A manpha Jesu Khris ~ Dr. Ngul Khan Pau

A manpha Jesu Khris ~ Dr. Ngul Khan Pau

(I PETER 2:7) Lausanne Congress 2010, Cape Town ah kei zong thugen dingin hong kisehkha ahih manin, ka zi Lucy Engjadim tawh ka pai uh hi. Tua leitung bup kikhopna kipatma in, kei sepna Development Associates International min tawh thusinna ka nei masa uh hi. Nitak lam thusinna neih zawh ciangin Dimnu tawh satpiang khawng lei dingin sumbuk lamah ka pai uh leh thakhatin mivom tangval khat in mipi lak panin Dimnu suaikhi a awhlai kaihkhiatsakin mipi kawmkalah mangziau hi. Kei a nung a zuipa in zong, “Hei,” ka cih leh kimu nawn lo hi. Tua suaikhi pen a Class 10 a zawh lungdampihna-in a pa’n a piak ahih manin, ka dah mahmah uh hi. Na manpha i neihte zong mitphiat kalin mangthei cih ka phawk uh hi.

Ahi zongin, a “manpha suangpi” ahi, i Topa Jesu Khris ahih leh guktheih, a mangthei hi loin a tawntungin amah a um mite adingin kip paisuak hi. Mikang latom in “Zanni, tuni a tawntungin Jesu kikhel ngei lo” na ci hi. Amah kibang tawntung ahih manin hong kep hong huaina le itna a tawntungin kibang den hi. I Lai Siangtho simna ah, “Amah a umte adingin a manpha suangpi” hi, ci hi. Tuni-in thu thum khawngin a manphatna thu i genkhawm nuam hi.

KUATE ADINGIN AMAH MANPHA HIAM? I Topa manphatna a um mite bek in telsiam hi. Amah upna tawh a en mite in Topa tawh pumkhat suah hampha kisa-in, lungdamna tawh kidim uh hi. Up lohna in Jesu Khris’ manphatna hong musak lo bek hi loin amah biak ding zong haihuaisakna hong pia hi. Kham le ngun khawng zong a thei lote’ adingin suangtum tawh kibang a, khut sungah tawikhin napi’n pai veve uh hi. Topa manpha cih thadah “ciamnuihna” ciang bek khawngin tuhun ciangin kizang hi. Gamkhangtote khawng ah “Jesu Khris in Topa hi” ci-in pulak leng haihuai a sa tam mahmah khin zo hi.

Vantung mite’n a telzawh loh thu ahih hangin thu-um mite adingin manpha hi. Pasian tapa’ sisan tawh tatkhiat kisam lo vantung mite’ adingin Topa Jesu pen kumpi bangin bia uh a, ahih hangin gumpa-in thei lo uh hi. Nang le kei i hamphatna ahih leh Jesu Khris i kumpi le i gumpa-in i sang uh hi. Tawntung sihna panin hong honkhia ahih manin tua mahmah hangin manpha i sa uh hi. Thu-um mi khatpeuh dong leteh, Pasian vangliatna lamdang a sak sangin itna tawh a hotkhiatna lamdang sa gige uh hi. Bang hangin Vantung ah Pasian kiphat cimthei lo ding hiam cih leh, nang le kei hong tatkhiatna mahmah lamdang kisa den ding hi.

Leitung mite’n tel lo uh ahih manin a manphatna thei lo uh hi. Khris sungah nuntakna i neih ciangin i khalam mit hong kihong a, khuamuhna i nei uh hi. Tua hangin manpha ahihna kitel semsem hi. Nupi khat a taneu meisungah puk ding a dalna lamah ama’ khut langkhat in meisung sawksuk hi. Mei in a khut limkhat lua mahmah ahih manin a khutmete tang thei nawn loin kawi lingleng hi. Amah a maizum manin tua khutmete puan tawh tuam gige a, mite’n a muh ding zumhuai sa hi.

Ahi zongin a taneu hong picin ciangin a nu khut thu a kicingin hong zak ciang, “Nu aw, mite muhna ah na khutmete hoih kei kha mah in teh, ahi zongin kei adingin etlawm mahmah hi,” ci hi. Tua mah bangin Isaac Watt in, “Vanglian Kumpi pa hong sihna a singlamteh ke’n velvel leng, kei hauhna kei kiphatsakna, ke’n tu’n bangmahin sim nawn ke’ng,” na ci hi. Tua singlamteh tul gemgam pen a etlawm penpen hong suak hi.

BANG HANGIN AMAH MANPHA HIAM? Lai Siangtho in, “Tua ahih manin no a um mite adingin amah a manpha suangpi” na ci hi. Amah a um eite adingin amah in innkiu suangpi hong suak hi. Innkiu suangpi a kicih ciangin inn kingakna a bulpi kipna suangpi hi. Topa pen innkiu suangpi bangin na neih leh na kip paisuak ding hi. Late 125:1 sungah, “Topa a muang mite pen ling het loin a om tawntung Zion mual tawh kibang hi,” na ci hi. Topa “muang” cih le “kinga” cih a kammal mun tampi ah kizangkhawm kawikawi hi. Topa ah a kinga mite kip tawntung ahihna i mu hi. Na bulpi amah ahih leh khemna huihpi, haksatna tuihual in hong nawk zongin na kip ding hi.

Ama nuntakna panin i muh theih phawk ding tampi om hi. Topa in vantung nopna nusia-in nang le kei hong zong hi. Kum 30 sung Nazareth khua ah leitung seplebawl hong nei-in a ulenaute ama khut tawh na vak hi. Pasian, mihing ahih hangin khualetuite adingin a pha bawlin, nasep hahkat, lawmlegualte’n zong a it mahmah uh ahih lam kimu hi. A piantung a kipanin Satan in koihkhiat theih nading na zong hi.

Singlamteh ah tatkhiatna nasep a sepma amah buaisak ding bekbek na gel hi. A nuntakna panin gamtatpha sin ding i nei hi. Amah zong nang le kei mah bangin ze-etna le khemna na thuak hi. Ahi zongin mawhna khat zong nei lo ahih pen ettehhuai mahmah hi. Ama pianna nu zong singlamteh tung panin a kem dingin Johan tungah ap hi. Sih ding kuan nangawnin a nu adingin vaihawmsak lailai hi.

Gamtatpha pen ettehhuai cih i gen khin zo hi. Ahi zongin Jesu Khris gamtatna bek a thupipen hi zenzen loin, nang le kei adingin ama’ nuntakna hong piakkhiat tua mahmah thupipen hi. Gamtatna tawh i ngah zawh ngei loh ding tawntung nuntakna a khawngkhongin hong pia hi.

A MANPHATNA I LAH THEIH NADING: Amah a um mite adingin manpha ahihzia lah theih nading nam tuamtuam om hi. Tuate lakah nam guk genkhawm lai le’ng ka ci hi.

Khatna, amah manpha na sak leh thu-um nai lote kiangah thalawp takin pulak in. Bang hang hiam cih leh manpha i sak i lungdamna lian mahmahte mite kiangah gen ding kingaklah hi. Thupi i sak khol lohte bel kuama kiangah zong kikum nuam vet lo hi. America gam pai dingin visa i ngah ciang, i muh peuhpeuh kiangah i visa ngah thu i gen nop bangin, Jesu Khris in a manpha penpen, a lungdamhuai penpen na cih leh a thei nai lote kiangah i gen ding eima vaipuakna hi.

Nihna, leitung nate sangin amah i lunggulh zawk tawntung ding kisam hi. I lunggulh thute sunlezan kingaihsun tawntung a, i lungsim hong luah ahih manin kikupna khat peuh om leh eima lunggulh i genkha pahpah uh hi. India gam Kala minamte, Sente khawng in sumlepai a zonzia uh i et ciangin sum mah lunggulh penin nei uh hi, cih theih hi. Suangkhuk tote bangin a nuai lamah suang manpha om ding lametna tawh hanciam takin nasem uh hi. Laphuak Dr. Lowell Mason in, “A manphapen suang ke’n mu ing, lungdamin la kasa, Jesu kei-a’ ci’n lasa ning. Khazih la-in sa ning,” na ci hi.

Thumna, ama’ mite tawh kikholh teelzaw hamtang ding. Pasian a it mi na hih leh ama’ mite zong na it ding hi. Muh theih loh Pasian ka it na cih a, na mit tawh na muh theih ama’ mite na it kei leh zuau gen na hi hi. Ama’ mite it bek hi loin kikholhpih ding kisam mahmah hi. Pasian mite nih le thum omkhopna ah Pasian gam kimu hi. Innkuanin thungetna i neih khop ciangin Pasian gam malepna ahi hi. Thu-um mite tawh kikholh ding bang hangin kisam hiam cih leh, na lawmte’n na nuntakna hong zo teitei ding ahih man hi.

Lina, ama’ thulela sungah nuam sa ding. “Ka gengen ding hi, ka sasa ding, hong honpa phatna sun niloh in,” ci-in Fanny Crosby in na phuak hi. I gengen ding le i saksak ding pen amah phatna mah hi ding hi. Khatveivei amah gen loin, amah phat loin ei le ei i kiphat, i kigen ciangin eima minthan nading a kizongzaw tawh kibang hi. Thawng Kim’ la phuah bangin, “Na thu sungah Topa kei hong kha in” i cih ciat ding kisam hi.

Ngana, kisapna a om leh ama hangin thuakna. Tuhun ciangin Jesu Khris zuihna pen bang metpih ding ka hiam, hih leitung mahmah ah bang lawhtak ding ka hiam cih lam tawh kinungta hi leh kilawm hi. Topa na zuih taktak leh singlamteh pelh theih ding hi lo hi. Thu-um masate’n thuakna tawh a zuih Topa, tuni-in ei hun ah zong supna baina tawh i zuih ding thupi hi.

Topa adingin i supna le thuakna peuhmah metna hi tawntung hi. Ahi zongin thuakna kilamet masa lo ahih manin, i thuakkhak ciangin lamdang kisa thei hi. Tua bek hi loin, “thupha kipiakna” ah kihelin thupha tampi mah lamet i neih hangin ngahna sangin paihna tamzaw, sumbawm nuailam vang tawh kibang mi tampi om hi. Topa in hong piak ciangciang tawh lungkimtakin zui photphot leng ama’n hong pia lo ding hi lo hi.

Gukna, nisim ama’ tungah thungetna nei kawmkawmin hong paikik ding lametna nei ni. Leitung ah teng ihih hangin tunglam ento kawmin i nuntak ding ahi hi. Thungetna lam hahkat mite Topa in amau’ nuntakna ah na lamdang sepsak tawntung hi. Na thunget nuntakna na et ciangin na lung a kim maw? Topa tawh na kikholhna nuam na sa maw? Rev. Dr. J.M. Ngul Khan Pau

• Charles W. Fry in i Topa Jesu Khris manpha a sakna hih bangin la na phuak hi:
• Deihna khempeuh a kicinna, Lawmpha Jesu nei ing
• Kei ading tulsawm tulthen sa’ng hoihzaw hi
• Zangkuam Unok paak zah a hoih, Amah bek ken mu ing
• Dam na’ng, sian na’ng ka deih teng A sung om hi
• Dah hun ciang hong hehnem in, haksat ciang bukna hi
• Na vangik khempeuh hong suan in hong ci
• Amah Zangkuam Unok paak hi, a taang Zingsol zong hi
• Kei ading tulsawm tulthen sa’ng hoihzaw hi.