A takpi leh upmawh thu (Fact & Opinion) ~ Thang Van Lian

A takpi leh upmawh thu (Fact & Opinion) ~ Thang Van Lian

1. A takpi a piang thei thu (Fact) pen: Amun a mual, a phazah, ani a kha, a thu a la, a hang leh a pianzia cian takin kikan thei leh kigen cian thei thute hi.

2. Upmawh a piang thei thu (Opinion) pen: Kici veh aw, tuaci thei kha ding… ci-in uang gen gawp, tawilawn gawp, behlap gawp, phuah tawm leh behlap gawp vive hi zaw napi a piang takpi thei ding dan a huzap gawp, lauthawngsak gawp, lung hiang sak gawp… cih dante hi.

Mipi a huzap thei thupiang/thuthang/thukigen khat a om ciangin a takpi mah maw upmawh leh deihkaih, uang gen thu hi zaw… cih khensiam theih ding thupi mahmah hi.

Gentehna:

1) Tukum (2015) July kha pan kipan Tedim gam leh Tonzang gam ah antang a kipan nek le dawn, datsi haksa thei kha ding hi. Ahang in tuate hong paina lampi khat bek i neih sunsun min kicim a, mundang pan tu leh tu-in hong lut pah theihna ding om lo hi. Tukpi hun guahtui kiat hun ahih si tawh kha khat sungin lampi kibawl pha kik zo pak lo ding, cih kitel hi, kician sinsen hi. FACTS ARE CERTAINTIES.

1) Tukum (2020) March kha pan kipan US gam sungah antang a kipan nek le dawn, nisim zattawm vante haksa thei kha ding hi. Antang a kipan inn sung vanzat ding kiging khol un… ci. (Corona virus paulamin mi teng lauthawng sak, patau sak gawp in thukan lo, laisim lo teng leh khuak zang lo teng in um pah, linglawng pah seuhseuh. Lampi kicim/kikhak, khuahun sia, gal kidona nasia lua, cih bang prove nading athu a la lah om lo).

Mi khat in, “Nang lau lo maw, patauh huai sa lo maw… cih tawh hong nial nuam le uh lah hong nialna ding uh om sak thei ding uh. Ahi zongin kinial taktak ding hi le hang facts tungah kinga lo ahih manin hong pum nial gawp loh buang siksan nei thei lo, argument prove thei lo ding uh hi.

Mi khat in ko kiang Sam’s Club ah antang bei ta hi, ci-in Photo, news, video hong lak thei kha ding hi. Ahi zongin ama hong lah pen USA gambup Sam’s Club sumbukpi 662 bang a omna sung pan sumbukpi khat hi pan hi. Hong laktel thei mi 10 a om leh zong 10 hi pan ding hi. Sam’s Club sawm ah van bei leh adang 652 ah om lai ding a, amau vanlakna lampi min kicim in hong pai thei nawn lo ding, company zong khawl ta, cih bang a om kei nak leh antang leh nisim vanzat kisam hangin mipi patauhna ding om lo, cihna ahi hi.

US gam sungah nektawm ding leh inn sung vanzat kisam diakte zuakna Sam’s Club bekbek 662 (2018), Walmart sumbukpi 11766 (2018), Kroger 3514 (2019) om lai hi. A dang hi dante zuakna sumbuk tam cih takin tam lai hi. OPINIONS ARE DISPUTABLE.

Tua bang mah in nupa kal vai, lawm kingai kikal vai, teek leh mo kikal vai, makai khat leh khat kikal vai, Pawlpi khat leh khat kikal thute ah zong a takpi thu maw upmawh phuah tawm thu… cih khensiam huai mahmah hi.

Lau pah laplap, heh pah baubau, patau pah daidai, um pah buatbuat… cih pen paikhialh ol mahmah a, Pasian um taktak lo leh laisim ngei lote dan hi zaw hi. Thang Van Lian