Zudawn danding ~ Pu Thangboi

Zudawn danding ~ Pu Thangboi

Zudawn te’n theih ding leh kidop ding thu tampi om a ka phawkkhak vat pawlkhat ong hawmsawn ing.

– Zu ih dawn ciang in damdam in dawn ding hi. Zulimte bang tawlkhat muam phot leng namtui mahmah hi. Tua hileh azu zong nem tuam in ih kham dan zong nuam hi. (Zu thaldawn vat khawng pen ulian vailo lua hi).

– Zukhauh ahih nak leh tui tampi dawn ding. Atawmpen azu i azah thum peuhmah dawn ding hi. Tua hi leh ih sin in thuaklo zawdeuh tuam in azing ciang in ih thuakdan nuam zawdeuh hi. (Zu ne leng zan ih khanlawh ciang khawng a ih dang atak ngeungau pen tui bangzahta a kisam cih hong lak gige ahi hi).

– Sikhang, sikhum leh gout nei te’n Zozu, bear leh zuning nek vetloh ding ahi hi. Sih baih nop leh lah nek mengmeng lel ding hi.

– Sikhum nei te’n aduh vauvau leh zukhauh pep li (4 shots) ciang nektheih hi.

– Zu ih nek ciang in ameh om hamtang leh hoihzaw hi. Sa tawh meh bel hoihlo hi. Zu lak ah sa diah leng amuat theihloh mah bang in ih gilsung ah na tuaci ding hi. Tua ahih man in mehteh mehgah tawh meh leng hoihzaw hi. Tuikawlkai teh (water crest) hoihpen hi. Gu lamsang zo mahmah hi. Azing ciang ih sung paidan nuamsak hi. (Tampaza dan athuk nam peuhmah tawh mehloh ding hi)

– Zukhauh ahih leh tuikhal (ice) tawh diah leng diahloh sang hoihzaw hi.

– Ameh sawkna ding in ciangkang nazat leh alaizang pan in len kei in hong kineumuh ding hi. Sen te’n ciang tawh an anek uh ciang en giugiau lecin abul pan len uh hi.

– Wine pen ahai dim in kuamah in sung ngeilo hi. Milak ahih nak leh alang sang atawm zawdeuh sung in. (Zu zong atamzaw in tuaci zat hi).

– Zomite lobuang zunek zawh azingciang khawng a azunekna thu akikum leh agen kikkik kuamah omlo hi. Zunek thu khawng gen kikkik pen haivai mahmah hi.

– Zuphual ah innkuan sung thu khawng sunkhiat ding hi zenzen lo hi. Nasepna vai peuh gualnop theihna vai peuh gending ahi hi. Mipilte’n vai thupi taktak genna hun in zangzaw uh hi. (Khanglui te’n zong vai thupi mahmahte ah zu tawh thu nagen uh hi).

– Zu pen zing tungtung a nek ding hi zenzen lo a, nasep man ciang lawm leh gual tawh kithuah theihna khawng a zatding hizaw hi. (Zing tungtung thophet zune te’n bel kum tam nekhalo uh hi).

– Zulung vei ih cihte pen alungvei hizenzen lo a, ahai ahi hi. Zu akham ciang a akitom vangvang theite pen kham takei leh zong kitom thei hi. Leitung ah mipil zulung vei cihbang omlo hi.

– Zu nek ciang in lu le taw phawklo liang a nek pen akhiatna om nawnlo ban ah haivai mahmah lel hi. Na kikep zawh ciang kan ne peuhmah kei in. Tua val kimanna khat zong omlo hi.

– Zu nakham luat leh niangphan tuilum dawn in. Phatuam hi. Luakhia thei leng zong ih ci zangtuam hi.

– Adang tampi omlai in cia. Zunek hoih asa lua a hih lai hong gelh kahi zenzen kei hi. “Zu ne ken!” kicih khawng azadah omthei aihteh ci a anek dan hong gen vet ka hizaw hi. Nekei leng bel hoihpen hi. Zong kimet pen hi. Ei’ ading bek hilo in ih kim ih pam ading in zong hoih hi. Buaina tawmtuam mahmah hi. En nekei ziau leng leitung ah zune khat akiam hipah hi.

– Duh pipi a dawnloh ziau pen pasal vai mahmah hi. Kidek zawhna leh kikep zawhna himhim pen mi ginate’ zia ahi hi.

– Mi’ muhna ah a etlawmna ding a ahoih dan khat a om sangin hoih takpi sawm leng kimet zawtham hi.

Gen khialh a om leh ngaidam, Note’ itna sungah: Mung Laan Thang, Tonzang, Zogam