Thai gamsung Voksa zuakna gei ah Bomb puakkham, mi 3 sipah, 22 liam

Thai gamsung Voksa zuakna gei ah Bomb puakkham, mi 3 sipah, 22 liam

Thailand gamsung Southern Yala Province sungah Monday ni in Motorcycle Bomb khat puakkham in mi 3 in sihlawh a, adangzong mi 22 liam cih Reuters pan kiza hi. Internal Security Operations Command (ISOC) panin thunei khat ahi Spokesman khatin agenna ah hihbangin ki bawlsiatna pen hih kuamsung ah aomlohzawh sawtmahmahta hi ci’n genkhia hi.

Thai gam ii leitawlam aom ahi Narathiwat, Pattani, Yala cih Province tepen Muslim atamdiakna Province te ahihi. Tua kuamsungteng ah Malay Muslim migilo tezong tammahmah in, abeisa 2004 kum khitzawh gamsung buaina hangin mi 6000 bangin sihlawhkhin uhhi.

Hih apuakkham Bomb pen Motorcycle sungah akikoih hi a, tua Motorcycle pen vanzuakna in akizang “Market Cart” gei ah aki khawlsak ahihi.

Tua Motorcycle tungpan in Bomb apuakkhap ciangin ageinaidiak aom mi 3 te’n anuntakna uh beilawhpah hi ci’n ISOC spokesman Pramote Prom-in in genkhia hi. ISOC kici pen tua kuamsung tengah bitna aomtheih nadingin avilden Government Security Force te ahihi.

Zingsanglam vanzuak hunlaitak “Morning Market” ah apuakkham hi a, hih Bomb kitapna vai ah mawhpuak ala kuamah agenkhia omnailo uhhi.

Video: Bomb at pork stall in market in Thailand’s south kills three, wounds 22

Thai Police te genna ah tua Motorcycle pen voksa zuakna saigei ah kikoih in tuapan in apuakkham cihi. Voksa pen Muslim te’n Islamic Law tawh kizui in akhamcip uh, nekvetloh dingin akhamcip uh ahihi.

Tua Voksa zuakna saidawl gei ah Thai Buddhist tezong om uh a, tua Voksa zuakte leh Thai Buddhist te ngimna tawh Bomb aki sukham hiding in ki ummawh hi.

More: Voksa Bak Nih le Naupang Khat ~ Khat Thang

Hih Thai gam ii leitawlam Southern Province tepen abeisa 2004 kum khitzawh buaina aomden hi a, mihing asihlawh zong tammahmah hi. Ahi zongin abeisa tawlkhatsung hihbang in buaian lianpi omlo ci’n akigen hi a, tu’n buaina hongki pankik leuleu ahihi. Sawltak #zomidaily