1st ZOMI FORUM

1st ZOMI FORUM

23 August 2014 – Khatveina Zomi Forum pen Environment Conservation & Community Development & Society (ECODS) makaihna tawh Zangkong Y.M.C.A. ah mi 300 kim pai khawmin kinei hi. Hih thu pen August 24 pan kipan tu dong mah Weekly leh Daily Journal minthang khempeuh ah suak sak zihziah hi. Hih Forum ah holimna a neite pen: Rev. Dr. Pau Khan En, Pu Cin Sian Thang leh Pu Hang Za Thawn-te ahi uh hi.

Gam sungah a omte leh leitung gam tuamtuamte kipumkhatna ding pen Sia Enno in genpi pen in nei hi. Kipumpiakna lam tawh kisai-in Jesu in vantung nopna nusia-in ei a dingin hong kipiak mah bangin minam adingin tua Jesu lungtang mah vom ciat ni, cih tawh Sitnipa in lim gen pen hi. Leitung gam 180 lak panin Kawlgam dinmun: Cidamna lam, Pilna lam, Nek leh dawn zonna leh khantohna tuamtuam gam dangte sangin i niam zawk laina thute kician takin Pu Thawnno in hong gen hi.

Mailam ding tawh kisai-in, Kachin, Shan etc. pen namdang tawh teng khawm ahih manun khut khat tawi khe khat khai a bat ding uh haksa mahmah hi. Tua nangawn zong kigawm khawm zo uh a, pang khawm thei uh hi. Zomite zong hahkat le hang i gam ah ei bek kitengin namdangte tawh kiteng khawm het lo hi. Khatvei lai-in Ghana gam leh S. Korea gam pen dinmun kibang hi ngei uh a, gamdangte huhna tawh a nungta uh ahi hi.

Ghana aih leh tu dong mah gamdangte huhna bek tawh nungta lai ahih manun tu dong kilamdanna om lo hi. S. Korea aih leh amau leh amau kimuangin ngaihsut leh sep thuahin gamdangte huhna tawh kivak ding sangin a huh lam hih zawkna ding hahkat ahih manun, tu hun ciangin a khangto penin i theih Japante nangawn hong khengto ding hi ta uh hi. Singapore bang en pak le hang a gam sungah bang mah piang lo a, tui dawn nangawn Malaysia gam tui dawn uh hi. Aih hangin gam khangto pen leh gam nuam pen hong hi ta hi.

I pute pate hun lai-in innkong tawh kikalh ngei lo a, guta leh gamtat sia om loin, cihtakna tawh na nungta uh hi. Tu hun ciangin innkong honsa-in kikoih ngam nawn lo a, sum ngahna ding khat peuh ahih naak leh i pianpih sanggamte nangawn kilang pan ngam ta hi. Hite bang lungtang neihna in i khantoh ding hong khaktan ahih manin, khangthakte in i pute pate cihtakna leh thukhual nate mah let kik theih ding hanciam kisam bek hi loin, midang huhna sangin eimah leh eimah hanciam ciat le hang i khangto baih thei pen ding hi, ci-in Pu Thawnno in gen beh lai hi.

Dotnate dawnna:

1. Minam masa zaw maw a min?

Dawnna: Zomite in i suakma nangawnin min phuak kholte i hi hi. I piankhiat ciangin a nek ding, a dawn ding leh silh ding ten ding sangin, a min bang phuak pah ding cih pen i ngeina ahih manin min thupi masa hi, ci-in Sitnipa dawnna. Minam leh min khentuam theih hi lo hi. A nih in pum khat sakhat ahih manin a tonkhawm ding ahi hi, Sia Enno dawnna.

2. Zomite ukna tuam in om ding vai?

Dawnna: ZCD in Zomi a cih ciangin Zogam bup (Chin State huam ahih manin, tua bangin kikhenkhiat ding kingaihsun ngei lo a, tua bang a gen kha a om leh zong mimal ngaihsutna hi lel ding hi. ZCD in tua bang kingaihsun ngei lo hi, Sitnipa dawnna. GZA in gam sung/pua ah a om Zomi a kici khempeuh huamkimna dingin kipawlna hi a, kituam lakna ding hi lo hi, Sia Enno dawnna.

Hih Forum ah a paikhempeuh in thupi kisa-in zaknop zong kisa mahmah ciat hi. A thu kicing zaw in ECODS in DVD tawh hong hawmkhia lai ding uh hi. Hih Forum pen August 24 pan kipanin kawllai tawh suak zihziah ahih manin, en lah kawllai tawh thukizakna kinei zo nai lo ahih manin, i sung thu namdangte in hong theihna dingin tangkona thupi hi, ci-in kiciamteh hi.

Hun khakna dingin, “Hih ECODS pen British Council ah Chin Club min tawh Nino ni simin mikang pau leh lai nai khat sungta sin detna ah panin hong piang ahi hi. A lungngulh na om uh leh a kuama peuh Nino simin matpongten pua in hong pai le ucin kingah hi, cih tawh Siambawi in holimna khakna hong nei hi. Zo Aw