A Khatveina Zozaang Khua ah Zomi Nam Ni bawlna

A Khatveina Zozaang Khua ah Zomi Nam Ni bawlna

A (67) Veina Zomi Nam Ni Ong Piankhiatna
A (67) Veina pen Zozaang khua ah a khatvei bawlna hi pan hi. Hih bangin Zomi Nam Ni ih bawlna ah Zomi Nam Ni Ong Piankhiatna gen dingin hun ong seh hausapa Sya Tuan Khan Kap le naseppihte khempeuh le Zomi Nam Ni ah hong kihel a kuamaciat tungah lungdam thu kong ko hi. Pasian in kaal khat sungah Ni khat ama’ Ni dingin koih a, tua mah bangin Zomi Nam Ni dingin zong kum khat sungah Feb 20 ni ong pia suak hi. Namdangte in zong Minam ni nei ciat uh hi. Zomi te’ makaipi Pu Gin Kam Lian in Politics uk teng in Pasian’ thu gengen, Pasian’ nasem tengin minam thu gengen a cih bangin, biakinn sung khawng ah politics khawng gengen ding hi lo a, tuni Zomi Nam Ni in ih gengen ding ih suutsuut ding ih pahtawi ding hun ahi hi. Zomi Nam Ni in na zothaute lawn in, na taamngaite tum in, na khuangte, na zamte, na daaktalte, na sialkite na tum ding Ni ahi hi. Na zopuan na zonikte na teen ni ding ahi hi. Na zolamte, na zolate sak ni ding ahi hi. Tuni in Zomite adingin Topa’ ong piak ni hi.

(67) vei kibawl khin a cih pen 1948 kum panin simtoh hi a, 2015 ciangin (67)vei ahi hi. Himah taleh a kibawl taktak pen ka theih khialh keileh (31) vei khawng bek kibawl thei hi. Zomi Nam Ni amasapen in Midat khua ah Feb 20 1951 on Tuesday ni in kibawl hi. 1948, 79, 50 hih kum thum sung kibawl lo himahtaleh Zomi Nam Ni pen 1948 ni pan a kibawlin kiciamteh hi. Ahang pen 1948 January 4th zingsang nai 4:00AM in suahtakna kingah a tua kibulphuh hi ding hi. Tua kumin a kibawl pah loh hangin Minam khat ih hihna tawh ei zong Kawlte tawh suahtakna a la khawm ih hihna kibulphuh na hihleh kilawm hi. 1950 kumin Zomi Affair Council (composed of 14 members of Parliament) in Mi Nam Ni bawl ding a na geelna uh tungtawnin 1951 kum ciangin ih gens amah bangin hong kibawl ngawngaw ahi hi.

1951 kum panin 1974 dong Zomi Nam Ni maan takin kibawl hi. Tua laitakin Jan 3, 1974 kum on Thursday ni in Chin Special Division hong kipia hi. Tua thu bulpuh in Galkap kumpi in Zo Gam Ni (or Chin State Day) cih thu tawh Zomi Nam Ni (or Chin National Day) pen hong nuhthual uh a, 1975 kum pan 1980 dong (6)vei kum 2012 a nunung pen Zo Gam Ni (Chin State Day) kibawl lai-a a kigawm 7 vei bang Chin National Day ding kim lai Chin State Day tawh hong kinawngkai sak hi. Tuate’ kawmkal ah bawl khuan hong kipiak loh kum zo a na om toto ahi hi. 2013 kum ciangin Zomi Nam Ni (Chin State Day) kibawl kik hi. 2014 zong kibawl hi. Tu kum 2015 kum tawh Minam Ni (National Day) min tawh 24 vei bang kibawl a, Gam Ni (State Day) min tawh (7)vei bang kibawl man hi. A kigawm kum (67) sung panin (31) vei bang bek a kibawl suak hi.

Suantakna ngah zawh
Suahtakna ngah zawh kha nih khitteh kumpi masapen Shante Soa Shwe Thaike Shan gam a zinna pan Zogam Falam khuapi ah ong pai hi. PM masa pen U Nuh in ong zuih loh hangin, Menzi pipa in ong zui ci hi. Falam khua ah Feb 18-20, 1948 sungteng kikhoppi kinei hi. Feb 20 ni ciangin thukimna khat nei uh a, Zomi Nam Ni bawl ding ahi hi. Feb 19-22 sung teng Capt Pu Mang Tung Nung le U Vuanto Mawng te’ makaihna tawh Minam Ni bawl ding kikupna panin thusung masa pen Tuithang khua Pu Thang Za Kap in 1896 kuma Mangkang kumpi in hong bawl sak ki ukna Chin Hills Regulation Acts siahtung siahphei kaihnate zang lai mawk ding ih hi hiam cih thu a sunteh hoih kisa in mee kila a, Pu Chin Sian Thang’ genna ah mipi 5217 lak panin a nial 17 bek om ahih manin tua ni in siahtung siah phei kibei sak kisi sak a, Zomi Nam Ni bawl ding kinungta sak hi na ci hi. Pu Thang Za Kap mah bangin Zomi te in zong Lotdaw sung khawngah a kilawm hunin kam khat kam nih ih pau ngamna in ih minam ading manpha mahmah ding a, tua mah bangin hun lui a ki uk zia hoih lo a sisa thute tuni in khang thakte in ih phot kik kik loh ding ahi hi. a zom om lai-in tua zah ci phot ni…

Evan. Suang Dal