ISIS galkap alutsawm Malaysia numeino kum 14 aphapan khat kiman

ISIS galkap alutsawm Malaysia numeino kum 14 aphapan khat kiman

ISIS migilo tetawh nasemkhawm dingin azinkhiatsawm Malaysia gammi numei kum 14 bekbek aphapan khat kiman cih Inspector-General of Police te’n zanni in genkhia hi. Tuaban ah hih numeino in IS tetawh kipawlkhopnop nading alunglut theihtheih nadingin apantah leh sumlehpaai tawh apanpihpa zong kimankhia cih kiza hi.

Tua numeino pen Malaysia KL International Airport panin Egypt gam zuandingin amahguak alenkhiatsawm laitak, KL Airport panin akiman ahihi. IS galkap lutding akiman lakah akhangmoi penpen hiding cihzong Malaysia Police te’n genkhia uhhi. Ahi zongin tua numei ii amin apuam leh anungpan apanpihpa ii amin apuam te mipi theihdingin bangmah tangko khianailo uhhi. Hih numeino leh anungpan apanpihpa anih un dan tuakding uhhi.

Hih numeino pen amahguak Malaysia gampan in Egypt gam ah vanleng tawh alensawm hi a, Egypt gampan in Syria gamah tembaw tawh akanpheisawm ahihi. Numeino khatguak Egypt gam zuanding himawk ahih manin, tuapan in Police te athuteng akankhia, amukhia uh ahihi.

More: Malaysia ah Kawlgammi nasemding kipuaksawm nawnlo ahih manin FMM te patau

Deputy Defence Minister Datuk Abdul Rahim Bakri inzong Malaysia gamsung aom nulehpa te kiangah natate hoihtak encik un, agamtat aluhek uh encik un ci’n limvaikhak mahmah hi. Malaysia gampen Muslim gam ihcih zenzen hangin hih ISIS (Islamic State in Iraq and Syria) te ii gamtat pen tha piahetlo uh a, tha apiasim tezong a limkankhiat mahmah uh ahihi. ZD Sawltak #zomidaily