Malaysia papi khatin a tanu zawhthawh thutawh buan ahih manin kum 28 thong kikiasak

Malaysia papi khatin a tanu zawhthawh thutawh buan ahih manin kum 28 thong kikiasak

Malaysia gamsung ah papi khatin a tanu zawhthawh thutawh buan (Rape) ahih manin, thong kum 28 sung akiading in thukhenmang te’n thupia cih NST pan kiza hi. Thong kum 28 sung akiatding banah ciangduai (Cane) tawhzong atawbo 25 vei satthuakding in thu kipia hi.

Tuabangin ama tanu tektek abuanpa pen kum 42 aphakhin khat hi a, anasep pen nidangin khamtung ah belsiazong akici sikthemneng akaikhawm “Scrap Metal Collector” khat ahihi.

Buan athuak atanu pen kum 12 bek aphapan khat hi a, Malaysia, Kedah State sung aom Pendang District sungah thupiang ahihi.

Abeisa September leh October khasung in a tanu pen akigawm in 3 vei buan hi ci’n Sessions Court thukhenmang te’n pulakna neikhia uh a, apa inzong ka mawhkha mahhi ci’n amawh takpilam pulakkhia hi.

Tua papipa pen thukhenmang Judge mi 2 takin ahi Juraidah Abbas leh Judge Azman Abu Hassan te’n thusitna nei uhhi.

Amasa in tua papipa pen abeisa September 18 leh October khasung in a tanu zawhthawh thutawh Pendang, Mukim Guar Kepayang, Kampung Kedah aom innsung ah buanhi ci’n thu kibawl masa hi.

Tuabangin agamtatna hangin papipa pen “Section 376(3) of the Penal Code” thukhun zui in thong kum 20 akiading in thu kipia a, tuaban ah ciangduai “Rotan” tawhzong atawbo 10 vei satding in thu kipia masa hi.

Tuaban ah a tanu pen a ngeina ahilo akamtawh “Oral Sex” zong bawlsak cih kimukhia hi. Tuabangin agamtatna hangin “Section 14(a) of Sexual Offences Against Children Act 2017” thukhun tawh kizui in thu kibawlbeh a, thong kum 8 leh ciangduai tawh tawbo satbehding in thukipia hi.

More: Malaysia, Penang ah kum 15 aphapan atanu buanin agaisak papi khat kiman

Tua papipa pen azi tawh akikhenzawh kum 10 valbang aphakhin khat kici hi. A sanggam numei khatzong adamlo ama kepdingkhat om ahih manin, thukhenmang te kiangah hong hehpih un ci’n thuumna nei hi. Ahi zongin a tanu abuanna hangin akhantawn alungsim agimcip dending dinmun ahih manin, thukhenmang te’nzong angetna pen hehpihzolo uh a, agamtatna tawh kizui in thu akibawl cih kiza hi. Sawltak #zomidaily