ZYA Zuminn lam khawmni

Zomi u le nau, nu le pate aw, Zomi Khangno Kipawlna ZYA Kalaymyo Zuminn le huang umna bei ding vekpi pen Engineeringte in Ks. 90207950/- ding in hong tuatsak uh hi. Hihpen mihau khat in zong lamzo ziau thei ding himah le Zomite neihsa icih theih nading in pangkhawm in lamkhawm ding in kong zawn phapha nuam lai uh hi.

Leitungbup Zomite sungpan Ks. 20,000/- (Khawk-1) apiakhia zoding mi 5,000 (Khawk-5000) om hileng ZYA Zuminn kizo siang ding hi. Tua ahih manin hih Zuminn ading khatvei Zomite thasan ciat lai ni ci in kong zawn phakikkik uh hi. Tuni ciang kamciam le ngahsa teng tawh nasepna photo hong khah khawm ung.

Kam Suan Mung

16zyafund

ZYA pan huh ngetna

Zomi ulenau, nulepate aw Zomi Khangno Kipawlna (ZYA) pen 2005 kum in Kalaymyo pan hong piangkhia aa kumpi ciattehna ngah (Regd. No. 2172/2013) Zomite ineih sun kipawlna hi. Tuni ciang Kawlgam sung ah ZYA omna Khua/mun 97 kipha ta hi. ZYA in tuni ciang dong nasep kizom toto thei in Department 5 tawh kikal suan hi. Nasep atom a pulakna.

1. Literature & Culture Department – Kalsim Laihawm kihawm den in copies 2100 ta kihawm khia hi.

2. Health Care Department – Sisan thawl 1715 kipiakhia khin, Oxygen bung 771 kikawm khia khin, Motor in misi/cina puak 650 vei kizang khin, Siluang pham 12, Mimang 7 muhsak, Miliam don 105 vei cih teng bang kisem khia hi.

3. Relief & Development Department – Tuikhan lai in Leitungbup a om Zomi kipawlna tuamtuam pan, Biakna pawlpi tuamtuam pan le Mimal tuamtuam pan i piakkhiat Ks. Tein-1,200/ bangtawh cimawh dongtuakte tung huhna kihawm sawn sak thei hi. UNICEF & IOM tawh zong partnership in nakisem hi.

4. Education Department – Kawlgam tan 10 laihuan na ah piltungtuang zawdeuhte pahtawina Kum 3 kinei khin in Pahtawina sang Mimal 380 bang phakhin hi.

5. Sport Department – Kimawlna lam pen ZOFA in hong hanciamna uh tawh kumsim Bawlung kimawlna kinei thei in tua tungtawn in tuni ciang Myanmar Selected ah mi 2 le Myanmar National League ah mi 15 bang kipuak thei khin hi.

Kum 11 sung bang nasep nate ah zum inn kisap kawikawi hi a Zum neihzawh nading hanciamna in ZYA Fund zonna ahun zui in ih bawl tohtoh napan Ks. Tein-600 man innmun khat (75′ x 70′) Aungzabu Street tung ah i neizo ta hi.

Zomi ulenau, nulepate aw hih innmun pen ahuang kia hiphot ahih manin zuminn, motor buk cihbang in building hong kisam to leuleu ahih manin anuai a budget gelna te pan in mimal/ pawlpi/ kipawlna pan ihih zawh zahzah tawh i Biak Pa Pasian i itna, i zahtakna, i Minam Zomi i itna tawh in i hanciamtek nading zahtakna lianpi tawh ZYA minin huhna kong ngen uh hi.

Committee bup aitang in,