Zoom Meeting ah Pu Hau Khan Sum thugenna

Zoom Meeting ah Pu Hau Khan Sum thugenna

“Nay Pyi Taw a omte in ka sep theih ding uh a om leh hong gen un, tha hong pia in hong seppih ding hi ung” (Pu Hau Khan Sum).

Ko zong ko nasepna lamah online mah zangin consultation leh meeting na bawl ung. Ken kong kup nop ah tuni ciangciang i deih mahmahte ngah theihna ding sepna leh hanciamna ah kisapna leh thanemna khat nei leng kilawm sa ing. Gentehna in District vaite, national grid vaite, vanlengtual vai leh tutung zong Falam leh Kawlpi lamah Covid-19 positive ngahte puak ding vaite khawng en leng kisap khat nei hi hang, cih kimu sa ing. Hihte khempeuh i et ciangin Pu Suan (Pu Hau Do Suan) cih mah bangin wake up call taktak hong tung ta hi, cih i phawk ding thupi sa mahmah ing.

Mailamah i kalsuanna ding kong kupna ah kilungtuak a sepkhopna Cooperation ciang bek hi loin collaboration leh coordination kisam sa ing. I panmun leh i sepzia kibang kim ding, cih hi loin eima sepna ciat leh i panna ciat panin bangci bangin vaipuak zo thei ding, cih lam gen nuam ing. Gentehna in music lam bang hi leh Orchestra ahi zongin Benkhaya group te dan maw.

Amai a pai teipi tawi leh dialkhai tawi om ding, a khuangpi tum om ding, a neuciuciau a ging tektek a sai ciauciau zong om ding, tua teng amau mun tek ah a hong gin ciangin a zaknop leh a muhnop mahmah orchestra/benkhaya hong piang thei pan hi. MP te sep ding, CSO te sep ding, kumpi nasemte sep ding, sum tha tawh a pang lam om ding, thungen biakna lam na om ding. Covid-19 zawh ah hih bang danin i kalsuan siam ding kisam sa ing.

Tuciang i dinmun en leng pen thu khat peuhpeuh i muhziate pen a problem lam vive focus lua ihi hiam, ci ing. Thu khat a hoih lam pan a muhtheihna thupi sa ing. Problem a om khat pen amah bekin problem suak lo hi. Problem a om khat limtak i ven sak loh ciangin tua pen probelm hong suak hi. Problem kici pen mun khempeuh ah innkuan ah, kumpi nasepna leh gam khempeuh ah a om ciat hi.

Tunai ei tuahkhakthute en leng zong problem focus panin solution focus lamah i kalsuan theih ding, a result ahih kei leh answer hoih i ngah theihna dingin bang sem ding… cih lam i lim ngaihsut kisam sa ing.

Ko zong Nay Pyi Taw ah hi bang lam a nasem pen a za a sim om hi ung. Tua munah a makai khat ka hihna tulaitak a Zomite panlakna ICU leh volunteer nasepnate thupi hong sa leh tha hong pia nuam ing. Ko Nay Pyi Taw a omte in ka hih theih uh a om leh hong theihsak un. Nay Pyi Taw a om uliante tangin keimahmah in zong hong gen nuam hi ing. Septheih ding a omte hong theisak un. I nasepnate ah hong kihelin hong support ding hi ung.

Pu Hau Khan Sum pen tulaitakin Myanmar gambup aitangin Ministry of Foreign Affairs ah Director General vaipuak lianpi a sep laitak ahi hi. Myanmar gambup ah Director General mi 9 om uh hi. Covid-19 tawh kizomin Tedim khuapi cimawh kisa-in i mangbat laitak Suantuang Siamnu in Zoom Cloud meeting hong pan khia a, tua online holimna ah Pu Hau Khan Sum in April 25, 2020 ni-in a thusunna Zomi Broadcasting facebook page panin Tedim Post tanute in atomin kilasawn hi. The Tedim Posts