Vondeih Kep Ding – 120 (Dimno’ Pa)
Tawngno,
Mi pawlkhatte in amau sepzawhloh te midang a sem zo om leh pahtawi in phat ning ci lo-in gensia in, ko bawlgawp in a galte bangdan khat in ngaihsun in langpan mawk uh hi. En i sep zawh kei leh a sem zo midangte panpih leh pahtawi in thapiak pen a picing lungsim neite gamtat dan hi-a, i khua sung ah tuadan a lungsim puak a nei ding mi, kitawm mahmah lai leh kilawm sa ing. Ih sep zawh loh, i sep nop lohte a sem zo leh a sem nuam a om leh i phatphat zo kei zongin gensia kei bek leng hoih in um ing.
Kong gen ngei sa ahi, mite’ lungsim puak zia pen ka lunglut penpen hi, ka cih mah bangin tunung deuh in nupi nih kihona pan khat i lungsim puak pen etteh huai sa mahmah ing. Khat nu in pen limtak leh kician tak in a na zuak ding bawl sawm lo hiding hiven, a khat nu in, “Mun dang ah a lei pak nading om lo aih ciang, hoih tak i bawl kei zongin a gil uh hong kial leh hong lei veve in teh, ci kei un. Na bawl veve vua leh hoih tak mah, kician tak mah in a lim dingin bawl in zuak un,” ci hi. Tudan lungsim a nei tua nupi nu kampau in ka lungsim hong sunkha hi.
Tuadan in lungsim puak hoih a nei ding mi zong kitawm mahmah zel hi.
A tamzaw phial in pen mi gilkial a dongtuak khat mu leh, ‘hih pa’n an ne kei leh si ding aih ciang hih ka an zuak pen ka cih zahzah sa leng zong hong lei lel ding hi,’ ci-in a man zah val ah a utzah khanto in tua mipa a neih teng tawh lei sak hi. Tuadan lungsim puak a nei kitam zaw mawk hi.
“Sabengte in Sa ihmu lai kap lo-in, tui dawn laitak a tuah leh zong kap pah lo uh hi. A kap nop vua leh phawn bawl phot in, tua khit ciangin kap pan uh hi,” ci-in Papi khangham khat in hong gen ngei hi. Ei bel a ihmut laitak khawng va tuak kha leng tuahpha kisa in, lungdam bang ko liang le hang kilawm kisa ing.
Gengen leng mimal min peuh hong gelh khial kha leng hoih in um kei zaw ing. Kong gennop thu thei dingin hong lamen ing.
Hong it,
Na Pa
July 10, 2017
Comment piaknop aomleh...