A tamzaw thukimna ~ Lian Tuang

A tamzaw thukimna ~ Lian Tuang

1) Nung kha (June) beikuan lam in kawlpi mun khat ah nitak nai 3:30pm pawlin ta 4 nei papi khat cycle tuahsia hi. A dek lam tat kha ahih manin khua phawk nawn loin zato kipuak pah hi.

Zatote in hoih takin a vel dikdek khit ciangin siavuan a lianpen pa in a khuak sungah si tam kizellua khin ta hi. Kibawl theih ding tampi om nawn kei. Tawl khat sung ngak kul in teh, a zenzen in a damkik phial leh zong cidam ngeina bang ahihkik nading lampi tawm mahmah hi, ahi zongin nuntakna pen Pasian khut sungah om hi ci in cina pa zi le a sanggamte kiang gen kik hi.

Cina pa sanggamte zong lungkim zo loin Yangon Mandalay pai suk leh a lem zo lai diam ci veve uhi. Siavuan pa in na pai nop uhleh pai theih mah hi. Tua lamah zato van le siavuan siamah kicing zaw mah hi. Ahi zongin tu le tu in a ci sa in a si khang lailai ahih manin hih bang pi in na pai uhleh lamkalah buai thei ding hi. Ahi zongin na pai sawm uhleh lai kong at sak ding hi cih teng tawh dawngkik hi.

Siavuanpi pa in tha pia lua lo ahih manin Yangon Mandalay lam pai nawn loin kawlpi ah a hi thei bangin kibawl dingin khentat uhi. Mel theih ulenau hau mahmah ahih manun zato ah kiveh ziahziah hi.

2) I gen nop pen hih pan a kipan thu khat ahi hi.

Cina veh pawl khat pen cina veh bek hi loin thu gen nuam mahmah zong om leuleu hi. Thu gen cih sangin sawlna le ngaihsut piakna bekbek hi zaw hi. Bang hang Yangon Mandalay paipih lo na hi uh hiam. Ko zong ka pa uh/ ka u uh/ ka nau u/ ka pu uh…., hih dan hi in khanglam ka paipih uh leh damkik pah hi, sum zong tampi bei lo hi cih dan vive ahi hi. Amah it taktak lo na hi uh hiam ci in a to bawl nangawn om lai hi.

Hih bangin cina veh a tamzaw in a gengen banah zato lam a nasem pawlkhat nangawn in zong tua bang gen thei zel lai ahih manin inntek nu zong lunghiang sak zo mahmah hi. Ni nih ni thum a sawt ciangin inntek nu in siavuanpi pa thu sangin kimlepamte thu gen lam ah a lungsim pukzaw pianta ahih manin sum leitawi in Mandalay paipih suk uhi.

Kimlepamte tawsawnna hangin cina pen Mandalay paipih uhi. Siavuanpi pa deihsakna le ngaihsutna tawh kipuak hi masa lo hi. Cina pen kawlpi siavuanpi pa cih mah bangin damsiang zo tuan loin ciahpih kik uhi. A thu pen hih ciang ci phot ni.

3) Cina veh thugensiam pawlkhatte kampauna hangin inntek nu in sumlepai, thalengal tampi suplawh in leiba tampi neihlawh tawh kibang ka sa mahmah hi.

Tua ahih manin vai khat peuhpeuh a om ciangin

1) Tua vai tawh kisai a thei a siamte thu dong ding, amau ngaihsutna thupi lak ding.

2) Tua vai tawh kisai ah ong kidong ahih keileh kamtam paulo ding.

3) Tua vai tawh kisia a tamzaw thukimna cih lanlan sangin tua thu a theite ngaihsutna le thukimna bang dan hiam cih tel khit ciangin khentatna nei pan ding.

4) Vai khat peuhpeuh ah thuman pen thutang pen cih pen i deih pen ahih hangin thuhoih pen thulemtang pen cih dan khat zong a kisap mahmah hun om thei zel leh kilawm ka sa hi.

Gam vai minam vai biakna vai pawlpi vai kipawlna vai,…, vai tuamtuam tampite ah zong khentatna kalsuanna ngaihsutna khat peuh i neih ciangin a tunga zato kahte dan pianin I gamtat hun a omzel kha tam maw ka cici hi. Lian Tuang