) hunsung inin ki bawlding hi. Lutman cihdan zong omtuanlo in hongpai khempeuh in kongkhakpi kantan in tutna a nuamtheithei munte ah tatdan hekdan a nuamthei penpending in Khuado Committee te’n hong vaihawmsak ding uhhi. Tutna pen 1000 ciang bek omding a, a hizong in a panglangkhat ciat ah mi 1000 val bang a tut theih dingin tutna om dimdem ding hi. Munhoih nadeih leh hongpai baih sawm in!

Khuado Pawi bawlnading panpihna hongpia khua makai, Pawlpi makai leh Zomi Idol, Zolia & Zotaang sponsor te adingin zong a mailamah tutna kigel ahih manin amai lamah mun nong lakpah nading un zahtakna lianpi tawh hong zasakpah ung.

2014 kum khuado zong ZAM mahin hong makaihin, tua nuaiah Khuado Committee tengin hong vaihawm hi. Khua 78, Pawlpi 20 leh mimal 2 (tuciangciang) in a kisam sum tawh panpihna hongnei a hihman in Zomi khempeuh i bawl KHUADO Pawi ahihi. Amun dingpen, i bawl ngeinasa ahi Chinwoo Stadium ah kibawlding hi. Khuado ni ah koicidan teng omding hiam cih tawmkhat hong maleep nuam ungh.

Zomi Idol Malaysia 2014

Malaysia gamsung a om Zomi khangno lasasiamte lakpan a kitelkhia Top 10 tengin Khuado ni ciangin hong zaiziah ding uhhi.

Zolia & Zotaang Malaysia 2014

Zolia 11 le Zotaang 20 ki heltheiding hi. Zolia & Zotaang a hih zenzen hangin leitung tawh liangko kikimin a kibawlding ahih manin na upmawh sangin nasiazaw ding hi. Banghang in nasiazaw ding hiam cih pen tuani teh na mit mahmah tawh na muhteh telpan ding hiteh.

2014 Zomi Idol leh Zolia & Zotaang hong teelsakding pen a nuai ateng hiding hi.

Namdang sung pan:

Mr. John Tan
Mr Manhunt Malaysia 2012/13 and Artist

Mr. Michael Masterson,
Broadway choreographer performer from New York, USA

Ms. Stephanie Van Driesen,
Award Winning Theatre Actress and Singer

Ms. Sharmaine Van Driesen,
Make-Up Stylist and Fashion Stylist

Zomi sungpan:

Sianu Deih Mang (Sower Sister)
Lengtong Pauno
Pa Suanno (Zomi Vocal Band)
Vai (Inn)
Sianu Niang Suum
Hong teelsak dingte muanhuai thei mahmah uhhi.

Thugending

UNHCR Malaysia, NGO tuamtuam
Pu Hang Khan Lian & Dr. Hau Za Cin (Zomi Innkuna Singapore)
Khuado hongsimin, hihtung a kigenteng namit mahmah tawh na muhkhakna ding itna lianpi tawh Zomi khempeuh kongzawn uhhi.
Khuado Committee

Zomi Idol leh Zolia & Zotaang Sponsors hongpiateng

U Kaino & U Man Mang te innkuan
(New Eden Services Company Limited) RM3000/
U Philip Mawng (Taungzalat) te innkuan RM2000/
Pa Tha Piang te innkuan RM1000/
Aung Nan Daw te innkuan RM1000/
Pa Pau leh Nu Cing te innkuan RM500/
Pa Ngin Go Mang te innkuan (Zolimtui) RM500/
John Mungpi te innkuan RM300/

Zomi League pahtawina sponsors teng

Pawlpi 9 Team 11 Tukpeng kilawmtatna a khatna ngah penpen Pawlpi kipia ding pahtawina CUP pen Sia Thang Za Nial (Nialpi) te innkuan in a it mahmah Pi Huai Sawm Cing a phawkna in hongpia khia ahih manin ki lungdam mahmah hi.
Medal mal 50 Pa Pau Khat Suan (Singapore) in hongsik ahih manin ki lungdam mahmah hi.

UNHCR-CDU te ZAM ah honghawh

UNHCR thukizakna (Information) lam tawh kisai te mi 2 hong hawhin mipi tawh thukizakna bang cibawl leh bangci bawl ding cih hong hawmsawn ding cih hong kikuppih thei uhhi.

KHUADO PAWI THU NUNGKAL A AZOM…
KHENPI – II
1. THU MAKAI

Khanglui i pu i pate’ ngeina-ah Khuado pawi in ni sagih sung tak awh ngei hi tuak hi. Ahi zongin Khuado pawi tawh kisaia laibu ka etkaakte lakah khuado in ni nga sung a awhsak leh ni thum sung a awhsak om hi. Khat leh khat theih dan, gelh dan kibang khinlo hi. Tua ahih manin hih khuado thu kong kaihkhopna-ah zong na theihna uh tawh a kituah lohna zong om kha ding hi. Tulai taka i tual biakna a khah nai lote sungah ni thum sung bang kizang pen hi. I gensa mah bangin annseng khit, khapi taan laitak, khua sungah mipi kimta uh ei, cih ciang huasapa in, “khai khai khai, guaite aw, na na ngai tek un, zing cianga kipan khua kido ta ding hi,” ci-in tangkopa awngsak hi. Tua ni pen ‘Kigin ni,’ kici hi.

2. KIGIN NI

Khuado ding pulak ni pen ‘Kigin ni,’ ‘Meilah Lak Ni,’ ‘Lamsial Ni,’ ahih kei leh ‘Vaihawm Ni’ kici hi. Hih ni in khuado sunga gamtatdan ding leh a kisam ding teng vaihawmna, kithawina ni cih ding ahi hi. Sing lam, tui lam kisialin tuinaak kihah hi. khuado sunga zat ding vaak ding meilah la dingin khuasung nungak tangval inn lusikin gamsungah kuan uh hi. Lo kuante in kha sam in, “a site kha, a hingte kha na om uh leh hong ciah un, zu leh sa ne ding hi hang,” ci-in phuisamin lo buuka suangthu teng sawn puk uh hi. Tua ni-in khua sungah papite in khuado sunga tum ding phiit bawl hi ta leh, khuado sunga gamtaatzia ding hi ta leh kikumkhawmin, lawmah zu beel luupin tukhawm uh hi.

3. PANSIK NI

Khuado a ni khatna hi in, ‘A Pi Ni’ ahih kei leh ‘Pansik Ni’ zong kici hi. Hih ni pen Khuado pawipi ni, gualnop pen ni zong hi in, hih ni-in Sagawhna, Daihawhna, Khuado annkuang uumkhawmna, Kaubetna leh a zan ciangin Khuailak nate kihih hi. Zingsang khuavak phetin Lawmte’ kong biangah dawi leh kau dalna in zu taubeeltung khat tui leihsa, peeng siatsa in kiluup in, a kiangah zasan haal baangsa leh meihol kikoih hi.

3.1 Sagawhna:

pen neihsa, khawhsa, vulhsa teng tawh hih theih zahin kibawlin vok kigo pen hi. Zingsang vaikuan hun ciangin, Lawm papite in a pawl a pawlin vok goin, ni thum sung a khom ding siit tuam pah uh hi. Sa semna-ah sakuang nam nih om in, sasem papite in a vok khawite leh a langte tan ding tuak a khen ma-un amau teng khamkhop ding thuuk masa uh hi. Tua pen ‘Sakuang baal neek’ kici hi. Vok vulhte leh a langte’ hawm pen ‘Sakuang Hawm’ kici leuleu hi. Sagil bawl kawm, sa sem kawm, zu luup zu dawn kawmin taang ziahziah uh hi. Tua lai takin inn nupite in a inn tek uhah taaksih ngan huan uh hi. Naupangte in khuang leh zam, daktal leh sialki tumin a sisate phawkna in mualte hah siang uh hi.

3.2 Daihawhna:

a min phetin a sin a lung, a tuap leh a kalte themno kha tek eukhia-in sawm tangvalte in tua kum sunga misi a nei innkuanpihte puak uh hi. Hih sa sungkuate pen misite a ding a kikoih tuam hi in, sun lam ciangin nupite in zu khaihsa leh taaksih tawh tua sate kengin haanah misite va lui uh hi. Hih pen ‘Daihawh’ kici hi. A sisa a innkuanpihte’ luguh pen sathau zuutzuutin zu leh sa leh taaksih tah uh a, hih pen ‘Si-annsuah’ kici hi. Khua do pen a si leh a hingte kizopna tawpna, kikhakna hunin kingaihsun ahih manin khuado ciangin mi pawl khat lungleeng khawngai-in kapkap mai uh a, la zong hih bangin sa uh hi:

(A) Do na liingliing, do na liingliing e,
Gual in kum khua do na liingliing e;
Gual in kum khua do na liingliing e,
Do haanah naubang va kap ta’ng e.

3.3 Annkuang umna:

Daihawhte nupite inn hong tun kik masiah ann kineeksan thei lo hi. Nitaak annkuang uum dingin kikai khawm uh a, mi a kim tak teh, papi a tal taak pen in zu kam khat teepin phihin phuisam hi. Tua khit ciangin, a ban a baanin zu pen gual teep uh a, annkuang sa kuang uumkhawm uh hi. Ann neek khit ciangin i Zo ngeina bangin ki-it, kingaihna, kideihsakzia lahna in sabaak leh sangoi kibaak khengkhangin gualnuam thei mahmah uh hi

3.4 Kaubetna:

Khanglui i pu i pate hun lai-in misi a om ciangin a kha pen misi khua-ah pai pah loin, innsung, innnuai, innkuun leh sumtawng teng khawngah khuado masiah thaamcip den dingin ngaihsun uh hi. Tua ahih manin misite a gil uh a kial mahmah ding ngaihsutna tawh misi a om teh kawsah, annkhai, lukhung ann cih bang kilui hamtang hi. Khangluite in misite pen dawite’ peh hi, ci-in ngaihsun uh hi. Tua ahih manin khuado sunga gilna laina a om lohna dingin dawi leh kaute notkhia-in kau kibeng hi. Ann neekna a man khit uh ciangin kaubet nadingin meilahte sau silselin lim takin tenin a lom a lomin kihencip hi. Kaubet ding ciangin kong sak leh kong khangah meilah taakna ding nahtangkuak kikoih masa phot hi. Hausapa innah pasal teng kikaikhawmin phiit lem uh hi. Tua ciangin inn kimin meilah de ciat uh hi. Tualteekpa (siampipa) in a thau lawnin kaubet hong kipan pah hi. Tualteekpa khit ciangin midangte in beng bei pan hi.

Kaubet pen pasal tangzang khat peuhin khut lang khat lamah meilah lom det kawmin tuga, heiga leh singkhuahbawk khatpeuh tawi-in innsungtawng panin inntung innnuai innkawm teng baan satin:

Dawi hang, kau hang, nam hang aw,
Na zun, na ek namsia, na ni na kha cing ta;
Na zi na ta ten hong lamet zawh sawt ta,
Na khua, na tui zuan in,

ci-in hawkin kiko gamgam hi. Tua banga innkawm teng baan satin innkongbiang a tun ciangin a tuga pen daipua denna in, “A khe buuk, a ngaltaak kha ing ei,” ci-in a meilah ken khen nih suahin, lom khat khang gawlah, lom khat sak gawlah a kuangsa in siatin nusia hi. Hih pen dawite hong lut kik ngam nawn lohna ding ahi hi. Tua kaubengpa pen mi thumin zui-in, khatin khuang, khatin daktal leh khatin thau tawi hi. Kaubet kipat ding ciangin thau khat vei lawnin, inn kongbiang a tun ciangin khatvei lawn kik hi. Inn khempheuh ah kau a kibet lai takin tum theih tum mawh teng tumin, thau lawnin kisa ngeingai hi.

3.5Meidetna:

khempeuhah kaubetna a man khit ciangin, sawm tangval tengin gua dawnah meilah siatin a desa in khuang, zam leh daak tawh a honin hausapa inntual ah kisutuahin thum vei kiimvial uh hi. Dena kaubetna kammalte mah zangin kizui kawmin awngin kiko damdam uh hi. Tua panin tum theih teng khempeuh tumin a lawhsa kammal teng mah lo kik zelin khuatual (Tualbiakna) ah pai-in thum vei mah kiimvial leuleu uh hi. Hih pen dawi neng kau neng bang neng peuhmah om nawn kei hen a cihna uh ahi hi. Sawm tangvalte khua sung hong lut kik uh ciangin meilah tum baangte hong lutpih kik thei lo uh hi. A hang in, dawi nawhna lamah meilahte natawm niin baangin siangtho nawn lo dingin seh uh ahih man hi. Meilah tum baangte khuanawl sing dawn, phung dawn peuhah siatin nusia uh hi.

Mun khen khat ah tua meilah a tum baang teng kaikhawm uh a, meiphual sat uh hi. A khu a tam theihtheih nangin sawlbawk tawh khuh uh a, meikhu a paikhiatna dingin a laizang mun khat vangsak uh hi. Tua munsan pan meikhu hong zamkhiat ciangin siampipa in-

Sim kum pha hen na cih leh simah kaai in;
Zo kum pha hen na cih leh zo-ah kaai in;
Sim kum kong ngetna hi; zo kum kong ngetna hi;
Miimbeem kong ngetna hi; taangbeem kong ngetna hi;
Cidam kong ngetna hi; ludam kong ngetna hi;
Khansau kong ngetna hi;
Tu sawn, ta sawn kong ngetna hi;
Khi-awh pha, taubulh pha kong ngetna hi;
Galmang lu, samang lu kong ngetna hi.

ci-in phuisam hi. Meikhu pen khua sung lamah a kaai leh khua sung kicidam ding hi, ci-in khanglui mite in upna nei uh hi.

3.6 Khuailakna:Kaubet zawh lamna dianna teng a man ciangin, a kihawisa khuaibu la dingin sawm tangval te kuan uh hi. Tua khuaibu leh a note omzia panin kum thak sungah ann leh tui kham leh kial, nat leh dama kipan tuahsiat tuahphat ding kihilna in ngaihsunin aisanna in a kizang ahi hi. Tua hi a, khuailakna pen kithupi seh mahmah hi.

Khuado khuai lakte pen zu (khuaizu)a nei nam hi loin, no a nei nam, mi a deh thei nam, sing tung ahih kei leh lei sunga a kaai nam- tuunpi, tuunpi malneu, ngaltuun, ngaltheen, khuaimul leh khuaithumte khuaibu (khuaipheng) kila pen hi. Tua ciangin khuailakna-ah zat dingin Khuang khat, sialki khat, daktal a kipua zo zahzah, zubeel peeng siatsa beel khat, khuaisah zu a vekin, phiit bu a kibawl zahzah, naang lukhu kikeng hi. Zan puan ding leh a zing cianga kizepna ding puan a koihcingte zong pua uh hi. Khuailakna a kikeng zu pen ‘Khuaisah Zu’ kici hi. Zute pen hausapa-a kipan haam upate in beel khat ciat a sik uh, sawm tangval tengin zingsang lama a don, nitaak lama a khaihkholh uh zute hi.

Khuai omna mun a tun uh ciangin khuai pen mei tawh kihal loin a pi teng khut tawh khatkhatin manin, ahih kei leh gua taitep tawh tepin that khin masa uh hi. Khuaipi teng a mat khit uh ciangin khuaibu pen a kua ahih leh to uh a, a pheng ahih leh phelkham uh hi. Khuaibu sungah a pheng dal sawm ciang bang pha thei hi. Tua khuaiphengte lak panin a hoih a limci pen leh a tak pen ciamteh uh hi. Tua banga ciaptehna a bawl khit uh ciangin khuainote tunga saphuklai banga a pan dildel a paan pen dam takin hawkkhia uh hi. Khuaino zawngkhal khempeuh zong paikhia in, a etlawm lo khempeuh nul siang uh hi. Kum saanna ding khuaibu pen a kisia lo dingin kang takin lakhia uh a, naang lukhu sungah koih uh hi. Hih khuaibu lakhiapa pen tualteekpa in thuneihna a piakpa bek hi thei hi. Zoplai ding…

ZOMI LEAGUE October 05, 2014 Semi-Finals Results pulakna

ZOMI LEAGUE 2014 Final leh Third Place kimawl ding Pawlpite

KHUADO pawipi bawlna ding mapan khopna apiasa teng

Khua kipawlna pan:

2013 Sumcian RM630
Anlangh RM200
Buan RM100
Buanli RM100
Chiantagyi RM100
Cikha RM100
Cingpikot RM100
Darkhai RM100
Dimlo RM100
Dimpi RM100
Haiciin RM100
Haupi RM100
Heilei RM200
Kansau RM100
Kapteel RM200
Keltal RM100
Laaitui RM200
Lalta RM100
Langzang RM100
Laibung RM100
Lailo RM300
Lailui RM200
Lamzang RM100
Lezang RM100
Lingthuk RM100
Luangel RM100
Lunmual RM100
Mualbeem RM200
Mualnuam RM100
Mualpi RM100
Mualzang RM100
Muizawl RM100
Ngalbual RM100
Ngalzang RM100
Ngennung RM100
Ngente RM100
Pangsak RM100
Pangzang RM100
Phaileng RM100
Phaiza RM200
Phunom RM100
Pimpih RM100
Saipimual RM100
Saizang RM200
Sezaang RM200
Singgialzang RM100
Singunau RM100
Singzung RM100
Suanghoih RM200
Suangphei RM100
Suangsang RM100
Taakkhawl RM100
Taaklam RM100
Tedim Suangpi RM200
Teeklui RM100
Thalmual RM200
Thangkai Suangpi RM200
Thangnuai RM100
Thangsan RM100
Tonzang Lawm RM200
Theizang RM100
Tongsial RM100
Tualzang RM100
Tungtuang RM100
Tungzang RM200
Tuidil RM100
Tuikhiang RM100
Tuilangh RM100
Tuimang RM100
Tuimui RM100
Tuipi RM200
Tuisau RM100
Tuithang RM200
Tuivial RM100
Tuizang RM100
Valvum RM100
Vongmual RM100
Zampi RM100
Zozaang RM100

Mimal & Biakna Pawlpite pan:

Paan Khup (Lawibual) RM50
Taung Za Lat (Philip Mawng) RM300
Adonai Zomi Christian Church RM200
Agape Puchong Church RM200
Bethel Christian Church RM200
Christ Mission Fellowship RM200
Evangelical Baptist Church RM200
International Zomi Christian Church RM200
Malaysia Laipian Pasian Pawlpi RM200
Manaa Zomi Christian Church RM200
Myanmar Believers Fellowship RM200
Rawang Zomi Innkuan RM200
Shalom Christian Fellowship RM200
Sunway Emmanuel Church RM200
Zion United Pentecostal Church RM200
Zomi Adventist Church RM200
Zomi Catholic Community Malaysia RM200
Zomi Christian Assembly RM200
Zomi Christian Fellowship-Canaan RM200
Zomi Christian Fellowship-Kajang RM200
Zomi Christian Fellowship-Kota Damansara RM200
Zomi Ebenezer Malaysia RM200

Zomi Idol 2014 Top 20 kitelkhia teng October 11 ni-in Top 10 kitelna nei leuleu

27. Suum Ngaih Muan
34. TZ Khaipi
24. Nang Sian Cin (Sian Cin)
37. Suan Ki Thang (Ki Thang)
43. Abraham Kham
33. Zam Khan Khual (Khualno)
31. Nang Khan Lian (Lianpi)
36. Mang Khan Khual
30. Lang Sian Zom Mung
39. Cingneu
32. Pau Khan Mung (Sawbua Mung)
15. Cin Suan Mang (Mangpu)
14. Man Sian Cing
05. En Khup
16. Niang Lian Cing (Nulek)
19. Pau Do Sum
47. Zen Sian Pau
35. Kam Sian Niang (Niangnu)
41. Nang Leem Sang (NL Sang)
40. Thang Khua Khai

UNHCR-CDU te ZAM ah honghawh

UNHCR thukizakna (Information) lam tawh kisai te mi 2 hong hawhin mipi tawh thukizakna bang cibawl leh bangci bawl ding cih hong hawmsawn ding cih hong kikuppih thei uhhi.

Mopawi sapna

Pawlpi mi, u leh nau, lawm leh gual akua mapeuh in pumkhat suahna mopawi ah nonguap na dingun itna lianpi tawh kongsam uhhi.

Sia Hau Khan Mang Japan pan honghawh

Zomi sungah i angtanpih mahmah Japan gamah pilna sinngiat a pai Sia Hau Khan Mang in hun awl angah sunsun sungin Malaysia ZAM zumah hong hawhin ZEC sangnaupangte pilna tampi hong hopsawn sakthei hi.

Dahpihna

ZSM palaai, Pa Nang Suang ii pianna pa, Pu Cin Khan Lian Gualnam (Kum 58) in a tenna Laaitui khua panin 07.10.2014 ni in hong nusiatna hangin Pa Nang Suang te unau omna inn ah ZAM-ZSM makaihna tawh 09/10/2014 ni-in dahpihna, phawkna hunkhat kinei thei a, Pa Nang Suang leh sanggam te tawh kibangin ih dah khawm hi.

Lundamkohna

Zomi Christian Assembly pawlpi te’n ZAM hall a zatding Amplifier hoih mahmah khat hong pia ahih manin lungdamna ihko hi.
Thang Sawm Lian (Buan) in tukal Thupuak bawlna ding RM20 hongpia ahih manin lungdam ihko hi.
Sia Hau Khan Mang, Japan pan hong zinpakin tukal Thupuak ading RM50 hongpia ahih ma in lungdam ihko hi.

Address:

155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email:  [email protected]

Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna pdficonBiakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website tungpan kongsuaksak zelzel uhhi.

Note :: PDF tawh na simnop leh

Anuai a PDF lim tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.

Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…