Zolai gelhzia kibatsak nading

Zolai gelhzia kibatsak nading

Mualtung mite laka Pasian nasem a hong pai sangmangte in lai tawh nasepna mah hong bulphuh masa pen uh hi. A kipat tung uha kipan in a gam mite’ pauin lai hong neihsak ding uh a thupi penpen ahi hi. Mizogama sangmang nasep nading kan a Aizawl a hong tung masa pen in Mr. William Williams hi a, 1891 kumin Aizawl tung hi. Kha nih sung khawng a om khit ciangin ciah kik a, Mizogam a Presbyterian pawlpi min tawh sangmang nasep nading a muhna bang report pia hi. Assembly in zong saangin a thukimpih uh hi. Ahih hangin Mr. William Williams pen Aizawl pan a ciah khit a sawt lo ciangin typhoid in cina a, amah kum 33 khawng pha panin a tup a ngimnate tangtun man loin si hi.

1890 kumin London panin tangval khat J.H Lorrain zong India gamah a hong pai hi. Culcutta a hong tun ciangin Brahmanbaria a kicihna munah a hong pai leh, Baptist Missionary Society (B.M.S) sunga a sem sangmang pawlkhat tawh kimu a, Mr. F.W Savidge tawh kithuahin a nuntak sung tawntung na a sem khawm hi. 1893 kum Boxing Day a cih ni-un Silchar pan Aizawl zuanin a dingkhia uh hi. 1894-1897 sung pen Mr. Arthington huhna sum tawh pawl min nei loin, pau a kisin kawmun, B.M.S te’ bawl laibu no tuamtuam zangin Lungdamna Thu a gen uh hi. Ahih hangin 1903 a kipanin B.M.S te tawh kipawlin na sem uh a, Lunglei phualpi in a nei uh hi.

Mr. J.H Lorrain leh Mr. F.W Savidge in hih bangin Aizawl a na a sep lai takun Rev. D.E Jones zong 1897 kumin Aizawl hong tunga, September pan December 1897 sung pau sinin Aizawl ah om khawm uh hi. Lorrain leh Savidge pen a khuan ciah ding uh hun hong cing ta ahih manin D.E Jones tawh 1897 Lungdambawl a zat khit ciangun, a khuan ciahsan uh a, D.E Jones guak a nusia uh hi. Ahih hangin 1898 kum a bei main Mr. Edwin Rowlands zong Aizawl hong tung leuleu a, amah tawh kithuahin na hong sem uh hi.

Lorrain leh Savidgete lawmta in lai nasepna lam mah bulphuhin nei uh a, Thuciam Thak leh Late gawmin a bu in a bawl khit ciangun Thuciam Lui tei ding hong kipan leuleu uh hi. Hih laiteina pen Aizawl lam leh Lunglei lama sangmangte leh Mizote in a sep khawm uh ahi hi. Lai Siangtho buppi pen August 26, 1955 in a tei khin uh hi. Lorrain leh Savidge in Lai Siangtho teina bekin a hun zang lo uh a, Lushai – English Dictionary, a kici zong bawl uh a, Lusheite in Pu Buanga Dictionary a ci deep uh hi.

Chin Hills a sangmang hong tung masa Rev. A.E Carson leh Rev. Dr. E.H East-te in lai i sim theih ding hong deihsak uh ahih manin, Kawllai sinna hong phuhsak uh a, Tedim gamah Tonzang leh Khuasak ah, Falam gamah Lumbang leh Laizo ah, Khalkha gamah Khalkha, Zokhua leh Thantlang ah sang hong uh hi. Tua ahih manin i mi masate in Zolai sangin Kawllai na siam masa zaw uh hi.

1920 kum ciangin Northern Chin Hills a Deputy Commissioner (Mingyi) a sem Stevenson in sangmangte Falam ah samin “Zomite in Kawllai in lai a sin sangin amau lai mahmah tawh sin leh uh amau adingin hoihzaw ding hi” a cih ciangin i sangmangte in zong hoihsa uh a, a kum kik ciangin Mangpipa mahin Maymyo ah meeting sam kik a, tua a kipanin mission sang khempeuh kumpi sang suaksak dinga, Zolai in kisin ta ding hi, ciin vai hawm uh hi. Rev. J.H Cope pen kumpi nasepna pia loin, Honorary of Inspector of Schools semsak uh a, a T.A bek pia uh hi. Sang a zat ding laibu khempeuh – Tedim, Falam leh Khalkha pauin bawl a, tua bang kawmkawm mahin Tedim leh Khalkha pau in Thuciam Thak zong tei hi. Hih Zolai Sang pen kumpi in 1925 kumin hong a, tuin Zolai a nei i suak hi. A hong uk Mikang kumpite leh i sangmangte in ei ading a hoih penpen ding deihsak a, thu saupi khualin a hong vaihawmsakna uh cikmah hunin mangngilh loin, i phawk tawntung ding kisam hi. Amaute nasepna leh vaihawmna hangin i minam sungah Pasian minthang semsem ta hen.

Mizo gama sangmang J.H Lorrain leh Edwin Rowlands pen pausiam (linguist) suan leh muan tham a cing taktak mipil hi uh a, midangte ading deihsakna taktak tawh amau pumpi kipia a na hong sepna uh cikmah huna a mang ngei nawn lo ding nasepna hi. Lorrain in Mizo lai a na bawlsak ciangin anuaia bangin na bawlsak hi : A AW B CH D E F G NG H I J K L M N O P R S T T U V Z. Hihte pen amaute adinga a hoih penpen dinga a na bawlsak hi a, mipil pen leh laisiamte bawlsa ahih manin tu dongin kibawlpha zo tuan nawn lo hi. Ahih hangin J.H Lorrain in a laigelhna khatah hih bangin gelh hi, “A khuan ka ciah sungin sangmang dangte in aw sau adinga aw ka zatna leh aw tom ading o ka zatna pen hong na kheelsak uh a, aw sau ding a tungah circumflex (^) na zang uh hi. Hong kheelsak loin, kei a pen mah na zang suak hi le uh hoihzaw mah ding hi ven,” ci hi. Tua pen tulai taka ei ‘aw’ i zatna leh ‘o’ zatna tawh kibanglian ahi hi.

Tedim ah J.H Cope in Zolai hong bawlsak ciangin a ol penpen leh a mawl penpen (the easiest and the most simple) in hong bawlsak hi. I lumlet suk lumlet toh hangin J.H Cope in hong bawlsak sangin a hoihzaw leh a kheekkhia zo ding om nai lo hi. Pau leh laisiam tuam kai vilvelte (linguist expert) in a hong bawlsak kei buang uh leh baih lo ding hi. ‘Ih’ na zang hi; hih pen English ‘i’ tawh khen theih dinga a bawl hi a, ei dingin h thuah kul lo hi a, a val hi. Ei Zolai-in A B C D E G H I K L M N O P S T U V W Z hi a, mal 20 bek pha hi. Hih pen a ciilin ‘Mang Tuallai’ na ci hi. Theih nopin ol lua mahmah ahih manin ‘Ni Sagih Lai’ a ci zong om uh hi. A khangham lungpilsate in nisagih sungin a ututin sim thei in a gelh theih man uh ahi.

Tu hun ciangin mi tampi in ahi dingsa khain a kul lopi in awtawngte (abrupt sound of ending) ah h a valin a koih om uh hi. Koih nadinga a kilawm munte ah kikoih leh zong a dandan khat om hi. A kikoih nading mun ahi lopi ah koih het loh ding hi. A tuam vilvel (exceptional) cih bang ahih kei nak leh, hih anuaia laimungte tawh Zolai mal tawp thei lo hi. b, c, ch, d, f, kh, mh, nh, ngh, ph, q, r, s, th, v leh z.

Tua ciangin J.H Cope in azat dingin a hoih tuak hiam, cih a na sin ngei ahih hanga a zat nawn loh pen circumflex (^) hi. Awsau khempeuh ah circumflex zangin Mate Lai Siangtho na khensak hi. Hoihsa tuan lo ahih manin zang nawn lo hi.

Zolai azang thei ding mi pen tu laitakin gam thum – Chin State , Mizo State leh Manipur State ah kiom hi. Manipur state a om pawlkhatin ‘ou’ zang uh a, phonetic ah bel man ka sa mahmah hi. Ahi zong laigelhzia man pen hi dingin bel ka um tuan kei hi. Amau zong limtakin en phapha le uh zat suak taktak dingin bel deih tuan dingin ka um tuan kei hi. Ka tut muna ka ngaihsutsut ciangin J.H Lorrian, FW Savidge, Edwin Rowlands leh J.H Cope-te in zong Zolai gelhdan dingin hoihsa hi le uh na zang khin ding uh hi; hoihsa khol lo ahih manun a zang lo hi lel dingin ka ngaihsun hi. Tua ahih ciangin, ei adingin zong zat tuak lo, tham loin a valin ‘u’ a kibehlap niloh suakin haksasak zaw lai hi. A zangzangsate nangawnin a zat nading mun ah zang kha loin, ‘o’ omna khempeuh ah ‘u’ behlap ding kisakha thei zaw lai hi. Zolai haksasakin hong khialsak thei ding hi zaw lai hi.

1. Tua ahih ciangin lai nei lo minam pen namtom, minam picing lo, minam mangthangte hi. Cikmah hunin lai nei lo minam pen khawsuak ngei lo dinga, minam dangte lakah theihkhakin om ngei lo ding uh hi. Mailam ah minam picing leh khawsuak i suah theih nadingin, Zomi namte ading thu saupi hong khualsaka hong deihsak mahmah Deputy Commissioner Stevenson leh i Sangmangte’ hong pattahna leh lamlahnate mangngilh loin, itin kemin, puahin zuunin, zangin khantohpih ciat ni. Tua ahih ciangin nang lai nang na it kei leh kua’n hong itsak ding hiam? Nang na puah kei leh kua’n hong puahsak ding hiam? Nang na zat kei leh kua’n hong zatsak ding ahi hiam?

2. A minam, a pau leh a lai a it lote pen amah leh amah a ki-it lo, migina lo pente hi. I minam leh i hihna pen i zahpih ding hi lo hi. I kisialhpih a, minam dangte maiah i maingalpih ding hi zaw hi. Pasian mai mahmah ah zong maingalpih tham ciang dingin laamto a i tawisan ding hi. Mun tampiah mi tampi in Zomi i hih pen zumpihin, mi hong theih ding dahin Zomi i hih lam i ki-im theih tawpin a ki-im nuam ki-om hi. Ei leh ei i ki-im nop a, mi hong thei ding i ut kei leh, i ginat lohnate kimuin a maizum i hi a, mi hong theih ding a ut lo i hi hi. Tua banga mi hong theih khak ding i ut het loh, mi’n hong thei le uh i ut zawsop hun a om ciangin, i ginatna leh i maingalpih ding om hi, cihna ahi hi. I minampihte leh i beh i phung sungah migina sim tham khat om hen la, zong hau sim mai leh ama’ thu i gen ding kithanuamin, ei hauhna leh ei ginatna ahih loh hangin, midangte tungah kisial nuam mawkmawk thei hi hang. Tua banga kisialhpih tham, maingalpih taak leh angtanpih ding a tam theithei i om nadingin Pasian kiangah thungenin nakpi taka i pankhop ding deihhuai hi.

3. Amah leh amah kithupisak lo a, minam dang a thupisak-zawte in sila nam ahi uh hi. Hih bang i cih ciangin ei leh ei bek kithupisak dinga, midangte bangmah a sim lo ding, cihna hi zenzen lo hi. Ei le ei vang kipia loin, ei sangin midangte a kibang vive, vang i piak zawk ciangin, ei le ei kinengniamin midangte a sangsak i hi hi.Midangte tungah bangmah uatna leh kiphatsakna om loin, lungsim siangtho taka om ding hi a, ei le ei kimawk lap tuan loin, kinengniam ding lah hi tuan lo hi. I hihna bang leh i tunna ciangah Pasian hong thupha piak hi, ciin angtana, i maingalpih zawk ding ahi.

4. I pau leh i laite simmawhna in ei le ei kisimmawhna hi. Mikangte in introvert cih leh extrovert cih nei uh a, hih kammalte gel a kilehbulh linlian ahi hi. Mi pawlkhatte i hihna bangin zong kilangkhiasak ngam loin i om a, midangte leuleu a hihna sangun a sangzaw in a kigen khia uh hi.

5. Minamdangte in amau pau leh laite thupisimin a suan a khakte uh tungah hilh sawnin zangsak tangtang uh hi. kawlgam sung bang en pak leng, Sente leh Kalate in tuma khang bangzah laiin Kawlgam hong tung uh hiam, cih i theih phak loh hi mahleh amau pau a pau thei bek tham loin, a lai nangawnuh thei lailai uh hi. A minam ngeina uh mansuah loin kemcing tinten ahih manun, nampi, migina ahih lamuh kilang hi. A minam ngeina uh ahi pau leh lai leh adangdangte zumpih loin, maingalna leh angtannain a nei zaw uh hi. Mi pau leh mi lai i theih pen lungdamhuai mahmah hi. Mi pilna, siamna leh theihnate i bat phak pen angtanhuai mahmah hi. Ahih hangin ei pau ei lai i theih loh pen namtomhuai mahmah hi.

6. Bang hangin Zomite i laigelhzia kibang lo hiam? Zolai gelhzia kibat nading, cih thulu banghangin kikup kul lai hiam? A masa penin hih dotnate dawnna dingin mipil kitawm lua lai hi. Mipil tampi, suan le muan tham, a hong khai ding om le hang, tuate thu mang loin ki-om tuan lo ding hi. Tuate pilna leh siamnate zui loin, ki-om tuan lo ding hi. Amau hong makaihnate kinungngatsan tuan lo ding hi. Hih dotnate dawn nading a nihna ah ei mi pen eima tuam ciata tang din nuamte (individualist) i hi hi. Ei le ei ciat kideih khopin midangte thu a zui nuam lote i hi hi. Midangte pahtawi a laptoh ding sangin, gensia a nenniam ding lam i lawpna lam peuh hih tuak zaw leh kilawm ka sa hi. Minam bup ading sangin mimal adingin kihanciam thei zaw hi. A pangkhawm theite i hi kei a, a tang din nuamte bek i hi zaw hi. A thumna ah, pilna, siamna leh theihnate ah, ei le ei sangin midangte tung-etin a thupisim zawte i hi hi.

Tua ahih ciangin, a nunungpenin ei mite in si le sa tawh pianpih i minam ngaihsutna lungsimte leh i khawmuhziate i paih ding, lemkhawm a i puah ding leh i bawl phat ding tampi om hi. I lungsim paizia (mental tendencies) tampi takah midangte i batzawh nai lohna om lai hi. Damdamin i kipuahphat toh ding ahi hi.

Rev. Thuam Thang