ZTK-2 Taangkona No. 4

ZTK-2 Taangkona No. 4

No. 4. United Nations declaration on the Rights of Indigeneous peoples (UNDRIP) khenpi 36 na aa pulak bangmah in gamgii in ong khen India gam aa om ka Zomi pihte uhtawh suakta tak in kikawm tuah theih ding Kumpi thuneite in amanlang aa nong gelsak ding uh ka lunggulh mahmah uhhi.

Zomi ulehnau,
2015 April 20 zingtung Lamka pan aa ong hawh i sanggamte akiciahsak kik ciang,
“Banghang in Zogam pan Zomite kihawlkhia aa namdangte omthei hiam?” Tedim Nupite’ lungsim siangtho tak aa tamlawhna ahihi.
Hunkhat lai in, Ciau min a kilawh leh hangsanna, tungtuanna, pasal pha hihna, gal leh sa lu simna, Ciau lumsuang hitaleh tuhun ciang banghang in kikhenna, guampi, luipi suak hiam?”Ciau gaalte”,
Laphuaksiampa in, “Zin ii khen hiam Sianmang khenhiam ” naci aa tuni in nupite tamlota uhhi.
Laphuakthei hileeng i phuahding tampi om aa minsial thei hileeng i kammal ding tampi omdinghi.

I Zogam lei i mansuah tuma kum 100 val laipek in Pu Mangson (behmin) te’n hihbangin la naphuak uhhi.
a. Tuan aa pupa siam aw ee kei ei siam aw, hei ah gamgii suang nei phuhta ei maw.
b. Hei ah gamgii suang nei phuhta ei maw, von tawi sanggah mualhem vataai taning.
Mitamte kigawm zaw taleh banghang micii tawmte kikhen sese ihihiam?
Nidangin midangte kamawhsak aa, tu in ahihleh kei mahmah kakimawhsak hi.
Kawlte in, “No leh no kiheek kei le uhteh ko ong awlmawh hikei ung” ong ci uh aa Vaite in ong phawkkha hilo uhhi. Ciau lui in ong awlmawh kha hikei, Sian ii khen hikei zin ii khen zong hituan khang!

Zomite lungtang ginalo, gina mahmahlo ahihman ahihi. Gamgii in ong khenloh hang, Kawlte in ong khenma, Vaite in ong khenma, Zomite lungtang puak akikhenkhin ahihi. Kumpi thunei te’n, “Ko ong awlmawh kha hikei ung, tu mahmah in Tedim khuasung ah zong le ung tampi omdinghi” ong cih uhciang ka zumtha ong suak peuhmahhi.

Tutung ZTK-2 ah Suangzang khuate ki inntek, kipaak peuhmah uhhi. Sizang kampaute kisathei peuhmah uhhi. Zinmangpi Rev.Dr. Ngul Khan Pau (JM Paupu) hi aa hunkhat lai in a pute Suangzang ah, Khuasak pan aa lal ahihman ahihi. Angtang tuam hang, ki-it kingai mah hang!
Dr Cin Khan Lun in a pute apate pianna Vangteh khua, Lamzang khuate gal et in khuangaih tuak peuhmahhi. Pu Guite te pianna mun leh mual, gam leh lei ong tuankik ahihi.
Zinmangte ong tungphet Sia Tun Ngaih Lian ong suakto pah aa Dr Hau Za Cinte nupa ong ngenkhia pahhi. Beh leh phung tawh kimukik, angtang, kipaak, lungdam huailua kasahi.
Sia Dal Sian Pau in, Dopmul beh ka hi ci aa a pu apate ten na, Singhum mualdung, Suangsuang kuam teng gal et nilohhi.
B Muan Ngahte in Khuangnung khua lui ah a pute’ innmun ding khat sehtawm aa, Soilianson in Vaiphei khua ka munuam ci-in zong thapaihi. Pu Naulakte khuapi Dimpi aa Thangho-Liando luguh, Thangho-Liandote sialcinna kuam en nuam aa kipeipei om aa, Ciimnuai, Geltui, Losau, Thangkhal munuam tawh, Laipian lai sinnuam tawh, Tedim tungphet ka beh pawipi uhzong om ci aa lawmnu nusia liang aa behpawi pai tawh…
Ki-itlo hipeuhmah khang, ki it peuhmah hang. Khasiat huai takpi liang hang.
Ahihhang a khasiat huai zaw kaanlai kaphawk khat in,
Kumpi tung aa ong hek hih na beh na phungteng uh, mikheltat hih na u nanau teng mah uhhi ci-in ka awmpi balkham in ka ensak nuamhi.
Kumpi lampan kimat, kihen om hileh hih na sanggam, nabeh, naphung, laigui zom na u nanau teng ding hibuangsam aa, tuaciang nangawn khual zolo cihlawmlawm bang lungsim, bang lungtang pua himawk nahihiam?
Hunkhat lai in ahihleh, kikawm, kizop khaak ding kinaak khaam mahmah himahhi. Tua nangawn kuamah kiheek sekei lehang ong kitheihilohi.

Keibel met kakisa lelhi, “Tu’n na theita uhhia na Zomi pih, na u nanaute’ lungtang puak!” teci pan liang kul nawnlohi.
I kikawm hang, i kikawi hang, i kinap hang i gimnam kidiik peuhmah khang, i zuaupi hi.

2014 kum Chin Student Union leh Mizo ram Siamsinte Hakha ah, ZOfate thulu tawh Seminar hiam ong neihsawm laipek un ZTK-2 ah Lamka lam aa tetawh neihkhop ding kigelkhin zo a, Dr Cin Khan Lun zong Lamka vaciah pahhi. Zofate kimuh khopna Chin lamte’n athulu deih zolo uhhiam, lawhcing taklo, last minute in ki cancel cih khatzong kazahi. Tua hunlai in, “Ei zong neiding hihang” ci-in taangko khinngel hihang. Khangthak makaite ong kalsuanpihnate mi nuai ah om mahmahlohi.

I pu i pa te’n Zogam Zolei khahsuahna lunglen la aphuahding mah uh, Sian’ khen hikei, Zin’ khen hikei, Mang’ khen hikei, Kawl’ khen hikei, Vai’ khen hikei, a khen taktak Zolungtang ginalo hizaw ci aa kahla awiding, tamlawh ding, minsial ding bek om kasahi.

Rev Dr Pau Khan En in, “Leitung bup aa om Zomite aw nangai un! Zomi kalsuanna, Zomi movement nungkik nading pengkul cikmah hun in kitum ngeilo dinghi” ongcih mah khum ngaungau kasa aa, Rev Dr Ngul Khan Pau in, “Mizo lak ah na kasep ciang Mizo pau in kapau aa, Thado Kuki sung ah Thado pau in hun kazanghi. Naga lak katunciang Naga pau kazanghi. Ahihhang kei mimal taktak kahihleh Zomi mah kahihi” ci-in CMBC Biakinnpi ah April 25, 2015 (Saturday) nitaak in ong taangko khia aa mipite’n makai muanhuai makai gina, makai zuihtaak nei kisa in lungmuanna khut kibeng ziahziah hi.

Hang Khan Lian
Block 646#13-115
Jalan Tenaga
Singapore 410646