A lamdang le a etteh tak innkuan (3) ~ Lian Tuang

A lamdang le a etteh tak innkuan (3) ~ Lian Tuang

12) 1994 kum sia Kam Khaw Thang Yangon pan Tedim a ciah toh khat a thupiang ahi hi. Vai tuamtuam tawh kawlpi ah ni nih ni thum sung tam hi. Siavuan Hang Khan Thang zong a zin tawh kituak kha hi. Kawlpi ah a zin tunna uh kibang hi.

Sia Thang pen Seihkantha venga teng nu Niangkok (a sanggamnu tanu ) in nitak an ne sam hi. Nitak an nek khit sia Thang ciah ding a kithawi ciangin nu Niangkok in “ Pu Thang aw ka tanu a ci sa lua mahmah in thu ong nget sak ve,” a cih leh Sia Thang in “ ci sa pen thu nget ding zong hi mah in, sep ding a kisam pawlkhat om ding hi veh aw” ci kawm in pai khia vingveng hi.

Thu nget sak se loin hih bangin a nusiat ziau ciangin lamdang sa mahmah hi. Ama deihloh gen khialh sep khialh khat nei kha ka hiam ci in nu Niangkok kisuang mahmah hi. A langkhat ah a tanu cina gim mahmah hi cih thei gige na pi hih bangin a nusiat ziau pen khasia dekdek liang hi.

Ahi zongin tua zawh nai khat khit khawng ciangin khua-ul ziat le vei kai zihziah in siavuan Hang Khan Thang tawh sia Thang tung kik leuleu hi.

Sia Thang in naupang ci sa pen zato lam siavuan siamah ten sep theih khat nei ngel ding hi cih ngaihsutna tawh a zin tunpih pa siavuan Hang Khan Thang a va sam vingveng na hi gige hi. Siksakol zang loin khe tawh pai ngiatngiat hi. Khua mial khin ta hi. Apai kik ciangun lampi tel khial gawp in, Nu Niangkokte inn mu pak zo lo uh a, a kilehleh na un khua-ul ziat le vei kai in a kawtkim ngiingei uh ahi hi.

Siavuan pa in naupang gimsa mahmah ahih manin zatui sun pah in, a nek ding zong zatang pia beh hi. A zingciang amah zin kik ta ding ahih manin kawlpi zatopi ah a pai hamtang na ding vaikha hi. Tua khit ciangin a zin uh ah a nih un khe tawh ciah kik uhi.

A zingciangin naupangno nu zato kahpih hi. A sawt loin dam siang hi. Tua naupangno in tu in pasal nei khin in ta thum nei ta hi.

Nu Niangkok in a gen ciangin tua hun laitak in naupang ci sa lua in gim mahmah ahihna a veng le pam te in a gen kik ciangin ka thei tel pan hi ci hi. Tua nitak in Siavuan Hang Khan Thang le sia Thang in veh kha zenzen lo hi leh a sihsuah thei mai ding dinmun ahihna gen thei zel hi.

Hih thu I gen kik ciangin vai khat peuhpeuh ah Pasian muan ding a thupi pen ahih mah bangin mihing lam panin zong lampi man tawh sep ding a kisam thu pawl khat om veve na ahihna a gen nuam I hi hi. Lian Tuang