ZSM pan dahpihna ~ Tg. Thang Lam Khup (Kum 26)

ZSM pan dahpihna ~ Tg. Thang Lam Khup (Kum 26)

Tuipi khua mi Pa Kam Za Cin leh Nu Awi Khan Dim, Guite beh te’ tapa Tg. Thang Lam Khup (Kum 26) pen Gilnat na hangin 03.08.2014, 04:00AM hun in Klang kumpi zatopi panin Leitung nuntakna nusia in PaPasian kiangah hong ciahsan ta hi. Lawm Khuppi in anuntak sungin Zomi dongtuak te kipanpih na ZSM kipawlna ah sum tawh mapang den khat hi aa, ama sumkhiat te hangin Zomi sungpan asisa mite’n hanmual tangzo uh hi.

Tua hi a, amah in hong nusiat ciangin ZSM in vai khempeuh kibuaipih a, sumbei khempeuh kisik in panla hi. Ni 07.08.2014 ni-in Sepang hanmual ah lungkim huaitak in kivui zo hi. Lawm Khuppi hang a adah akap lungzuang khua-ngai, thanem mi khempeuh tawh akibangin ZSM zumpi panin ih dah khawm hi.

Thu-ngetna tawh panpih ni: Pa Thang Sawm Lian-Vangteh pen nasepna inntung pan kia in zato mun nih/thum bangah kilak kawikawi a, Topa’ hehpihna tawh tampi tak noptuam zaw ta a, a ngei bang aa hong dam siang nangin thungetna tawh phawk ciat ni. Ahunhun in GHKL zatopi ah ZAM zumpi pan palai te’n kibuaipih to zel lai ding hi.

Pawl neilo pawl na hi lai maw? Zomi te in ih Gam pan Gamdang pai ding ih kithawi laitak in thungen in, thungente kiangah thu kingen sakin, Pawlpi sia/ma te thu kingen sakin, Nu leh pa thupha kipia sak napi hangin sum thalawh theihna gam, sum tamna gam, nasepna gam ih tun ciangin ih nasepna khawng paulam in thungente, Pasian nasem sia/ma te leh Pawlpi khawng phamawh ih sa kei pah lel ngam mawkmawk hi.

Ahizongin damlohna, dongtuahna, hamsatna leh eikia in ih puak zawh loh vangik khatpeuh ih tuah ni ciangin ih nasepna, leh ih sumte in hong vanpih theihloh hun om aa tua hun ciangin Pasian nasem sia/ma te leh Pawlpi ngiat akisapna kiphawk panpan thei hi. A hizongin zekai ta ahih manin maizum pipi in Pawlpi khat peuh ah pawllutna khawng a nei pan zanzan Zomi thu-um te ih hi mawk hi.

Tua ahihman in Zomi Pasian thu um mi khempeuh in na omna veng, na kinaina Pawlpi, na thangahna Pawlpi khat teitei ah Pawlmi na hih ding thupi mahmah ahih lam ZAM zumpi panin ih kiphawksak kikkik nuam hi.